ມີເດຍລາວແຂວງຫຼວງພະບາງວັນທີ 4 ຕຸລາ 2021 ຢູ່ທີ່ເມືອງງອຍ ແຂວງຫຼວງພະບາງ ທ່ານ ບຸນເມືອງ ໄຊຍະສິດ ເຈົ້າເມືອງງອຍ ແລະຄະນະສະເພາະກິດ ເພື່ອປ້ອງກັນ,ຄວບຄຸມ ແລະແກ້ໄຂ ການລະບາດຂອງພະຍາດໂຄວິດ-19 ເມືອງ ໄດ້ຕ້ອນຮັບການມາເຄື່ອນໄຫວຕິດຕາມກວດກາ ສະພາບການ ປ້ອງກັນ,ຄວບຄຸມ ແລະແກ້ໄຂພະຍາດໂຄວິດ ຢູ່ເມືອງງອຍ ຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ,ມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ພ້ອມດ້ວຍກົມຄວບຄຸມໂລກ ກະຊວງສາທາລະນະສຸກ ແລະຕ່າງພະແນກການກ່ຽວຂ້ອງຈາກແຂວງ,ຄະນະສະເພາະກິດແຂວງ ແລະເມືອງເຂົ້າຮ່ວມ ຢູ່ຫ້ອງປະຊຸມຫ້ອງການສຶກສາທິການ ແລະກິລາເມືອງ.

ໂອກາດດັ່ງນີ້ທ່ານ ບຸນເມືອງ ໄຊຍະສິດ ເຈົ້າເມືອງງອຍ ກໍໄດ້ລາຍງານສະພາບການເຄື່ອນໄຫວວຽກງານຮອບດ້ານຢູ່ພາຍໃນເມືອງ ໂດຍສະເພາະ ກໍແມ່ນສະພາບການລະບາດຂອງເຊື້ອພະຍາດໂຄວິດ-19 ພາຍຫຼັງມີການລະບາດຢູ່ເມືອງ ເຊິ່ງສົ່ງຜົນກະທົບຕໍ່ສະພາບເສດຖະກິດ-ສັງຄົມ ແລະມີກໍລະນີຕິດເຊື້ອຢູ່ບາງຊຸມຊົນ-ບ້ານ ເຮັດໃຫ້ຈໍາຕ້ອງໄດ້ປິດເມືອງ ຫຼື ລັອກດາວເມືອງ,ສໍາລັບກໍລະນີມີຜູ້ຕິດເຊື້ອພະຍາດໂຄວິດ ຢູ່ເມືອງງອຍແມ່ນເລີ່ມແຕ່ວັນທີ 20 ກັນຍາ 2021 ເປັນຕົ້ນມາ,ເບື້ອງຕົ້ນໄດ້ເກັບຕົວຢ່າງ 45 ກໍລະນີ ເປັນຜົນບວກ 20 ກໍລະນີ,

ຈາກນັ້ນ ໄດ້ມີການແຜ່ລາມອອກໄປເປັນວົງກ້ວາງ ພາຍໃນບ້ານ ເຂດເທດສະບານ ແລະ ລາມໄປ ບ້ານອື່ນ ພາຍໃນເມືອງ.ມາຮອດປະຈຸບັນ (3/9/2021) : ມີຜູ້ຕິດເຊື້ອສະສົມ 293 ກໍລະນີ,ໃນນີ້ປີ່ນປົວຫາຍດີ 6 ກໍລະນີ(ແຮງງານນໍາເຂົ້າ), ສົ່ງປິ່ນປົວຕໍ່ ທີ່ແຂວງຫຼວງພະບາງ 20 ກໍລະນີ,ກໍາລັງປິ່ນປົວ 267 ກໍລະນີ. ຕໍ່ກັບສະພາບການດັ່ງກ່າວ ທາງອົງຄະນະພັກເມືອງ ກໍໄດ້ອອກແຈ້ງການ ບັນດາຄໍາສັ່ງຂອງລັດຖະບານ,ແຂວງ ແລະແຈ້ງການຂອງເມືອງ ກ່ຽວກັບມາດຕະການວ່າດ້ວຍການເຜີ້ມທະວີມາດຕະການປ້ອງກັນ ແລະ ຕອບໂຕ້ພະຍາດໂຄວິດ-19, ເຂັ້ມງວດ ກວດກາບັນດາແຮງງານນຳເຂົ້າຈາກປະເທດເພື່ອນບ້ານ, ຈາກບັນດາແຂວງທີ່ການເດີນທາງຂົ້າ-ອອກເມືອງ,ສຸມໃສ່ສັກຢາວັກຊີນໃຫ້ບ້ານທີ່ມີການລະບາດໃນຊຸມຊົນ,ໂດຍສະເພາະແມ່ນບ້ານແດງ. ມາຮອດວັນທີ 3/10/2021 ການໃຫ້ວັກຊີນກັນພະຍາດຂັມທີ 1 ໄດ້ 5.282 ຄົນ, 16,96%.ເຂັມທີ 2 ໄດ້ 2.917 ຄົນ, 9,37%. ຊະນິດວັກຊິນທີ່ນໍາໃຊ້ ປະກອບມີແອສຕຼາ ເຊເນກາ : ເຂັມ 1 ສັກໄດ້ : 2.390 ຄົນ.ເຂັມ 2 ສັກໄດ້ 183 ຄົນ.ຊີໂນຟາມ : ເຂັມ 1 ສັກໄດ້ 4.644 ຄົນ . ເຂັມ 2 ສັກໄດ້ : 2.572 ຄົນ ແລະຈອນສັນ : ສັກໄດ້ 2.407 ຄົນ.

