ຕອນເຊົ້າວັນທີ 19 ຕຸລາ 2021 ນີ້ ພະແນກສາທາລະນະສຸກ ແຂວງຫົວພັນ ຈັດກອງປະຊຸມ ສະຫຼຸບຕີລາຄາຄືນ ການເຄື່ອນໄຫວຈັດຕັ້ງປະຕິບັດ ການສັກວັກຊິນ ໂຄວິດ 19 ໃນໄລຍະຜ່ານມາ ຢູ່ທີ່ຫ້ອງປະຊຸມພະແນກດັ່ງກ່າວ, ໂດຍການເປັນປະທານ ຂອງດຣ ວິລະພອນ ພົມວົງສີ ຫົວໜ້າພະແນກສາທາລະນາສຸກແຂວງຫົວພັນ ມີຫົວໜ້າ-ຮອງຫົວໜ້າ, ພະນັກງານແພດໝໍ, ຂະແໜງການທີ່ກຽ່ວຂອງຂັ້ນແຂວງ ແລະ ຂັ້ນເມືອງທັງ 10 ເມືອງທົ່ວແຂວງເຂົ້າຮ່ວມ.

ໃນກອງປະຊຸມ ໄດ້ສັງເກດຕີລາຄາຄືນການຈັດຕັ້ງປະຕິບັດວຽກງານ ການສັກວັກຊິນຕ້ານ ພະຍາດໂຄວິດ 19 ຢູ່ທົ່ວແຂວງຫົວພັນ ນັບຕັ້ງແຕ່ມື້ເລີ່ມຕົ້ນຈົນເຖິງປະຈຸບັນນີ້. ເຊິ່ງຍົກໃຫ້ເຫັນຫຼາຍບັນຫານັບທັງຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດ  ຄະນະສະເພາະກິດຂັ້ນແຂວງ, ຂັ້ນເມືອງໄດ້ພ້ອມກັນເອົາໃຈໃສ່ ນໍາເອົາເນື້ອໃນນິຕິກໍາຕ່າງໆຈາກຂັ້ນສູນກາງ, ຂັ້ນແຂວງ ແລະ ຂັ້ນເມືອງ ໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເປັນຕົ້ນແມ່ນ: ຜົນຮ້າຍຂອງການແຜ່ລະບາດ ຂອງພະຍາດໂຄວິດ 19 ຢູ່ທົ່ວໂລກກໍ່ຄື ປະເທດລາວຂອງພວກເຮົາ ທີ່ມີການລະບາດເປັນບໍລິເວນກວ້າງ. ໃນໄລຍະຜ່ານມາແຂວງຫົວພັນ ໄດ້ຮັບວັກຊິນ ຈາກສູນກາງແບ່ງປັນໃຫ້ມີ ວັກຊິນຊະນິດຊີໂນຟາມ ຈໍານວນ 89 ພັນ 100 ໂດສ, ອາສ໌ຕຼາເຊເນກາ 20 ພັນ 800 ໂດສ ແລະ ຊະນິດຈອນສັນ 39 ພັນ 300 ໂດສ  ເຊິ່ງຄະນະສະເພາະກິດທຸກຂັ້ນໄດ້ຈັດກອງປະຊຸມຄົ້ນຄວ້າປຶກສາຫາລືເປັນເອກະພາບກັນ ແລະ ວາງແຜນເຮັດວຽກ ໂດຍໄດ້ແຕ່ງຕັ້ງຄະນະຮັບຜິດຊອບຢ່າງເປັນລະບົບນັບແຕ່ຂັ້ນແຂວງ ລົງຮອດຂັ້ນເມືອງທັນຕາມກໍານົດເວລາ ແລະ ໄດ້ຈັດຕັ້ງທິມງານຂັ້ນແຂວງລົງຕິດຕາມຊຸກຍູ້ ຂັ້ນເມືອງ ເພື່ອຈັດສະຖານທີ່ການສັກວັກຊິນຕາມໂຮງໝໍ, ສຸກສາລາ ຕ່າງໆ ທົ່ວແຂວງ ນັບແຕ່ກາງເດືອນມີນາ ເປັນຕົ້ນມາ. ປະຈຸບັນທົ່ວແຂວງມີປະຊາກອນທັງໝົດ 3 ແສນ 13 ພັນ 147 ຄົນ  ເຊຶ່ງສາມາດຈັດຕັ້ງປະຕິດສັກວັກຊິນໃຫ້ພໍ່ແມ່ປະຊົນ ພະນັກງານ ທະຫານ, ຕໍາຫຼວດ ເຂັມທີ1 ປະຕິບັດໄດ້ 27.2% ເຂັມທີ2 ປະຕິບັດໄດ້ 21% ໃນນີ້ ເມືອງຊໍາເໜືອເຂັມທີ1 ປະຕິບດໄດ້ 32.4% ເຂັມ 2 ປະຕິບັດໄດ້ 27,7%, ເມືອງຊຽງຄໍ້ ເຂັມ 1 ປະຕິບັດໄດ້ 29.5% ເຂັມ 2 ປະຕິບັດໄດ້ 21,9%, ເມືອງຮຽ້ມເຂັມ 1 ປະຕິບັດໄດ້ 42,8% ເຂັມ 2 ປະຕິບັດໄດ້ 30.6%, ເມືອງວຽງໄຊ ເຂັມ 1 ປະຕິບັດໄດ້ 23.7% ເຂັມ 2 ປະຕິບັດໄດ້ 15.8%, ເມືອງຫົວເມືອງ ເຂັມ 1 ປະຕິບັດໄດ້ 28.2% ເຂັມ 2 ປະຕິບັດໄດ້ 20.3%, ເມືອງຊໍາໃຕ້ ເຂັມ 1 ປະຕິບັດໄດ27.7% ເຂັມ 2 ປະຕິບັດໄດ້ 16.6%, ເມືອງສົບເບົາເຂັມ 1 ປະຕິບັດໄດ້ 27.4% ເຂັມ 2 ປະຕິບັດໄດ້ 22.1%, ເມືອງແອດ ເຂັມ 1 ປະຕິບັດໄດ້ 31.2% ເຂັມ 2 ປະຕິບັດໄດ້ 24.9%, ເມືອງກວັນ ເຂັມ 1 ປະຕິບັດໄດ້ 14.2% ເຂັມ 2 ປະຕິບັດໄດ້ 12.4%,  ແລະ ເມືອງຊ່ອນເຂັມ 1 ປະຕິບັດໄດ້ 1,7% ເຂັມ2 ປະຕິບັດໄດ້ 15.9%.

ກອງປະຊຸມຄັ້ງນີ້ ຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດຄໍາເຫັນ ແລກປ່ຽນຖອດຖອນ ບົດຮຽນນໍາກັນ ເພື່ອສ້າງຄວາມເຂັ້ມແຂງດ້ານວິຊາການໃຫ້ແພດໝໍໃນການສັກວັກຊິນໃຫ້ປະຊາຊົນບັນດາເຜົ່າໃນຕໍ່ໜ້ານີ້ ໃຫ້ມີຄວາມວ່ອງໄວທັນການ ແລະ ມີປະສິດທິພາບສູງຂື້ນ ໄດ້ຕາມແຜນທີ່ກໍານົດໄວ້.

#ພາບ-ຂ່າວ: ເລີດ ໄຊຍະເດດ