ມີເດຍລາວແຂວງຜົ້ງສາລີ
ເພື່ອຜັນຂະຫຍາຍເນື້ອໃນບົດບັນທຶກກອງປະຊຸມປຶກສາຫາລື ລະຫວ່າງ ອົງການປົກຄອງແຂວງຜົ້ງສາລີ ແຫ່ງ ສປປ ລາວ ກັບ ອົງການປົກຄອງນະຄອນພູເອີ ແຂວງຢຸນນານ ແຫ່ງ ສປ ຈີນ ໃນຄັ້ງວັນທີ 01 ກັນຍາ 2021 ໃຫ້ປະກົດຜົນເປັນຈິງ ແລະ ເພື່ອເປັນການສືບຕໍ່ປະຕິບັດວຽກງານສະກັດກັ້ນ, ປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ຢູ່ລຽບຕາມຊາຍແດນລາວ-ຈີນ, ເຊິ່ງປັດຈຸບັນ ເຈົ້າໜ້າທີ່ປະຈຳດ່ານສາກົນບໍ່ຫານ ສປ ຈີນ ໄດ້ກວດພົບມີກໍລະນີຜູ້ຕິດເຊື້ອພະຍາດໂຄວິດ-19 ຈຶ່ງຈຳເປັນຕ້ອງໄດ້ມີປິດການເຂົ້າ-ອອກ ລະຫວ່າງ ດ່ານສາກົນ ບໍ່ເຕນ ສປປ ລາວ ແລະ ດ່ານສາກົນບໍ່ຫານ ສປ ຈີນ ຊົ່ວຄາວ.

ຊຶ່ງອາດມີຜົນກະທົບຕໍ່ການເດີນທາງເຂົ້າ-ອອກ ແລະ ການຂົນສົ່ງສິນຄ້າ ລະຫວ່າງ ດ່ານສາກົນລານຕຸ້ຍ ແຂວງຜົ້ງສາລີ ກັບ ດ່ານເມືອງຄຳ ເມືອງຈຽງເຊິນ. ສະນັ້ນ, ເພື່ອກະກຽມຄວາມພ້ອມໃນການປ້ອງກັນ ແລະ ສະກັດກັນການແຜ່ລະບາດ ຂອງພະຍາດໂຄວິດ-19 ຕາມລຽບຊາຍແດນໂດຍສະເພາະແມ່ນວຽກງານຄຸ້ມຄອງການນໍາເຂົ້າ-ສົ່ງອອກສິນຄ້າ, ພາຫະ ແລະ ພົນລະເມືອງ ທີ່ຈະເດີນທາງເຂົ້າ-ອອກຜ່ານດ່ານເຂດການຄຸ້ມຄອງ ແລະ ຮັບຜິດຊອບຂອງສອງຝ່າຍ ໃຫ້ໄດ້ຮັບຜົນດີ ນັ້ນ, ໃນວັນທີ 14 ຕຸລາ 2021 ຢູ່ທີຊາຍແດນລາວ – ຈີນ ຫຼັກໝາຍທີ 7 ໄດ້ຈັດໃຫ້ມີ ກອງປະຊຸມພົບປະປຶກສາຫາລືວຽກງງານປ້ອງກັນພະຍາດໂຄວິດ -19 ລະຫວ່າງ ແຂວງຜົ້ງສາລີ ແຫ່ງ ສປປ ລາວ ກັບ ເມືອງຈຽງເຊີນ ນະຄອນພູເອີ ແຫ່ງ ສປ ຈີນ ຂື້ນຢ່າງເປັນທາງການ. ເຊີ່ງຝ່າຍແຂວງຜົ້ງສາລີ ນຳໂດຍທ່ານ ຄຳເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂັ້ນແຂວງ ພ້ອມດ້ວຍຄະນະ ແລະ ຝ່າຍນະຄອນພູເອີ ແຫ່ງ ສປ ຈີນ ນຳໂດຍ ທ່ານ ຫຼົງ ເຕີ ເຊິງ ຮອງເລຂາພັກເມືອງ, ເຈົ້າເມືອງໆຈຽງເຊິນ ພ້ອມດ້ວຍຄະນະ.

ໃນກອງປະຊຸມສອງຝ່າຍໄດ້ດໍາເນີນດ້ວຍບັນຍາກາດສະເຫມີພາບ, ມິດຕະພາບ ແລະ ເຊື່ອຫມັ້ນເຊິ່ງກັນ ແລະ ກັນ, ໂດຍປິ່ນອ້ອມວຽກງານປ້ອງກັນ ແລະ ຄວບຄຸມການແຜ່ລະບາດ ຂອງພະຍາດໂດວິດ-19 ລຽບຕາມຊາຍແດນສອງຝ່າຍ, ພ້ອມທັງເອກະພາບທິດທາງການຮ່ວມມືໃນຕໍ່ຫນ້າຮ່ວມກັນ ເປັນຕົ້ນແມ່ນ ເມື່ອດ່ານສາກົນບໍ່ຫານ ເປິດໃຫ້ບໍລິການນຳເຂົ້າ-ສົ່ງອອກ ສິນຄ້າ, ພາຫະນະ ແລະ ຄົນ, ສອງຝ່າຍເຫັນດີເປັນເອກະພາບເມື່ອມີພົນລະເມືອງຈີນ ສະເໜີເດີນທາງເຂົ້າໄປ ສປ ຈີນ ຕ້ອງໄດ້ປະຕິບັດມາດຕະການກວດຫາເຊື້ອຈາກ 07 ວັນຕໍ່ 03 ຄັ້ງມາເປັນ 14 ວັນຕໍ່ 05 ຄັ້ງ.

