ມີເດຍລາວແຂວງເຊກອງ
ຕອນເຊົ້າວັນທີ 6 ຕຸລາ 2021 ນີ້ ທີ່ຫ້ອງປະຊຸມຫ້ອງການ-ການເງິນເມືອງທ່າແຕງ ແຂວງ ເຊກອງ ໄດ້ຈັດກອງປະຊຸມເປີດຂະບວນການເດີນສຳຫຼວດ ແລະ ກຳນົດເງື່ອນໄຂການຈັດແບ່ງປະເພດວິສາຫະກິດທົ່ວເມືອງ ໂດຍເປັນກຽດເຂົ້າຮ່ວມຂອງທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງ,ມີທ່ານ ສຸວັນ ສ້ອຍທະວົງສາ ຫົວໜ້າຫ້ອງການ-ການເງິນເມືອງທ່າແຕງ,ບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ,ພະແນກການກ່ຽວຂ້ອງ ພ້ອມດ້ວຍຄະນະກໍາມະການເດີນສໍາຫຼວດຖານຂໍ້ມູນລາຍຮັບຂັ້ນແຂວງ ແລະ ຂັ້ນເມືອງເຂົ້າຮ່ວມ.

ທ່ານ ສຸວັນ ສ້ອຍທະວົງສາ ຫົວໜ້າຫ້ອງການ-ການເງິນເມືອງທ່າແຕງກ່າວວ່າ: ການເປີດຂະບວນການເດີນສໍາຫຼວດຄັ້ງນີ້ ໂດຍລວມປະຕິບັດຕາມດໍາລັດເລກທີ 25/ລບ,ລົງວັນທີ 16 ມັງກອນ 2017 ວ່າດ້ວຍການຈັດແບ່ງຂະໜາດວິສາຫະກິດຂະໜາດນ້ອຍ ແລະ ກາງ ເພື່ອຮັບປະ ກັນໃຫ້ແກ່ການຈັດຕັ້ງປະຕິບັດການກໍານົດເງື່ອນໄຂການຈັດແບ່ງປະເພດຂອງວິສາຫະກິດໃຫ້ເປັນເອກະພາບໃນຂອບເຂດທົ່ວເມືອງທ່າແຕງ ແລະ ສ້າງຄວາມສະດວກໃນການຄຸ້ມຄອງ,ກວດກາ,ຕິດຕາມ ການເກັບລາຍຮັບຂອງສ່ວຍສາອາກອນ,ພ້ອມທັງຊຸກຍູ້ຫົວໜ່ວຍວິສາຫະກິດ ເຂົ້າສູ່ລະບົບອາກອນມູນຄ່າເພີ່ມ ໂດຍສອດຄ່ອງຕາມແນວທາງນະໂຍບາຍຂອງພັກ ແລະລັດຖະບານ ກໍຄື ກະຊວງການເງິນວາງອອກ.

ບົນພື້ນຖານຖືກຕ້ອງຕາມກົດໝາຍ ແລະ ລະບຽບການໄດ້ກໍານົດ,ຫລຸດຜ່ອນຊ່ອງຫວ່າງການສວຍໂອກາດຕ່າງໆ ແລະຫັນເຂົ້າສູ່ການປະຕິບັດລະບຽບກົດຫມາຍໃຫ້ຫຼາຍຂຶ້ນ. ຄຽງຄູ່ກັນນັ້ນ ຍັງເປັນການປຸກລະດົມ ພ້ອມທັງສ້າງຄວາມເຂົ້າໃຈໃຫ້ແຕ່ລະພາກສ່ວນໂດຍສະເພາະຂະແໜງສ່ວຍສາອາກອນ,ຂະແໜງການທີ່ກ່ຽວຂ້ອງ,ອົງການປົກຄອງທ້ອງຖິ່ນ ຕະ ຫຼອດຮອດຫົວໜ່ວຍວິສາຫະກິດ,ໃຫ້ຮັບຮູ້ການຫັນເປັນທັນສະໄໝໃນການແຈ້ງມອບພັນທະອາ ກອນ ແລະ ພັນທະອື່ນໆ ຜ່ານລະບົບທະນາ
ຄານດ້ວຍຕົນເອງໃຫ້ຫຼາຍຂຶ້ນ ເພື່ອຫຼຸດຜ່ອນການຊໍາລະເປັນເງິນສົດ ແນໃສ່ເຮັດໃຫ້ການຈັດເກັບລາຍຮັບໃນ 3 ເດືອນທ້າຍປີນີ້ 2021 ນີ້ໃຫ້ບັນລຸຕາມແຜນການ.

ຈາກນັ້ນເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄໍາເຫັນຢ່າງມີພາວະວິໄສ ເພື່ອເຮັດໃຫ້ຂະບວນການເດີນສຳຫຼວດ ແລະ ກຳນົດເງື່ອນໄຂການຈັດແບ່ງປະເພດຂອງວິສາຫະກິດທົ່ວເມືອງທ່າແຕງສໍາເລັດໃນໄວໆນີ້.
ຂ່າວ-ພາບ: ພອນ ບຸນອຸທິດ