ມີເດຍາວແຂວງເຊກອງ ຄືພວກເຮົາຫຼາຍຄົນຮູ້ນໍາກັນແລ້ວວ່າ ໃນໄລຍະການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ ກໍຄືປະຈຸບັນ ໄດ້ສົ່ງຜົນເຮັດໃຫ້ຫຼາຍໆກິດຈະການໄດ້ປິດໂຕລົງ ຫຼືຢຸດໃຫ້ບໍລິການຊົ່ວຄາວ ເຊັ່ນ: ຕະຫຼາດສົດ, ຮ້ານອາຫານ ແລະຮ້ານຂາຍເຄື່ອງຍ່ອຍຕ່າງໆ ແລະສະຖາບັນຕ່າງໆເຊັ່ນ: ໂຮງຮຽນ ໄດ້ໂຈະການຮຽນ-ການສອນຊົ່ວຄາວ ຍ້ອນການແຜ່ລະບາດຂອງພະຍາດໂຄວິດ-19, ເຊິ່ງໃນນີ້ ກິດຈະການຮ້ານຂາຍເຄື່ອງຍ່ອຍ “ ຮ້ານວັນນາ “ ທີ່ຕັ້ງຢູ່ບ້ານເພຍໃໝ່ ເມືອງລະມາມ ແຂວງເຊກອງ ກໍເປັນອີກໜຶ່ງຮ້ານທີ່ໄດ້ຮັບຜົນທົບບໍ່ໜ້ອຍ.

ທ່ານ ນາງ ເອັນ ຜູ້ປະກອບການຮ້ານຂາຍເຄື່ອງຍ່ອຍ “ ຮ້ານວັນນາ “ ໄດ້ໃຫ້ສໍາພາດຕໍ່ສື່ມວນຊົນແຂວງເຊກອງ ໃນວັນທີ 5 ຕຸລາ 2021 ນີ້ ວ່າ: ພາຍຫຼັງການແຜ່ລະບາດຂອງພະຍາດໂຄວິດ-19 ໄດ້ແຜ່ລາມອອກສູ່ວົງກວ້າງທັງພາຍໃນ ແລະຕ່າງປະເທດ ເວົ້າລວມ, ເວົ້າສະເພາະກໍຄືແຂວງເຊກອງພວກເຮົາ ເຖິງວ່າມີຈໍານວນຜູ້ຕິດເຊື້ອບໍ່ຫຼາຍ ແຕ່ກໍໄດ້ສົ່ງຜົນກະທົບຫຼາຍໆດ້ານ ໂດຍສະເພາະໄດ້ເຮັດໃຫ້ບັນຍາກາດການສ້າງເສດຖະກິດ, ການຊື້-ຂາຍ ມິດງຽບ, ບໍ່ຄຶກຄື້ນຄືເມື່ອກ່ອນ; ເປັນຕົ້ນ ຮ້ານຂອງຂ້າພະເຈົ້າໃນປີຜ່ານມາ ແຕ່ບໍ່ທັນມີການແຜ່ລະບາດຂອງພະຍາດໂຄວິດ-19 ມີລາຍຮັບຈາການຂາຍເຄື່ອງຍ່ອຍແຕ່ລະວັນ ປະມານ 9-10 ລ້ານຕໍ່ວັນ, ແຕ່ປະຈຸບັນ ແມ່ນຂາຍບໍ່ດີ ຂາຍໄດ້ປະມານພຽງແຕ່ 4-5 ລ້ານກີບຕໍ່ວັນ, ເຫັນວ່າຫຼຸດລື່ນກັນຫຼາຍພໍສົມຄວນ; ເຊິ່ງສາເຫດຕົ້ນໆ ອາດເປັນຍ້ອນປະຊາຊົນມີຄວາມຢ້ານກົວ ບໍ່ກ້າອອກຈາກເຮືອນ, ບໍ່ໄດ້ທໍາມາຄ້າຂາຍ ( ມີກໍສ່ວນໜ້ອຍໜຶ່ງ), ເຮັດໃຫ້ບໍ່ມີເງິນຈັບຈ່າຍໃຊ້ສອຍ, ເຮັດໃຫ້ເສດຖະກິດຝືດເຄືອງ.

ທ່ານ ນາງ ເອັນ ກ່າວຕື່ມວ່າ ແຕ່ແນວໃດກໍດີໃນໄລຍະທີ່ມີການແຜ່ລະບາດຂອງພະຍາດຢຄວິດ-19 ຮ້ານພວກເຮົາກໍໄດ້ເຂັ້ມງວດໃນການປະຕິບັດຕາມມາດຕະການທີ່ທາງຄະນະສະເພາະກິດວາງອອກຢ່າງເຂັ້ມງວດ ເປັນຕົ້ນ ທາງຮ້ານໄດ້ໃຊ້ເຊືອກຟາງຢັງອ້ອມຮ້ານ ແລະມີເຈວແອວກໍຮໍ ຫຼືສະເປ ໄວ້ໃຫ້ລູກຄ້າທີ່ມາຊື້ເຄື່ອງໃນຮ້ານຢ່າງເປັນປະຈໍາ ພ້ອມທັງຮັກສາໄລຍະຫ່າງລະຫວ່າງຜູ້ຊື້ແລະຜູ້ຂາຍ ທັງນີ້ເພື່ອປ້ອງກັນບໍ່ໃຫ້ການແຜ່ລະບາດຂອງພະຍາດໂຄວິດ-19 ຂະຫຍາຍຕົວອອກສູ່ວົງກວ້າງ. ຂ່າວ: ພຸດທະສອນ