ຕອນເຊົ້າຂອງວັນທີ່ 5 ຕຸລາ 2021 ນີ້ ຄະນະບໍລິຫານງານຊາວໜຸ່ມ, ຄະນະໜ່ວຍຊາວໜຸ່ມ ພ້ອມສະມາຊິກຊາວໜຸ່ມອ້ອມຂ້າງສຳນັກງານ ອອກແຮງງານລວມເພື່ອເປັນການຂ່ຳນັບຮັບຕ້ອນ ວັນຄູແຫ່ງຊາດຄົບຮອບ 27 ປີ ທີ່ຈະມາເຖິງໃນມໍ່ໆ ນີ້ ພາຍໃຕ້ການຊີ້ນໍາຂອງ ສະຫາຍ ນ. ຄໍາປ້ອມ ອິນທະນາ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງໃໝ່ ແຂວງຜົ້ງສາລີ ເພື່ອເປັນການສ້າງຂະບວນການຂອງຄະນະໜ່ວຍຊາວໜຸ່ມ, ສະມາຊິກຊາວໜຸ່ມອ້ອມເທດສະບານເມືອງ ໄດ້ພ້ອມກັນອະນາໄມຂົນແຮ່-ຊາຍປູເສັ້ນທາງເຂົ້າຕະຫຼາດເມືອງໃໝ່ ໃຫ້ມີຄວາມສະອາດງາມຕາ ແລະ ເປັນລະບຽບຮຽບຮ້ອຍ.

ໃນການອອກແຮງງານຄັ້ງນີ້ມີຂະບວນການຟົດຟື້ນ ເຕັມໄປດ້ວຍຄວາມເອົາໃຈໃສ່ ເຮັດໃຫ້ວຽກງານມີຄວາມສຳເລັດຕາມຈຸດປະສົງ ທັງເປັນການປະກອບສ່ວນຂອງສະມາຊິກຊາວໜຸ່ມ, ໄວໜຸ່ມທຸກທົ່ວໜ້າໃຫ້ສົມກັບຄຳຂວັນທີ່ວ່າ: ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມອາສາ ເພາະວ່າສະມາຊິກຊາວໜຸ່ມເປັນກຳລັງແຮງ ເປັນຜູ້ສືບທອດໃນອະນາຄົດ ເຮັດໃຫ້ບ້ານເມືອງມີຄວາມຈົບງາມ ແລະ ສີວິໄລຕະຫຼອດໄປ.ການອອກແຮງງານໃນຄັ້ງນີ້ມີສະມາຊິກຊາວໜຸ່ມລວມທັງໝົດ 158 ສະຫາຍ, ຍິງ 92 ສະຫາຍ ຊາວໜຸ່ມທຸກຄົນມີຄວາມສາມັກຄີກັນ ເຮັດໃຫ້ການອອກແຮງງານຄັ້ງນີ້ສຳເລັດລົງດ້ວຍບັນຍາກາດອັນເໝາະສົມ ແລະ ຈົບງາມ.

ພາບ-ຂ່າວ: ຄຳຫຼ້າ ເມືອງໃໝ່ ຜົ້ງສາລີ