ມີເດຍລາວແຂວງຫຼວງພະບາງ ວັນທີ 20/10/2021 ຢູ່ທີ່ສູນປິ່ນປົວສະໂມງສອນໃຫ່ຍ ເມືອງງອຍ ແຂວງຫຼວງພະບາງ ຄະນະສະເພາະກິດ ເພື່ອປ້ອງກັນ,ຄວບຄຸມ ແລະແກ້ໄຂ ການລະບາດຂອງພະຍາດໂຄວິດ-19 ແລະແພດ-ໝໍ ເມືອງ ໄດ້ມີພິທີສົ່ງ ຜູ້ທີ່ໄດ້ຮັບການປິ່ນປົວ ຈາກການຕິດເຊື້ອພະຍາດໂຄວິດ-19 ຈົນຫາຍດີ 35 ຄົນ, ບັນດາຜູ້ຕິດເຊື້ອດັ່ງກ່າວນີ້ ແມ່ນໄດ້ຮັບການຢັ້ງຢືນຈາກຄະນະສະເພາະກິດຂອງເມືອງ ແລະ ແພດໝໍ ໃຫ້ກັບຄືນໄປຈໍາກັດບໍລິເວນຢູ່ເຮືອນ ພາຍຫຼັງປິ່ນປົວດີພາຍໃນ 21 ວັນ ແລະ ໄດ້ກວດຫາເຊື້ອບໍ່ພົບ 2 ຄັ້ງຕິດຕໍ່ກັນ ເຊິ່ງສາມາດເຄື່ອນໄຫວ ແລະດໍາລົງຊີວິດໄດ້ເປັນປົກກະຕິ.

ປັດຈຸບັນນີ້ເມືອງງອຍມີຜູ້ຕິດເຊື້ອໂຄວິດ-19 ທັງໝົດ 563 ຄົນ,ໄດ້ປິ່ນປົວດີ 221 ຄົນ, ໄດ້ສົ່ງໃຫ້ແຂວງ 16 ຄົນ,ບໍ່ມີກໍລະນີເສຍຊີວິດ ແລະ ກໍາລັງສຶບຕໍ່ປີ່ນປົວ 326 ຄົນ,ທົ່ວເມືອງງອຍມີສູນປິ່ນປົວ 6 ແຫ່ງ,ມີຜູ້ຕິດເຊື້ອເຂົ້າສູນມີໜ້າຕົວຈິງ ຄື: 1. ສູນໂຮງຮຽນປະຖົມບ້ານປາກບາກ 1 ຄົນ, 2. ສູນສະໂມງສອນຂອງເມືອງ 10 ຄົນ, 3. ສູນໂຮງຮຽນ ມສ ເມືອງງອຍ 206 ຄົນ, 4. ສູນເຂື່ອນນໍ້າອູ3 ມີ 24 ຄົນ, 5. ສູນບ້ານສົບຮຸນ 14 ຄົນ ແລະ 6.ສູນໂຮງຮຽນ ມສ ວົງໄຊ ບ້ານເມືອງງອຍເກົ່າ 71 ຄົນ.
ພາບ ແລະ ຂ່າວ; ສາຍສະໝອນ ຈິດຕະປັນຍາ ຫ້ອງການຖວທ ເມືອງງອຍ