ມີເດຍລາວແຂວງບໍ່ແກ້ວ
ວັນທີ 13 ຕຸລາ 2021ນີ້ ທ່ານ ທີບພະກອນ ມະນີຄໍາ ຮອງເຈົ້າເມືອງຫ້ວຍຊາຍ ແຂວງບໍ່ແກ້ວ ຜູ້ຊີ້ນໍາຂົງເຂດເສດຖະກິດ ແລະ ພະນັກງານຫ້ອງການກະສິກໍາ-ປ່າໄມ້ເມືອງ ໄດ້ລົງຊຸກຍູ້ການເກັບກ່ຽວມ້ຽນມັດເຂົ້ານາປີຂອງປາຊາຊົນຢູ່ເຂດທົ່ວພ້າວຫ້າວ ເຊິ່ງເປັນບໍລິເວນອູເຂົ້າ-ອູປາຂອງເມືອງຫ້ວຍຊາຍ ກວມເອົາທັງໝົດ 16 ບ້ານ, ມີ 3 ກຸ່ມ ແລະ 01 ບ້ານໃຫຍ່ພັດທະນານໍ້າປຸກ.

ໂອກາດໄປເຖິງທ່ານ ແລະ ທີມງານກໍ່ໄດ້ພົບກັບຊາວກະສິກອນຫຼາຍຄອບຄົວຢູ່ບ້ານດ່ານຖິ່ນທີ່ກໍາລັງເກັບກ່ຽວເຂົ້ານາດ້ວຍແຮງງານຄົນ ແລະ ໃຊ້ກົງຈັກກ່ຽວຢ່າງເປັນຂະບວນ. ໂດຍສະເພາະຊາວກະສິກອນທີ່ປູກເຂົ້ານາດໍ ເພື່ອໃຫ້ທວງທັນກັບສະພາບອາກາດ, ປ້ອງກັນຝົນຕົກຮໍາຮວງເຂົ້າ ແລະ ສັດຕູພືດທໍາລາຍ. ມາຮອດປະຈຸບັນບໍລິເວນດັ່ງກ່າວສາມາດເກັບກ່ຽວເຂົ້າສໍາເລັດແລ້ວປະມານ 15% ຂອງເນື້ອທີ່ນາທັງໝົດ. ຈາກນັ້ນ ກໍ່ໄດ້ເດີນທາງໄປເບິ່ງສວນໝາກແຕງ, ໝາກໜອຍ, ໝາກຖົ່ວຍາວ ແລະ ພືດຜັກຕ່າງໆຜະລິດເປັນສິນຄ້າຂອງຄອບຄົວ ທ້າວ ນ້ອຍຄິດ ວົງສະຫວັນ ຢູ່ບ້ານ ນໍ້າປຸກ ເຊິ່ງໄດ້ເລີ່ມປູກມາແຕ່ປີ 2019 ໃນເນື້ອທີ່ 2 ໄລ່ ປູກມູນວຽນຕະຫຼອດລະດູ, ປີໜຶ່ງສາມາດເກັບຜົນຜະລິດຂາຍໄດ້ 4 ຊຸດ, ສ້າງລາຍຮັບຈາກການຂາຍເຂົ້ານາ ແລະ ຜະລິດພືດຜັກ, ໝາກແຕງໄດ້ປະມານ 70-80 ລ້ານ/ປີ.

