ມີເດຍລາວແຂວງຫຼວງພະບາງ ວັນທີ 4 ຕຸລາ 2021 ນີ້ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງ ສາທາລະນະສຸກ ພ້ອມດ້ວຍຄະນະ ແລະ ຄະນະສະເພາະກິດປ້ອງກັນ, ຄວບຄູມ ແລະ ແກ້ໄຂການລະບາດຂອງພະຍາດ ໂຄວິດ19 ແຂວງຫຼວງພະບາງ ໄດ້ລົງຢຽມຢາມ ຊີນຳ ຄະນະສະເພາະກິດປ້ອງກັນ, ຄວບຄູມ ແລະ ແກ້ໄຂການລະບາດຂອງພະຍາດ ໂຄວິດ19 ເມືອງນ້ຳບາກ ມີຄະນະສະເພາະກິດຂັ້ນແຂວງ, ເມືອງ ແລະ ຂະແໜງການກ່ຽວຂ້ອງເຂົ້າຮ່ວມ.

ທ່ານ ສົມຫວັງ ພອນຄໍາວົງສາ ເຈົ້າເມືອງນໍ້າບາກ ກໍໄດ້ລາຍງານສະພາບການປ້ອງກັນ,ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຢູ່ເມືອງນໍ້າບາກ ທາງອົງການປົກຄອງເມືອງ ກໍ່ໄດ້ສຸມໃສ່ການປ້ອງກັນ, ຄວບຄຸມ ແລະແກ້ໄຂການລະບາດຂອງເຊື້ອພະຍາດດ້ວຍຫຼາຍຮູບການ ແລະວິທີການ,ໄດ້ປະຕິບັດຄຳສັ່ງແນະນຳຂອງຂັ້ນເທິງວາງອອກຢ່າງເຂັ້ມງວດ.ທົ່ວເມືອງມີຈຸດກວດກາ 3 ຈຸດ,ມີສູນກັກກັນໃຫຍ່ 1 ແຫ່ງ ( ສູນແຄັມຈີນ )ປະກອບດ້ວຍ 6 ອາຄານ 52 ຫ້ອງ,ສູນດັ່ງກ່າວແມ່ນແຮງງານສະສົມນໍາເຂົ້າມາກັກບໍລິເວນ,ເຊິ່ງມີທັງໝົດ 436 ຄົນ,ຍິງ 237 ຄົນ,ປັດຈຸບັນ ຍັງເຫຼືອຢູ່ສູນ 172 ຄົນ,ຍິງ 99 ຄົນ,

ນອກນີ້ຍັງມີສູນກັກກັນຊົ່ວຄາວ ສໍາລັບຜູ້ທີ່ມີອາການສົງໄສ ຫຼື ຜູ້ສໍາພັດໃກ້ສິດກັບກໍລະນີຕິດເຊື້ອ 2 ແຫ່ງຄື: ໂຮງຮຽນມັດທະຍົມຕົ້ນປາກມອງ ແລະໂຮງຮຽນປະຖົມບ້ານມົກແວດ.ມາຮອດປັດຈຸບັນການສັກວັກຊິນໃຫ້ປະຊາຊົນມີ 3 ຊະນິດຄື: ຊີໂນຟາມໄດ້ 7.916 ຄົນ,ແອັສຕາເຊເນກາໄດ້ 3.296 ຄົນ ແລະຈອນສັນໄດ້ 4.440 ຄົນ.ລວມແລ້ວໄດ້ສັກວັກຊິນໄດ້ທັງໝົດ 15.652 ຄົນ.ກວມ 19,70% ຂອງພົນລະເມືອງທັງໝົດ ແລະຍັງມີໂຮງໝໍພາກສະໜາມອີກ 1 ແຫ່ງ,ເຊິ່ງແມ່ນໂຮງຮຽນ ມັດທະຍົມສົມບູນນໍ້າບາກ,ພາຍຫຼັງມີການລະບາດເກີດຂຶ້ນຢູ່ເມືອງງອຍໃນວັນທີ 23 ກັນຍາ 2021,ທາງອົງການປົກຄອງເມືອງ ກໍໄດ້ປິດເມືອງໃນວັນທີ 27 ກັນຍາ 2021,ຍ້ອນມີກໍລະນີຕິດເຊື້ອນໍາເຂົ້າ 2 ກໍລະນີ,ເຊິ່ງໃນນີ້ວັນທີ 24 ກັນຍາ ມີ 1 ກໍລະນີ,ແມ່ນແຮງງານສວນກ້ວຍຈີນ ຢູ່ບ້ານນະຄອນ ແລະວັນທີ 22 ກັນຍາ ມີ 1 ກໍລະນີ,ແມ່ນພະນັກງານກະສິກໍາ ແລະປ່າໄມ້ເມືອງງອຍ ທີ່ມາຫາຄອບຄົວຢູ່ສູນກະສິກໍາບ້ານນໍ້າຖ້ວມໃຕ້,ພ້ອມດຽວກັນນີ້ທາງເມືອງໄດ້ສັ່ງປິດບັນດາບ້ານທີ່ຜູ້ກ່ຽວທັງສອງໄປສໍາພັດ ປະກອບມີບ້ານ ນະຄອນ,ບ້ານນາກອກ ແລະສູນກະສິກໍາບ້ານນໍ້າຖ້ວມໃຕ້.ມາຮອດວັນທີ 3 ຕຸລາ 2021 ມີຜູ້ຕິດເຊື້ອທັງໝົດ 67 ຄົນ,ໃນນີ້ ນໍາເຂົ້າ 2 ຄົນ,ຊຸມຊົນ 65 ຄົນ ແລະໄດ້ນໍາສົ່ງໄປໂຮງໝໍແຂວງ 3 ຄົນ,ທັງໝົດແມ່ນກໍາລັງປິ່ນປົວ.

