ມີເດຍລາວແຂວງຫຼວງພະບາງ ວັນທີ 18 ຕຸລາ 2021ນີ້, ຢູ່ທີ່ສະໂມສອນເມືອງ ຈອມເພັດ ແຂວງຫຼວງພະບາງ ໄດ້ຈັດກອງປະຊູມ ຕີລາຄາຄືນການເຄື່ອນໄຫວວຽກ ງານປ້ອງກັນ ແລະ ສະກັດກັ້ນ ການແຜ່ລະບາດຂອງ ພະຍາດ ໂຄວິດ-19 ຢູ່ເມືອງຈອມເພັດ ໂດຍການເປັນປະທານຂອງ ທ່ານ ສອນເພັດ ພົງສຸທິ ຮອງເຈົ້າເມືອງຈອມເພັດ ,ມີບັນດາຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19ຈາກແຂວງ ແລະເມືອງ ເຂົ້າຮ່ວມ

ຕໍ່ການປ້ອງກັນ, ຄວບຄຸມແລະແກ້ໄຂ ການແຜ່ລະບາດຂອງພະຍາດ ໂຄວິດ-19 ເມືອງຈອມເພັດ ໃນຊ່ວງໄລຍະຜ່ອນຜັນ ແຕ່ວັນທີ 05 – 17 ຕຸລາ 2021 ນີ້ ທົ່ວເມືອງມີສູນຈຳກັດ ບໍລິເວນ 02 ແຫ່ງ ແລະ ສູນປິ່ນປົວ ຫຼືໂຮງໝໍພາກສະໜາມ 01 ແຫ່ງ, ມີ 180 ຕຽງນອນ, ໃນນັ້ນມີແຮງານນຳເຂົ້າທັງໝົດ 14 ຄົນ,ຍິງ 7 ຄົນ,ໄດ້ເກັບຕົວຢ່າງທັງໝົດ 1.512 ຄົນ, ສົ່ງກວດວິເຄາະ 265 ຄົນ, ໃນນັ້ນ, ພົບຜູ້ຕິດເຊື້ອ 10 ຄົນ, ຍິງ 6 ຄົນ, ລວມຕົວເລກຕິດເຊື້ອສະສົມທັງໝົດຜ່ານມາ 63 ຄົນ,ຍິງ 28 ຄົນ, ໄດ້ສຸມໃສ່ ແກ້ໄຂສະພາບການລະບາດຂອງພະຍາດ ເປັນຕົ້ນ ແມ່ນໄດ້ລົງເກັບກໍາ ແລະສືບສວນກໍລະນີ ສຳພັດໃຫ້ຊິດ ເພື່ອບົ່ງມະຕິ,ແຍກປ່ຽວ ແລະປິ່ນປົວກໍລະນີຜູ້ຕິດເຊື້ອ,ຕິດຕາມກວດກາບັນດາຈຸດດ່ານຊາຍແດນຕ່າງໆ ຢ່າງໃກ້ສິດ ເປັນປະຈໍາ.

ພ້ອມນັ້ນ,ກໍໄດ້ອອກແຈ້ງການເພີ່ມເຕີມ, ລົງເລິກບາງມາດຕະການ ໂດຍສະເພາະແມ່ນບ້ານທີ່ມີການຕິດເຊື່ອຢ່າງຫຼວງຫຼາຍ, ໂຄສະນາເຄື່ອນທີ່ ຢູ່ບັນດາບ້ານເປົ້າໝາຍ, ເຂດທີ່ມີຄວາມສ່ຽງ, ບ່ອນຊຸມຊົນຫຼາຍໃຫ້ຮັກສາໄລຍະຫ່າງ 2 ແມັດຂຶ້ນໄປ ແລະ ປະຕິບັດບັນດາມາດຕະການຕ່າງໆ ຢ່າງເຂັ້ມງວດ.
ຕອນທ້າຍ ທ່ານ ສອນເພັດ ພົງສຸທິ ປະທານກອງປະຊຸມ ໄດ້ຮຽກຮ້ອງມາຍັງທຸກພາກສ່ວນ ໂດຍສະເພາະຄະນະສະເພາະກິດທຸກຂັ້ນ ຈົ່ງເປັນເຈົ້າການ ຕໍ່ວຽກງານຂອງຕົນ ດ້ວຍຄວາມຮັບຜິດຊອບສູງ ,ສືບຕໍ່ຈັດຕັ້ງປະຕິບັດ ບັນດາໜ້າວຽກຕ່າງໆ ທີ່ຍັງຄົງຄ້າງໃຫ້ປະສົບຜົນສຳເລັດຍິ່ງຂຶ້ນ.
ຂ່າວ: ທອງສຸກ ອຸນິນໄຊ