ທ່ານຮອງເຈົ້າເມືອງໃຫ້ສໍາພາດວ່າ: ນອກຈາກການຊຸກຍູ້ການປູກເຂົ້າ ແລະ ເກັບກ່ຽວເຂົ້ານາປີແລ້ວທາງເມືອງຍັງໄດ້ຊຸກຍູ້ການປູກພຶດເປັນສິນຄ້າຕື່ມ. ໄດ້ຈັດເປັນກຸ່ມ ແລະ ບາງເຂດ, ບາງຄອບຄົວ ເພື່ອຜະລິດເປັນສິນຄ້າສົ່ງຂາຍຕາມຕະຫຼາດ ແນໃສ່ຢຸດຕິການນໍາເຂົ້າຈາກຕ່າງປະເທດ, ຕ່າງແຂວງ, ຕ່າງເມືອງ ມາຮັບໃຊ້ຊາວເມືອງຫ້ວຍຊາຍໃຫ້ພຽງພໍຕໍ່ການອຸປະໂພກ-ບໍລິໂພກ. ພາຍຫລັງເກັບກ່ຽວເຂົ້າໄຮ່, ເຂົ້ານາປີແລ້ວທາງເມືອງຈະໄດ້ສົມທົບກັບຂະແໜງການຄ້າຄຸ້ມຄອງຕິດຕາມລາຄາ ແລະ ກວດກາການຕິດຕາມກວດການຊື້ ຫຼື ການຂາຍເຂົ້າໃຫ້ເຂັ້ມງວດ ເພື່ອໃຫ້ເມືອງຫ້ວຍຊາຍມີເຂົ້າກຸ້ມກິນຕະປີ ແລະ ໄດ້ຮຽກຮ້ອງໃຫ້ພໍ່ແມ່ປະຊາຊົນຫັນມາເພິ່ງຕົນເອງສ້າງຄວາມເຂັ້ມແຂງດ້ວຍການປູກ-ການລ້ຽງ, ຫລຸດຜ່ອນການນໍາເຂົ້າກິນຕະຫຼອດ ແລະ ໃຊ້ຈ່າຍປະຈໍາວັນໃຫ້ໜ້ອຍລົງ.

ໃນວັນດຽວກັນ ທ່ານ ທີບພະກອນ ມະນີຄໍາ ຮອງເຈົ້າເມືອງ ແລະ ທີມງານ ຍັງໄດ້ເດີນທາງໄປຢ້ຽມຢາມການປູກພືດ – ລ້ຽງສັດຂອງຄອບຄົວ ລຸງວົງຄໍາ ແສງຄໍາທອງ ກັບ ປ້າ ຄໍາຫຼ້າ ທອງສະບາ ນັກທຸລະກິດຮັບເໝົາກໍ່ສ້າງ – ຂົວທາງ ຫັນວິຖີຊີວິດມາປູກຝັງ ແລະ ລ້ຽງສັດຢູ່ບ້ານ ແລັງ ບໍລິເວນອ່າງນໍ້າຕີນ ເມືອງຫ້ວຍຊາຍດ້ວຍເນື້ອທີ່ 5 ເຮັກຕາ ໄດ້ເລີ່ມບຸກເບີກມາແຕ່ປີ 2018 ເຊິ່ງໄດ້ແຍກປູກພືດຜັກໃຫ້ໝາກ, ຕົ້ນພ້າວ, ຫວາຍຂົມ ລວມ 34 ຊະນິດ, ຂຸດໜອງລ້ຽງປາ 2 ໜອງ, ມີຟາມລ້ຽງງົວ, ແບ້ ແລະ ສັດປີກ.
ປ້າຄໍາຫຼ້າ ທອງສະບາ ໃຫ້ສໍາພາດເພິ້ມວ່າ: ໃນອານາຄົດສວນແຫ່ງນີ້ຈະສ້າງເປັນແຫຼ່ງທ່ອງທ່ຽວເປັນຈຸພັກຜອນ ແລະ ສວນສາທິດກ່ຽວກັບການປູກຝັງປະສົມປະສານ ແລະ ການລ້ຽງສັດ ເພື່ອໃຫ້ພໍ່ແມ່ປະຊາຊົນຢູ່ພາຍໃນ ແລະ ຕ່າງແຂວງມາທັດສະນະຖອດຖອນບົດຮຽນຕື່ມອີກ.
ພາບ – ຂ່າວ: ຄຳພັນ ແກ້ວມະນີ