ຕອນເຊົ້າວັນທີ 4 ຕຸລາ 2021 ນີ້ ໜ່ວຍກຳມະບານ ແລະ ໜ່ວຍຊາວໜຸ່ມ ຂອງຫ້ອງການໂຍທາທິການ ແລະ ຂົນສົ່ງເມືອງໃໝ່ ແຂວງຜົ້ງສາລີ ໄດ້ພ້ອມກັນອອກແຮງງານສ້ອມແປງເສັ້ນທາງເທດສະບານເມືອງ ລວມທັງໝົດ 18 ຈຸດ ພາຍໃຕ້ການຊີ້ນຳຫົວໜ້າທິມງານໂດຍ ທ່ານ ວິໄລທອງ ຄຸນທະຈັກ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງໃໝ່ ໄດ້ນຳພາສະມາຊິກກຳມະບານ ແລະ ຊາວໜຸ່ມຂອງໜ່ວຍໂຍທາທິການ ແລະ ຂົນສົ່ງ ລວມ 12 ຄົນ.

ການສ້ອມແປງທາງໃນຄັ້ງນີ້ ແມ່ນຊີມັງປະສົມປູນຄວາມຍາວຂອງເສັ້ນທາງ ລວມລວງຍາວ 5 ກິໂລແມັດ, ສ້ອມແປງທາງປູຢາງທີ່ເປເພເປັນຂຸມຕາມເທດສະບານເມືອງໃໝ່ ອຸປະຖຳແຮ່, ຊາຍ, ຊີມັງ ໂດຍບໍລິສັດດາລາກໍ່ສ້າງຂົວທາງຈຳກັດ ມູນຄາລວມ 4,500,000 ກີບ ສ່ວນແຮງງານແມ່ນສະມາຊິກກຳມະບານ, ຊາວໜຸ່ມ ເປັນການປະກອບສ່ວນເພື່ອເຮັດໃຫ້ວຽກງານດັ່ງກ່າວສຳເລັດຜົນ ເຊີ່ງສົ່ງຜົນສະດວກໃນການສັນຈອນໄປມາສະດວກສະບາຍ ມີຄວາມປອດໄພໃນການສັນຈອນ ລົດຈັກ ແລະ ລົດໃຫຍ່ ເຮັດໃຫ້ເທດສະບານເມືອງໃໝ່ ຂອງພວກເຮົາມີຄວາມສະອາດສວຍງາມທັງເປັນແບບຢ່າງໃນການອອກແຮງງານລວມ ຂອງໜ່ວຍ ໂຍທາທິການ ແລະ ຂົນສົ່ງອີກດ້ວຍ.

ພາບ-ຂ່າວ: ຄຳຫຼ້າ ເມືອງໃໝ່ ແຂວງຜົ້ງສາລີ