ໂອກາດດັ່ງກ່າວນີ້ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ມີຄຳເຫັນຊີ້ນຳ ໂດຍເນັ້ນຕໍ່ຄະນະສະເພາະກິດປ້ອງກັນ ໂຄວິດ-19 ເມືອງ ຕ້ອງສຸມໃສ່ປ້ອງກັນການແຜ່ລະບາດຂອງພະຍາດ ໂຄວິດ-19 ຢ່າງເຂັ້ມງວດ, ດ້ວຍການປິດເມືອງ ແລະບ້ານ,ຫ້າມບໍ່ໃຫ້ເຄື່ອນໄຫວຊະຊາຍຖ້າບໍ່ມີກໍ່ລະນີຈຳເປັນ ເຊັນ: ໄປປະຕິບັດໜ້າທີ່- ທີ່ຄະນະສະເພາະກິດອະນຸຍາດ ເປັນຕົ້ນ ໄປຊື້ສະບຽງອາຫານ ແລະໄປປິ່ນປົວຄົນເຈັບ, ມາດຕະການບໍລິຫານແພດ-ໝໍ ລວມທັງໜ່ວຍງານທີ່ກ່ຽວຂ້ອງ ຕ້ອງມີວິທີການວາງແຜນດ້ານຕ່າງໆ ເພື່ອຮັບມື ແລະໂຕ້ຕອບກັບການລະບາດ ຂອງພະຍາດ ໂຄວິດ-19, ການບໍລິການຕ້ອງມີຄວາມວ່ອງໄວ, ຄອບຄົວໃດມີຜູ້ຕິດເຊື້ອແມ່ນໃຫ້ນໍາເອົາສະມາຊິກ ໃນຄອບຄົວນັ້ນໄປເກັບຕົວຢ່າງໃຫ້ໝົດ ເພື່ອກວດຫາເຊື້ອພະຍາດໂຄວິດ-19, ສໍາລັບຜູ້ສໍາພັດໃກ້ສິດ ໃຫ້ນຳມາເຂົ້າສູນກັກກັນ ເພື່ອກວດຫາເຊື້ອ, ສືບຕໍ່ໂຄສະນາປະຊາສຳພັນ ໃຫ້ປະຊາຊົນບັນດາເຜົ່າ ຕໍ່ມາດຕະການການປ້ອງກັນຢ່າງເປັນປົກກະຕິ, ປັບປຸງລະບົບມາດຕະການຢູ່ສູນກັກກັນໃຫ້ຮັດກຸມ, ມີການແບ່ງວຽກງານຊີ້ນຳ ລະອຽດ, ສືບຕໍ່ສ້າງເງື່ອນໄຂສັກວັກຊີນໃຫ້ກັບພະນັກງານທະຫານ, ຕຳຫຼວດຕະຫຼອດຮອດປະຊາຊົນທົ່ວເຖີງ ແລະໄດ້ຕາມລະດັບຄາດໝາຍ, ສະເໜີໃຫ້ບໍລິສັດລົງທຶນທີມີຜູ້ຕິດແມ່ນໃຫ້ກັກຕົວ ແລະປິ່ນປົວກັບທີ່ບໍ່ໃຫ້ມີການເຄື່ອນຍ້າຍ,ລະດົມໃຫ້ບໍລິສັດປະກອບສ່ວນຊ່ວຍບັນດາພັນທະຕ່າງໆທີ່ມີຄວາມຈຳເປັນ.
ຂ່າວ: ເພັດສາຄອນ ສິມມະວົງ