ມີເດຍລາວແຂວງເຊກອງ ການກໍ່ສ້າງຮູບປັ້ນອົງປູ່ພະຍານາກ ທີ່ວັດບ້ານດ່ານ ເມືອງລະມາມແຂວງເຊກອງ ທີ່ມີມູນຄ່າການກໍ່ສ້າງທັງໝົດ 45 ລ້ານກີບ ເຊິ່ງໄດ້ເລີ່ມລົງມືກໍ່ສ້າງມາແຕ່ວັນທີ 9 ກັນຍາ 2021 ປະຈຸບັນສຳເລັດແລ້ວກວ່າ 90% ແລະຄາດຄະເນການຈະສໍາເລັດ 100% ໃນທ້າຍເດືອນທັນວາທີ່ຈະມາເຖິງນີ້.

ພຣະອາຈານ ກໍລະກັນ ເຊື້ອໂຊດ ຄະນະບໍລິຫານງານປະຈໍາການ ອພສ ເມືອງ, ຮອງເຈົ້າອະທິການວັດບ້ານດ່ານ ເມືອງລະມາມແຂວງເຊກອງ ໃຫ້ຮູ້ວ່າ: ຈຸດປະສົງຫຼັກໃນການກໍ່ສ້າງອົງປູ່ພະຍານາກມີ 4 ຈຸດປະສົງຄື: 1. ເພື່ອເປັນບ່ອນສັກກາລະບູຊາ ແລະສິນລະປະທາງດ້ານວັດທະນະທໍາແຫ່ງໃໝ່ຂອງຊາວແຂວງເຊກອງ; 2. ເພື່ອຮັກສາຕາມຄວາມເຊື່ອແຕ່ບູຮານນະການ ກ່ຽວກັບພະຍານາກ; 3. ເພື່ອຈໍາລອງສິ່ງທີ່ຄົນເຊື່ອຖືໃຫ້ອອກມາເປັນຮູບປະທໍາ; 4. ເພື່ອປະດັບສາສະໜາສະຖານໃຫ້ມີຄວາມສວຍງາມ.

ຂະນະທີ່, ທ່ານ ຄໍາຊອ່ງ ຄໍາຊາຍືນ ເລຂາໜ່ວຍພັກ, ນາຍບ້ານໆບ້ານດ່ານ ກໍ່ໄດ້ກ່າວວ່າ: ການກໍ່ສ້າງຮູບປັ້ນອົງປູ່ພະຍານາກ ແມ່ນສ້າງຂຶ້ນຕອບສະໜອງຕາມຄວາມຮຽກຮ້ອງຕ້ອງການຂອງປະຊາຊົນບັນດາເຜົ່າພາຍໃນບ້ານດ່ານ ກໍຄືບ້ານໃກ້ຄຽງ ໂດຍທຶນການກໍ່ສ້າງແມ່ນໄດ້ຈາກການອຸໂປໂມທະນາທານຈາກພຸດທະບໍລິສັດ, ອົງການຈັດຕັ້ງພັກ-ລັດ, ບຸກຄົນ-ນິຕິບຸກຄົນຕະຫຼອດຮອດປະຊາຊົນບັນດາເຜົ່າທັງພາຍໃນ ແລະຕ່າງປະເທດ ທີ່ມີຈິດໃຈຄວາມເຫຼື້ອມໃສສັດທາໃນພຸດທະສາດສະໜາ ເພື່ອເປັນພຸດທະບູຊາ ແລະ ສິລະປະທາງດ້ານວັດທະນາທຳແຫ່ງໄໝ່ຂອງເມືອງລະມາມ ກໍຄືແຂວງເຊກອງ ເພາະອົງປູ່ພະຍານາກ ແມ່ນມີເລື່ອງເລົ່າໃນຕໍານານຄວາມເຊື່ອຂອງປະຊາຊົນເຂດດັ່ງກ່າວມາແຕ່ດົນນາ.

(ຂ່າວ-ພາບ: ສັນຍາ)