ມີເດຍລາວແຂວງເຊກອງ ພິທີມອບ-ຮັບໃບຍ້ອງຍໍໃຫ້ແກ່ພະນັກງານກອງບັນຊາການປ້ອງກັນຄວາມສະຫງົບ (ປກສ) ເມືອງ ແລະພະນັກງານຫ້ອງການປະສານງານໂຄງການເກັບກູລະເບີດ (ຄກລ) ປະຈໍາແຂວງເຊກອງໄດ້ຈັດຂຶ້ນໃນວັນທີ 15 ຕຸລານີ້ ທີ່ສະໂມ ສອນເມືອງລະມາມ ໂດຍມີທ່ານ ວົງເດືອນ ຈັນທະບຸດຊຽງ ເຈົ້າເມືອງລະມາມ, ທ່ານ ສົມດີ ເດີນຈົງຮຽງ ຫົວໜ້າຫ້ອງ ການ ຄກລ ແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ທ່ານ ວິຊຽນ ນ້ອຍມະໄລພັນ ຮອງຫົວໜ້າຫ້ອງການ ຄກລ ແຂວງ ໄດ້ຜ່ານບົດລາຍງານໂດຍຫຍໍ້ກ່ຽວກັບການເຄື່ອນໄຫວການແກ້ໄຂ ແລະທໍາລາຍລະເບີດລູກບົມ 500 ປອນຢູ່ບ້ານນາວາເມືອງລະມາມ. ຫຼັງຈາກນັ້ນ ທ່ານ ວິໄລທອງ ສຸວັນນະສານ ຮອງຫົວໜ້າຫ້ອງການພາຍໃນເມືອງ ກໍໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງລະມາມ ວ່າດ້ວຍການມອບໃບຍ້ອງຍໍໃຫ້ແກ່ກໍາລັງ ປກສ ເມືອງ ແລະພະນັກງານ ຄກລ ແຂວງທີ່ມີຜົນງານດີເດັ່ນປະກອບສ່ວນເຂົ້າໃນວຽກງານແກ້ໄຂ ແລະທໍາລາຍລະເບີດລູກບົມ 500 ປອນ ຢູ່ບ້ານນາວາ ເຊິ່ງລວມທັງໝົດ 27 ຄົນ ໃນນີ້ກໍາລັງ ປກສ ເມືອງ 10 ຄົນ ແລະ ພະນັກງານ ຄກລ ແຂວງ 17 ຄົນ.

ໃນໂອກາດນີ້ ທ່ານ ວົງເດືອນ ຈັນທະບຸດຊຽງ ໄດ້ມີຄໍາເຫັນໂອ້ລົມ ໂດຍໄດ້ຍ້ອງຍໍຊົມເຊີຍຕໍ່ພະນັກງານກໍາລັງ ປກສ ເມືອງ ແລະ ພະນັກງານ ຄກລ ແຂວງ ທີ່ເຮັດໜ້າທີ່ດ້ວຍຄວາມເສຍສະຫຼະປະກອບສ່ວນເຂົ້າໃນການແກ້ໄຂ ແລະທໍາລາຍລະເບີດລູກບົມ 500 ປອນຈົນໄດ້ຮັບຜົນສໍາເລັດ; ພ້ອມນີ້ ທ່ານເຈົ້າເມືອງຍັງໄດ້ຮຽກຮ້ອງໃຫ້ພະນັກງານ ຄກລ ແຂວງສືບຕໍ່ຮັກສາຜົນງານ ແລະສືບຕໍ່ປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບໃຫ້ສູງຂຶ້ນກວ່າເກົ່າ ໂດຍສະເພາະແມ່ນການກວດກາ, ການຊອກຫາ ແລະການທໍາລາຍລະເບີດບໍ່ທັນແຕກກໍ່ໃຫ້ມີຄວາມລະມັດລະວັງ, ໃຫ້ຖືກ ຕ້ອງຕາມວິຊາສະເພາະທີ່ຮຽນມາ ທັງນີ້ ກໍເພື່ອຫຼີກລຽງບໍ່ໃຫ້ເກີດຜົນເສຍຫາຍຕໍ່ຊີວິດ ແລະຊັບສິນຂອງຕົນເອງ ກໍຄືຂອງປະຊາຊົນ.

(ຂ່າວ-ພາບ: ແກ້ວໄຊຍະວົງ)