ຕໍ່ກັບສະພາບດັ່ງກ່າວທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ກໍ່ໄດ້ມາເຄື່ອນໄຫວຕິດຕາມ ແລະໄດ້ມີຄໍາເຫັນເນັ້ນຍໍ້າໃຫ້ຄະນະສະເພາະກິດຂັ້ນແຂວງ, ຂັ້ນເມືອງ ແລະທຸກພາກສ່ວນໃນສັງຄົມ ຈົ່ງເພີ່ມທະວີຄວາມສາມັກຄີ ສຸມທຸກກໍາແຮງເຂົ້າໃນການປ້ອງກັນ ຄວບຄວອບຄຸມ ຕ້ານ ແລະສະກັດກັ້ນ ການລະບາດຂອງພະຍາດໂຄວິດ 19 ຢູ່ບັນດາແຂວງໃນທົ່ວປະເທດ ເວົ້າສະເພາະແຂວງຫຼວງພະບາງ ໂດຍດ່ວນ, ທຸກພາກສ່ວນຕ້ອງເປັນເຈົ້າການ, ເປັນກໍາແຮງຊ່ວຍກັນ ປະຕິບັດມາດຕະການປ້ອງກັນ ຄວບຄຸມການລະບາດຢ່າງເຂັ້ມງວດ ແລະຕ້ອງໄດ້ທົບທວນຄືນບັນດາມາດຕະການປ້ອງກັນສັງຄົມໃຫ້ເຂັ້ມງວດຂື້ນຕື່ມ, ເພາະວ່າໃນໄຍລະຜ່ານມາການລະບາດຢູ່ຊຸມຊົນ ກໍ່ເກີດຈາກສາເຫດເຊັ່ນວ່າ: ການເຂົ້າຮ່ວມຄົບງັນເຮືອນດີ, ການສ້າງສັນຊຸມແຊວກັບໝູ່, ການພົວພັນສັງຄົມ ລະຫວ່າງ ຄອບຄົວ ກັບຄອບຄົວ ແລະອິກແຫຼ່ງທີ່ມາກໍ່ຍ້ອນແຮງງານນໍາເຂົ້າ ແລະໄດ້ນໍາເຊື້ອເຂົ້າມາລະບາດໃນຊຸມຊົມ ເຮັດໃຫ້ການລະບາດນັບມື້ນັບຮຸນແຮງຂື້ນເລື້ອຍໆ.ອັນສໍາຄັນຕ້ອງໃຫ້ມີການລົງໂຄສະນາສຸຂະສຶກສາ ໃຫ້ຄວາມປະຊາຊົນບັນດາເຜົ່າ ກ່ຽວກັບຜົນໄພອັນຕະລາຍ, ຜົນຮ້າຍຂອງການລະບາດ ແລະວິທີການປ້ອງກັນຕົວເອງ, ຄອບຄົວ ແລະສັງຄົມ, ເພື່ອຕັດວົງຈອນລະບາດຂອງພະຍາດດັ່ງກ່າວ ບໍ່ໃຫ້ມີການຂະຫຍາຍໄປສູ່ວົງກ້ວາງ. ປຸກລະດົມທຸກພາກສ່ວນ ຢ່າງກ້ວາງຂວາງ ເຂົ້າຮ່ວມກັນ ເພື່ອສຸມໃສ່ປ້ອງກັນ,ຄວບຄຸມ ແລະສະກັດກັ້ນ ບໍ່ໃຫ້ແຜ່ລາມໄປອອກຫຼາຍຂຶ້ນ.ອັນທີ່ດ່ວນສຸດແມ່ນໃຫ້ຄະນະສະເພາະກິດ ແລະເຈົ້າໜ້າທີ່ ຕິດຕາມຊອກຫາກຸ່ມສ່ຽງສໍາພັດໃຫ້ສິດ ມາກັກໂຕ ຫາເຊື້ອໂດຍໄວ ໂດຍສະເພາະ ແມ່ນເຂດຊຸມຊົນ ເຊັ່ນຄອບຄົວ ແລະອື່ນໆ.ພ້ອມດຽວກັນນັ້ນ ຕ້ອງຄໍານຶງເຖິງຜົນກະທົບຕໍ່ ການດໍາລົງຊີວິດຂອງປະຊາຊົນ ເປັນຕົ້ນແມ່ນ ປະຊາຊົນທຸກຍາກ.
ຂ່າວ: ເພັດສາຄອນ ສິມມະວົງ