ມີເດຍລາວແຂວງເຊກອງ ກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງ ຄະນະກວດກາພັກ-ອົງການກວດກາລັດແຂວງເຊກອງ ໄດ້ຈັດຂຶ້ນໃນວັນທີ 18 ຕຸລາ 2021 ນີ້ ໂດຍການເປັນປະທານຂອງທ່ານ ປອ ສົມນິດ ສີລິບຸນລ້ຽງ ກໍາມະການປະຈໍາພັກແຂວງ, ປະທານກວດກາພັກ ແຂວງ; ພ້ອມນີ້ ກໍມີທ່ານ ບຸນຫຼາຍ ບຸດທິ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ທ່ານ ນາງ ສີສະຫງ່າ ແກ້ວດວງດີ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ຄະນະຊີ້ນໍາຂັ້ນແຂວງ, ມີຄະນະພັກ ແລະພະນັກງານ-ລັດຖະກອນພາຍໃນຄະນະກວດກາພັກ-ອົງການກວດກາລັດແຂວງເຂົ້າຮ່ວມ.

ໃນກອງປະຊຸມ ໄດ້ຮັບຟັງການລາຍງານການຈັດຕັ້ງປະຕິບັດວຽກສ້າງແຜນກໍານົດພະນັກງານນໍາພາ-ຄຸ້ມຄອງໃນໄລຍະ 5 ປີ (2016-2020) ຜ່ານມາ ຈາກທ່ານ ນາງ ແສງມະນີ ໄຊສົງຄາມ ຮອງປະທານກວດກາພັກແຂວງ, ໂດຍຕີລາຄາດ້ານດີ, ດ້ານອ່ອນ ແລະຂໍ້ຄົງຄ້າງ ເພື່ອເປັນບົດຮຽນທີ່ດີໃຫ້ແກ່ການສ້າງຄວາມເປັນເອກະພາບໃນການກໍານົດສ້າງພະນັກງານນໍາພາ-ຄຸ້ມຄອງ, ພະນັກງານສືບທອດປ່ຽນແທນໃນ 5 ປີຕໍ່ໜ້າ (2021-2025).

ເຊິ່ງໃນຄະນະກວດກາພັກ-ອົງການກວດກາລັດ ປະກອບມີບຸກຄະລາກອນທີ່ໄດ້ຖືກຮັບຮອງຈໍານວນ 28 ສະຫາຍ, ຍິງ 09 ສະຫາຍ; ຫຼັງຈາກນັ້ນ ກໍໄດ້ປ່ອນບັດລົງຄະແນນທາບທາມ ເພື່ອເປັນການເລືອກເຟັ້ນພະນັກງານທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີທັດສະນະເບິ່ງກວ້າງເຫັນໄກ, ມີແບບແຜນການນໍາພາ-ຊີ້ນໍາທີ່ດີ ແລະມີຄວາມຮູ້ຄວາມສາມາດ ເພື່ອກໍານົດສ້າງເຂົ້າໃນຕໍາແໜ່ງງານສໍາຄັນຕ່າງໆຂອງຄະນະກວດກາພັກ-ອົງການກວດກາລັດແຂວງ ໃຫ້ມີລັກສະນະສືບທອດຕໍ່ເນື່ອງ ແລະຖືກຕ້ອງຕາມຫຼັກການນໍາພາຂອງພັກ. ເຊິ່ງກອງປະຊຸມຈະໄດ້ດຳເນີນເປັນເວລາ 2 ວັນ ( 18-19 ຕຸລາ ) ຈຶ່ງຈະສຳເລັດ.
ຂ່າວ:ພຸດທະສອນ