ມີເດຍລາວແຂວງຫຼວງນຳ້ທາ ວັນທີ 8 ຕຸລາ 2021 ຢູ່ທີ່ໂຮງຮຽນທິດສະດີການເມືອງ – ການປົກຄອງແຂວງຫຼວງນໍ້າທາໄດ້ຈັດຊຸດຝຶກອົບຮົມທິດສະດີການເເມືອງ ແລະ ການປົກຄອງໃຫ້ແກ່ເລຂາຄະນະພັກບ້ານ,ນາຍບ້ານໄລຍະ 10 ວັນຊຸດທີ 6 ໂດຍການເປັນປະທານຂອງທ່ານ ສິງໄຊ ວັນຄຳ ກຳມະການພັກແຂວງ ຜູ້ອໍານວຍການໂຮງຮຽນທິດສະດີການເມືອງ- ການປົກຄອງແຂວງ,ເຂົ້າຮ່ວມໂດຍທ່ານ ສີວິໄລ ປັນແກ້ວ ກຳມະການປະຈຳພັກແຂວງ ປະທານກວດກາພັກ – ອົງການກວດກາລັດແຂວງ ຜູ່ຊີ້ນຳໂຮງຮຽນທິດສະດີການເມືອງ – ການປົກຄອງແຂວງ,ທ່ານ ຄຳຫຼ້າ ແຫຼ່ງໄຊຍະທຳ ຮອງເລຂາພັກເມືອງ ຮອງເຈົ້າເມືອງໆຫຼວງນ້ຳທາ ຜູ້ຊີ້ນຳພັກ – ພະນັກງານ,ມີຂະແໜງການກ່ຽວຂ້ອງ,ວິທະຍາກອນ ແລະ ສຳມະນາກອນຈາກ 35 ບ້ານຂອງເມືອງຫຼວງນ້ຳທາເຂົ້າຮ່ວມ.

ຊຸດຝຶກອົບຮົມທິດສະດີການເມືອງ-ການປົກຄອງຄັ້ງນີ້ ຈະໄດ້ຈັດຕັ້ງປະຕິບັດການຮຽນ -ການສອນທັງໝົດ 87 ຊົ່ວໂມງ.ໃນນັ້ນ, ຊົ່ວໂມງຂຶ້ນຫ້ອງຟັງບັນລະຍາຍຕົວຈິງ 64 ຊົ່ວໂມງ, ຄົ້ນຄວ້າສຳມະນາ ແລະ ແກ້ຂໍ້ຂ້ອງໃຈ 11 ຊົ່ວໂມງ, ກວດກາປະເມີນຜົນ 12 ຊົ່ວໂມງ, ລວມມີ 3 ກຸ່ມວິຊາຄື: ກຸ່ມວິຊາທິດທາງລວມມີ 4 ບົດ; ກຸ່ມວິຊາວຽກງານພັກມີ 7 ບົດ ແລະ ກຸ່ມວິຊາວຽກງານບໍລິຫານ ແລະການປົກຄອງມີ 8 ບົດ,ຈາກນັ້ນຍັງຈະໄດ້ເຄື່ອນໄຫວກິດຈະກໍາອື່ນໆ ອີກກໍານົດເວລາຮຽນທັງໝົດ 10 ວັນ,ແຕ່ວັນທີ 8 ຫາ 18 ຕຸລາ 2021 ພາຍຫຼັງນັກຝຶກອົບຮົມສໍາເລັດການຮຽນຈົບຫຼັກສູດ ແມ່ນຈະໄດ້ມີການປະເມີນຄວາມຮັບຮູ້ຂອງສຳມະນາກອນ ຊຸກຍູ້ໃຫ້ນັກຝຶກອົບຮົມມີສ່ວນຮ່ວມໃນການແລກປ່ຽນບົດຮຽນ ສາມາດນຳໃຊ້ພື້ນຖານຫຼັກມູນທິດສະດີເຂົ້າໃນພຶດຕິກຳຕົວຈິງໃຫ້ບັນລຸໄດ້ 90% ຂຶ້ນໄປ,

ທັງນີ້ກໍ່ເພື່ອສ້າງໃຫ້ຄະນະພັກຮາກຖານຂັ້ນບ້ານ, ອົງການຈັດຕັ້ງມະຫາຊົນຮາກຖານໃຫ້ມີລະດັບຄວາມຮູ້ພື້ນຖານທາງດ້ານທິດສະດີການເມືອງ-ການປົກຄອງ, ແນວທາງນະໂຍບາຍຂອງພັກ, ການຄຸ້ມຄອງ ຂອງລັດ, ເຊື່ອໝັ້ນຕໍ່ການພາ ຂອງພັກ, ເຊື່ອໝັ້ນຕໍ່ອຸດົມການກໍ່ຄືພາລະກິດປ່ຽນແປງໃໝ່ຢ່າງມີຫຼັກການຂອງພັກ, ມີຄວາມຈົງຮັກພັກດີຕໍ່ປະເທດຊາດ, ມີຄວາມຫ້າວຫັນເປັນແບບຢ່າງໃນທຸກວຽກງານ, ເຮັດໃຫ້ການປະຕິບັດໜ້າທີ່ວຽກງານນັບມື້ນັບມີຄຸນນະພາບສູງຂຶ້ນ. ສ້າງໃຫ້ຖັນແຖວພະນັກງານຂັ້ນບ້ານໃຫ້ມີຫຼັກໝັ້ນການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີວິໄສທັດ ແລະວິທີເຮັດວຽກແບບວິທະຍາສາດ, ມີຄວາມສາມາດວາງແຜນຍຸດທະສາດ ແລະ ການຈັດຕັ້ງປະຕິບັດແນວທາງຂອງພັກ-ນະໂຍບາຍຂອງລັດ, ມີແບບແຜນກໍ່ສ້າງຊີວິດທີ່ປອດໃສຂາວສະອາດ.
ຂ່າວ: ນ. ອຸ້ມ ສົມນໍວັນ