ຜູ້ທີ່ສະເໜີເຂົ້າເມືອງຂອງພົນລະເມືອງຈີນ ຕ້ອງແມ່ນຜູ້ທີ່ອອກຜ່ານດ່ານເມືອງຄໍາ – ດ່ານລານຕຸ້ຍ ເທົ່ານັ້ນ ທີ່ສາມາດສະເໜີໄດ້ (ບວກຄົນລັກລອບເຂົ້າເມືອງຜິດກົດໝາຍອີກດ້ວຍ), ເງື່ອນໄຂການສະເໜີເດີນທາງເຂົ້າ ສປ ຈີນ ແມ່ນຕ້ອງມີໃບກວດຫາເຊື້ອພະຍາດໂຄວິດ-19 ຄົບ 05 ຄັ້ງ, ສອງຝ່າຍເຫັນດີ ໃຫ້ອົງການປົກຄອງແຂວງຜົ້ງສາລີ ສົມທົບກັບ ບໍລິການສາງຝາກສິນຄ້າ, ຄ່ຽນຖ່າຍສິນຄ້າ ແລະ ທ່ອງທ່ຽວຄົບວົງຈອນ ຈຳກັດຜູ້ດຽວ ແຕ່ງຕັ້ງພະນັກງານຂອງແຂວງ ມາປະຈໍາຢູ່ສະຖານທີ່ດັ່ງກ່າວ ເພື່ອຊ່ວຍໃນການຕິດຕາມ, ຄຸ້ມຄອງ ແລະ ປະຕິບັດການຊີດຢາຂ້າເຊື້ອ ໃຫ້ລົດຂົນສົ່ງສິນຄ້າທີ່ເຂົ້າມາບໍລິການ ພ້ອມທັງເກັບຕົວຢ່າງໂຊເຝີລົດ ໄປວິເຄາະຫາເຊື້ອໂຄວິດ-19 ຢູ່ທີ່ສູນວິເຄາະເມືອງຍອດອູ, ເມື່ອຜົນກວດເປັນລົບ ຈຶ່ງອະນຸຍາດໃຫ້ເດີນທາງໄດ້, ສ່ວນການຄຸ້ມຄອງການເຂົ້າອອກສິນຄ້າ ແລະ ໂຊເຟີລົດ ຕ້ອງໄດ້ກໍານົດວ່າ: ສິນຄ້າທີ່ຈະສົ່ງຮອດດ່ານຕ້ອງຜ່ານການຊີດຢາຂ້າເຊື້ອ ຢູ່ຈຸດສະຖານທີ່ຄ່ຽນຖ່າຍສິນຄ້າ ຂອງບໍລິສັດຕົງກອ່ນ, ສໍາລັບໂຊເຟີລົດ ເມື່ອຂັບລົດໄປຮອດດ່ານແລ້ວ ຕ້ອງປະສານຫາໂຊເຟີລົດເບື້ອງຈີນ ມາຂັບປ່ຽນເຂົ້າໄປ ສປ ຈີນ ແລະ ສິນຄ້າຈາກ ສປ ຈີນ ຈະນຳເຂົ້າ ສປປ ລາວ ກໍ່ໃຫ້ມີການຊີດຢາຂ້າເຊື້ອຈາກເບື້ອງຈີນ, ໂຊເຟີຕ້ອງຂັບລົດໄປຮອດດ່ານ ແລະ ແຈ້ງໃຫ້ໂຊເຝີລົດເບື້ອງລາວມາຂັບເຂົ້າໄປ ສປປ ລາວ, ສອງຝ່າຍເຫັນດີ ຈັດພິທີມອບ-ຮັບສູນວິເຄາະເຊື້ອພະຍາດໂຄວິດ-19 ທີ່ໄດ້ຮັບການຊ່ວຍເຫຼືອຈາກອົງການປົກຄອງເມືອງຈຽງເຊິນ ຢູ່ເມືອງຍອດອູ ໃຫ້ແກ່ອົງການປົກຄອງແຂວງຜົ້ງສາລີ ເປີດນຳໃຊ້ຢ່າງເປັນທາງການ ໃນທ້າຍເດືອນຕຸລາ,

