ມີເດຍລາວແຂວງເຊກອງ
ວັນທີ 05 ຕຸລາ 2021 ຜ່ານນີ້, ທີ່ສະໂມສອນຫ້ອງວ່າການເມືອງ ທ່າແຕງ ໄດ້ມີກອງຮ່ວມລະຫວ່າງ ສະພາປະຊາຊົນແຂວງ (ສພຂ) ກັບພະແນກການທີ່ກ່ຽວຂ້ອງ ແລະ ອໍານາດການປົກຄອງເມືອງ ກ່ຽວກັບການຕິດຕາມກວດກາຫານປະຕິບັດກົດໝາຍການຄຸ້ມຄອງທີ່ດິນ, ການປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ການຄຸ້ມຄອງແຮງງານ ຢູ່ເມືອງ ທ່າແຕງ.

ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ດົງເພັດ ພະຍົນ ຮອງເລຂາພັກແຂວງ, ປະທານ ສພຂ, ທ່ານ ປອ ແພງສີ ສີລາວີ ຄະນະປະຈໍາພັກແຂວງ, ຮອງປະທານ ສພຂ, ທ່ານ ສົມເພັດ ເອິດລັດດາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ທ່າແຕງ, ເຂົ້າຮ່ວມມີບັນດາທ່ານ ຄະນະປະຈໍາ ສພຂ, ຄະນະກໍາມະການ 03 ກໍາມະການ, ບັນດາພະແນກການ, ອໍານາດການປົກຄອງເມືອງ, ບັນດາບໍລິສັດ, ອໍານາດການປົກຄອງບ້ານ ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມໄດ້ຮັບຟັງການລາຍງານຜົນການຕິດຕາມກວດກາຕົວຈິງຢູ່ພາກສະໜາມໃນວັນທີ 04 ຕຸລາທີ່ຜ່ານມາ ໂດຍໄດ້ແບ່ງອອກເປັນ 03 ຈຸ; ຜ່ານການຕິດຕາມກວດກາເຫັນໄດ້ສະພາບທີ່ພົ້ນເດັ່ນ ໂດຍສະເພາະກ່ຽວກັບການເຊົ່າສໍາປະທານທີ່ດິນ ບາງໂຄງການຍັງບໍ່ທັນສອດຄ່ອງກັບລະບຽບກົດໝາຍ ເປັນຕົ້ນໂຄງການປູກຢາງພາລາຂອງບໍລິດສັດ ຢູ່ເຂດບ້ານແສນ ເຊິ່ງປູກມາເປັນ 10 ກວ່າປີ ບໍ່ໄດ້ຮັບການປົກປັກຮັກສາ ແລະ ບໍ່ປະຕິບັດຕາມບົດບັນທຶກໃນເບືອງຕົ້ນ, ການພັດທະນາໂຄງການບາງບາງບໍລິສັດແມ່ນເກີນເນື້ອທີ່ສໍາປະທານ ແລະ ມີປະຊາຊົນຈໍານວນໜຶ່ງບຸກລຸກເຂດສໍາປະທານຂອງບໍລິສັດ, ການເຊົ່າສໍາປະທານເນື້ອທີ່ດິນຂອງບໍລິສັດບາງບໍລິສັດ, ສໍາລັບການປົກປັກຮັກສາດ້ານຊັບພະຍາກອນທໍາມະຊາດ ແລະ ສິ່ງແວດລ້ອມ ເຫັນວ່າພໍ່ແມ່ປະຊາຊົນຫຼາຍໆໝູ່ບ້ານ ແລະ ພະນັກງານລັດຈໍານວນໜຶ່ງ ໄດ້ບຸກລຸກເນື້ອທີ່ຫວງຫ້າມປ່າສະຫງວນ ແລະ ປ່າປ້ອງກັນ ໃນເນື້ອທີ່ 243 ເຮັກຕາ ຢູ່ເຂດບ້ານ ຍົກທົ່ງ ແລະ ບ້ານຫົວເຊໂດນ ເພື່ອທໍາການຜະລິດ ປູກມັນຕົ້ນ, ປູກກາເຟ ແລະ ເຮັດນາ, ກ່ຽວກັບການຄຸ້ມຄອງແຮງງານຂອງບໍລິສັດແມ່ນຍັງບໍ່ທັນສອດຄ່ອງກັບລະບຽບກົດໝາຍ ໂດຍສະເພາະຜູ້ໃຊ້ແຮງງານຍັງບໍ່ໄດ້ຮັບດ້ານປະກັນສັງຄົມ, ມີການໂກງຄ່າແຮງງານ ແລະ ອື່ນໆ.

ພ້ອມນີ້, ກອງປະຊຸມຍັງໄດ້ມີການປຶກສາຫາລື, ແລກປ່ຽນປະກອບຄໍາຄິດຄໍາເຫັນຢ່າງມີຈຸດສຸມ ກ່ຽວກັບບັນດາຂໍ້ມູນດັ່ງກ່າວ ເພື່ອພ້ອມກັນນໍາໄປຈັດຕັ້ງປະຕິບັດ ແລະ ແກ້ໄຂ ໃຫ້ມີຄວາມຖືກຕ້ອງສອດຄ່ອງກັບລະບຽບກົດໝາຍ ແລະ ນິຕິກໍາລຸ່ມກົດໝາຍ.
ຂ່າວ:ນາລີວັນ