ມີເດຍລາວແຂວງສາລະວັນ ວັນທີ 18 ຕຸລາ 2021, ກອງປະຊຸມທາງໄກ ສໍາມະນາແລກປ່ຽນບົດຮຽນເຊີ່ງກັນ ແລະ ກັນ ລະຫວ່າງຄະນະກຳມາທິການ ສະພາແຫ່ງຊາດ ສປປ ລາວ ກັບ ສະພາແຫ່ງຊາດ ສສ.ຫວຽດນາມ ກ່ຽວກັບການປັບປຸງຮ່າງກົດໝາຍ ຈຳນວນ 2 ສະບັບຄື: ການສໍາຫຼວດວັດແທກ ແລະ ສ້າງແຜນທີ່ ແລະ ຮ່າງກົດໝາຍວ່າດ້ວຍ: ຊາຍແດນແຫ່ງຊາດ. ສໍາລັບ ຢູ່ ສປປ ລາວ ຈັດຂຶ້ນຢູ່ທີ່ຫ້ອງປະຊຸມ ຫໍສະພາແຫ່ງຊາດ ໂດຍການເປັນປະທານຂອງ ທ່ານ ສັນຍາ ປຣະເສີດ ກໍາມະການຄະນະປະຈໍາສະພາແຫ່ງຊາດ ປະທານກໍາມາທິການການຕ່າງປະເທດ. ຝ່າຍ ສສ.ຫວຽດນາມ, ມີ ທ່ານ ເລ ກວາງ ຮຸຍ ກໍາມະການສູນກາງພັກ, ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການວິທະຍາສາດເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດຫວຽດນາມ, ມີບັນດາທ່ານກໍາມາທິການທັງສອງຝ່າຍ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທົ່ວປະເທດ

ແຂວງສາລະວັນ ເຂົ້າຮ່ວມໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະສະມາຊິກສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນໃສ່ຮ່າງເນື້ອໃນກົດໝາຍ 2 ສະບັບຄື: ຮ່າງກົດໝາຍວ່າດ້ວຍ: ການສໍາຫຼວດວັດແທກ ແລະ ສ້າງແຜນທີ່ມີທັງໝົດ X ພາກ 92 ມາດຕາ ແລະ ຮ່າງກົດໝາຍວ່າດ້ວຍ: ຊາຍແດນແຫ່ງຊາດ ມີ IX ພາກ 61 ມາດຕາ ເຊິ່ງຮ່າງກົດໝາຍຈໍານວນ 2 ສະບັບນີ້ແມ່ນໄດ້ຮັບຮອງຈາກສະພາແຫ່ງຊາດແລ້ວ ແຕ່ຕ້ອງໄດ້ມີການປັບປຸງບາງເນື້ອໃນຄືນໃໝ່ ເພື່ອເຮັດໃຫ້ ກົດໝາຍດັ່ງກ່າວສົມບູນຖືກຕ້ອງ, ສອດຄ່ອງກັບສະພາບຄວາມເປັນຈິງ

ພ້ອມທັງຈັດຕັ້ງປະຕິບັດວຽກງານດັ່ງກ່າວໃຫ້ເປັນເອກະພາບ ໃນຂອບເຂດທົ່ວປະເທດ ແນໃສ່ຮັບປະກັນເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງຊາດ ແລະ ຄວາມໝັ້ນຄົງຂອງຊາຍແດນແຫ່ງຊາດ, ສ້າງຊາຍແດນແຫ່ງຊາດໃຫ້ເປັນຊາຍແດນແຫ່ງສັນຕິພາບ, ມີສະຖຽນລະພາບ, ມິດຕະພາບ, ການຮ່ວມມື ແລະ ການພັດທະນາແບບຍືນຍົງກັບປະເທດໃກ້ຄຽງ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ, ກົດໝາຍສະບັບດັ່ງກ່າວຍັງໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບ ການຄຸ້ມຄອງ ແລະ ຕິດຕາມກວດກາ ວຽກສໍາຫຼວດວັດແທກ ແລະ ສ້າງແຜນທີ່ ເພື່ອເຮັດໃຫ້ວຽກງານດັ່ງກ່າວ ມີປະສິດທິພາບ, ປະສິດທິຜົນ ແລະ ທັນສະໄໝ ແນໃສ່ເຮັດໃຫ້ການສໍາຫຼວດວັດແທກ ແລະ ສ້າງແຜນທີ່ດໍາເນີນໄປຢ່າງເປັນເອກະພາບ ຖືກຕ້ອງ, ຊັດເຈນ ສາມາດເຊື່ອມໂຍກັບພາກພື້ນ ແລະ ສາກົນປະກອບສ່ວນເຂົ້າໃນການປ້ອງກັນຊາດ-ປ້ອງກັນຄວາມສະຫງົບ ແລະ ການພັດທະນາເສດຖະກິດ-ສັງຄົມຂອງສອງຊາດລາວ-ຫວຽດນາມ ເພື່ອນໍາເອົາບາງເນືອໃນຂອງກົດໝາຍທີ່ເຫັນວ່າເໝາະສົມມານໍາໃຊ້ໃນປະເທດຂອງຕົນໃຫ້ເກີດປະໂຫຍດສູງສຸດ.

ໂດຍ: ກິນດາວັນ ອ້ວນນາຄູ