ສ່ວນການເກັບຄ່າວິເຄາະຫາເຊື້ອພະຍາດໂຄວິດ-19 ແມ່ນອີງໃສການກຳນົດຂອງຝ່າຍລາວ, ສໍາລັບອຸປະກອນ ແລະ ຢາຈໍາເປັນທີ່ຈະນໍາໃຊ້ເຂົ້າການວິເຄາະຫາເຊື້ອພະຍາດໂຄວິດ-19 ແມ່ນເມືອງຈຽງເຊິນ ຈະເປັນຜູ້ຊ່ວຍສັ່ງຊື້ ແລະ ມາສົ່ງເຖິງຫຼັກໝາຍຊາຍແດນ 07, ສ່ວນຄ່າໃຊ້ຈ່າຍແມ່ນໃຫ້ແຂວງຜົ້ງສາລີ ເປັນຜູ້ຮັບຜິດຊອບຄ່າໃຊ້ຈ່າຍເອງ, ແຂວງຜົ້ງສາລີ ເຫັນດີຮັບເອົາຢາວັກຊິນປ້ອງກັນພະຍາດໂຄວິດ-19 ຈຳນວນ 1 ແສນໂດສ໌ ທີ່ ແຂວງຢຸນນານ ສປ ຈີນ ຈະຊ່ວຍເຫຼືອ ເພື່ອສັກໃຫ້ແກ່ປະຊາຊົນ ຢູ່ 3 ເມືອງເປົ້າໝາຍ ຂອງແຂວງຜົ້ງສາລີ ຄື: ເມືອງຍອດອູ, ເມືອງບຸນເໜືອ ແລະ ເມືອງບຸນໃຕ້ ແລະ ສອງຝ່າຍເຫັນດີໃຫ້ວິຊາການການແພດ ເມືອງຈຽງເຊິນ ເດີນທາງເຂົ້າມາສົມທົບກັບ ວິຊາການການແພດ ຝ່າຍຜົ້ງສາລີ ລົງເຄື່ອນໄຫວສັກຢາວັກຊິນໃຫ້ແກ່ພົນລະເມືອງຢູ່ແຂວງຜົ້ງສາລີ, ແຂວງຜົ້ງສາລີ ສືບຕໍ່ໃຫ້ການສະໜັບສະໜູນ ໃນການກໍ່ສ້າງຮົ້ວອ້ອມລຽບຕາມເສັ້ນຊາຍແດນ ລາວ-ຈີນ ຂອງອົງການປົກຄອງເມືອງຈຽງເຊິນ ສປ ຈີນ, ທັງສອງຝ່າຍ ເຫັນດີໃນການສຶກສາອົບຮົມ ໃຫ້ປະຊາຊົນທີ່ອາໄສຢູ່ລຽບຕາມຊາຍແດນສອງປະເທດ ເຂົ້າໃຈເຖິງຄວາມໝາຍ, ຄວາມສຳຄັນ ໃນການສ້າງຮົ້ວອ້ອມ, ຖ້າຫາກມີປະກົດການທຳລາຍ ຫຼື ລັກລອບເອົາອຸປະກອນກໍ່ສ້າງ ແມ່ນໃຫ້ເຈົ້າໜ້າທີ່ກ່ຽວຂ້ອງແຈ້ງໃຫ້ກັນຊາບ ເພື່ອສຶກສາອົບຮົມ. ສະນັ້ນ, ເພື່ອເຮັດໃຫ້ ການເພີ່ມທະວີການສະກັດກັ້ນການລັກລອບເຂົ້າເມືອງຜິດກົດໝາຍ ເຈົ້າໜ້າທີ່ກ່ຽວຂ້ອງຂອງສອງຝ່າຍ ຕ້ອງໄດ້ເອົາໃຈໃສ່ໃນການຕິດຕາມກວດກາ ຖ້າຫາກພົບເຫັນ ຫຼື ຈັບໄດ້ ແມ່ນໃຫ້ລາຍງານໃຫ້ທັນການ ແລະ ຮັບປະກັນ ໃນການປະສານມອບ-ຮັບ ໃຫ້ຖືກຕ້ອງຕາມກົນໄກຂອງສອງຝ່າຍ.

ໃນຕອນທ້າຍຂອງພິທີ ທັງສອງຝ່າຍຍັງໄດ້ ລົງນາມເຊັນບົດບັນທືກຮ່ວມກັນລະຫ່ວາງແຂວງຜົ້ງສາລີ ແຫ່ງ ສປປ ລາວ ກັບ ເມືອງຈຽງເຊີນ ນະຄອນພູເອີ ແຂວງຢຸນນານ ແຫ່ງ ສປ ຈີນ ໂດຍຕ່າງໜ້າຝ່າຍແຂວງຜົ້ງສາລີ ເຊັນໂດຍ ທ່ານ ຄຳເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂັ້ນແຂວງ ແລະ ຕ່າງໜ້າຝ່າຍຈີນ ເຊັນ ທ່ານ ຫຼົງເຕີເຊິງ ຮອງເລຂາພັກເມືອງ, ເຈົ້າເມືອງເມືອງຈຽງເຊິນ ໂດຍຊ່ອງໜ້າຈາກພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຄີພິຍານ.
( ພາບ – ຂ່າວ: ແສງຄຳ ສາລີວັນ )