ມີເດຍລາວແຂວງອັດຕະປື
ໃນວັນທີ19 ຕຸລາ 2021 ຜ່ານມານີ້. ຢູ່ທີສະໂມສອນກອງບັນຊາການທະຫານເມືອງພູວົງໄດ້ຈັດພິທີຮັບສະມາຊິກພັກສຳຮອງເລື່ອນຂຶ້ນສົມບູນ, ຈາກມະຫາຊົນກ້າວໜ້າເຂົ້າເປັນສະມາຊິກພັກສຳຮອງ.

ໂດຍພາຍໃຕ້ເປັນປະທານ ຂອງ ສະຫາຍ ພັທ ຄຳກ້ອນ ດວງສົມປານ ຄະນະປະຈຳພັກເມືອງ, ເລຂາຄະນະພັກຮາກຖານ, ຫົວໜ້າການເມືອງ ກອງບັນຊາການທະຫານເມືອງພູວົງ, ມີບັນດາຄະນະໜ່ວຍພັກ 04 ໜ່ວຍພັກທີ່ຂຶ້ນກັບຄະນະພັກຮາກຖານ ຕະຫຼອດຮອດ ພະນັກງານສະມາຊິກພັກສົມບູນ-ສຳຮອງເຂົ້າຮ່ວມ.

ໃນພິທີ ສະຫາຍ ຮອ ບຸນອິ້ງ ອຽງວົງສັກ ຫົວໜ້າຂະແໜງຈັດຕັ້ງພັກ ກອງບັນຊາການທະຫານເມືອງພູວົງ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກເມືອງ ວ່າດ້ວຍການອະນຸມັດໃຫ້ສະມາຊິກພັກສຳຮອງເລື່ອນຂຶ້ນເປັນສະມາຊິກພັກສົມບູນ ແລະ ໃຫ້ມະຫາຊົນກ້າວໜ້າເຂົ້າເປັນສະມາຊິກພັກສຳຮອງ. ອີງຕາມ: ກົດລະບຽບຂອງພັກປະຊາຊົນປະຕິວັດລາວສະໄໝທີXI, ໝວດທີ I. ມາດຕາ 02 ວ່າດ້ວຍລະບຽບການຂະຫຍາຍພັກ, ອີງຕາມ: ການຄົ້ນຄວ້າຕົກລົງເຫັນດີເປັນກະພາບຂອງຄະນະປັບປຸງຂະຫຍາຍພັກ ຄັ້ງວັນທີ 07 ກັນຍາ 2021. ອີງຕາມ: ໜັງສືສະເໜີຂອງຄະນະຈັດຕັ້ງເມືອງ ສະບັບເລກທີ 98 ລົງວັນທີ 16 ກັນຍາ 2021. ໃນນັ້ນໄດ້ຕົກລົງຮັບເອົາສະມາຊິກພັກປະຊາຊົນປະຊາຊົນປະຕິວັດລາວ ຜ່ານສະໄໝສຳຮອງເລື່ອນຂຶ້ນສົມບູນໃນກອງບັນຊາການທະຫານເມືອງພູວົງ. ມີ 05 ສະຫາຍ, ຍິງ 0 ສະຫາຍ, ມະຫາຊົນກ້າວໜ້າເຂົ້າເປັນສະມາຊິກພັກປະຊາຊົນປະຕິວັດລາວສະໄໝສຳຮອງ ມີ 04 ສະຫາຍ, ຍິງ 01 ສະຫາຍ.

ໂອກາດດັ່ງກ່າວ ສະຫາຍ ພັນໂທ ຄໍາກ້ອນ ດວງສົມປານ, ໃນນາມປະທານກອງປະຊຸມກໍ່ໄດ້ໃຫ້ກຽດໂອ້ລົມຕໍ່ພິທີ ເຊິ່ງກ່ອນອື່ນ ສະຫາຍກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ບັນດາສະມາຊິກພັກຜ່ານສະໄໝສຳຮອງເລື່ອນຂຶ້ນເປັນສະມຊິກພັກສົມບູນ ແລະ ມະຫາຊົນກ້າວໜ້າເຂົ້າເປັນສະມາຊິກພັກໃໝ່. ທີ່ໄດ້ສ້າງຕົນເອງດ້ວຍຄວາມຫ້າວຫັນບຸກບືນຢ່າງຕັ້ງໜ້າເຂົ້າໃນທຸກຂະບວນການພັດທະນາກົມກອງ ດ້ວຍຜົນສຳເລັດຫຼາຍດ້ານ. ພ້ອມນັ້ນ ຍັງໄດ້ເນັ້ນໜັກໃຫ້ບັນດາສະມາຊິກພັກໃໝ່ ຈົ່ງເພີ້ມທະວີຄວາມຮັບຜິດຊອບສູງຕໍ່ໜ້າທີ່ວຽກງານ ວິຊາສະເພາະຂອງຕົນດ້ວຍຄວາມເອົາໃຈໃສ່ ປະຕິບັດຂໍ້ກຳນົດກົດລະບຽບຂອງພັກປະຊາຊົນປະຕິວັດລາວວາງອອກຢ່າງເຂັ້ມງວດ, ເປັນແບບຢ່າງນຳໜ້າໃນການຈັດຕັ້ງປະຕິບັດໜ້າທີ່ວຽກງານທີຂັ້ນເທິງໝອບໝາຍ, ຕັ້ງໜ້າເຝິກຝົນຫຼໍຫຼອມຕົນເອງດ້ວຍການສຶກສາຄົ້ນຄວ້າຮໍ່າຮຽນ, ຍົກລະດັບຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ, ຍົກສູງສະຕິຕໍ່ອົງການຈັດຕັ້ງ ແລະ ຄວາມເປັນເຈົ້າການໃນການປະຕິບັດໜ້າທີ່ ເພື່ອຍາດແຍ່ງໃຫ້ໄດ້ເຂົ້າເປັນສະມາຊິກພັກສົມບູນ ແລະ ຜູ້ທີມີຄຸນທາດການເມືອງໜັກແໜ້ນຮຸ່ນສືບທອດໃນປີຕໍ່ໄປ.

ຂ່າວ ໂດຍ : ວທ ບຸນສັນ ສຸດທິລາດ ປກຊເມືອງ