ມີເດຍລາວແຂວງເຊກອງ ໂອກາດລົງຢ້ຽມຢາມ ແລະພົບປະໂອ້ລົມຄະນະພັກ-ຄະນະບັນຊາ, ພະນັກງານ-ນັກ ຮົບກອງບັນຊາການ ປກສ ເມືອງລະມາມ ໃນວັນທີ 20 ຕຸລາ 2021 ທ່ານ ພົນຈັດຕະວາ ສົມໄຊ ພູລະຄໍາມະນີ ຄະນະປະຈໍາພັກແຂວງ, ຫົວໜ້າກອງບັນຊາການ ປກສ ແຂວງເຊກອງ ໄດ້ຊີ້ນໍາໃຫ້ຄະນະພັກ-ຄະນະບັນຊາ ແລະເຈົ້າໜ້າທີ່ ປກສ ເມືອງລະມາມ ເອົາໃຈໃສ່ປະຕິບັດໜ້າທີ່ວິຊາສະເພາະທີ່ໄດ້ຮັບມອບໝາຍໃຫ້ມີຜົນສໍາເລັດ; ປະສານສົມທົບກັບຂະແໜງການກ່ຽວຂ້ອງແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມເປັນຕົ້ນບັນຫາຢາເສບຕິດ, ຂີ້ລັດງັດແງະ, ບັນຫາອຸບັດເຫດຕາມທ້ອງຖະໜົນ ແລະບັນຫາອື່ນໆໃຫ້ຫຼຸດນ້ອຍຖອຍລົງ ແນໃສ່ເຮັດໃຫ້ເມືອງລະມາມສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະປະຊາຊົນມີຊີວິດການເປັນຢູ່ທີ່ດີຂຶ້ນ.

ພ້ອມນີ້ ກໍເອົາໃຈໃສ່ສຶກສາອົບຮົມການເມືອງແນວຄິດເຈົ້າໜ້າທີ່ ປກສ ທຸກຂັ້ນ ດ້ວຍການເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ ເພື່ອສ້າງຄວາມເຂົ້າໃຈ, ຄວາມເປັນເອກະພາບ, ສ້າງການຫັນປ່ຽນຢ່າງແຂງແຮງເລິກເຊິ່ງຮອບດ້ານ ແນໃສ່ເຮັດໃຫ້ພະນັກງານ-ນັກຮົບມີຄຸນທາດການເມືອງໜັກແໜ້ນ, ມີຄຸນສົມບັດ, ສິນທໍາປະຕິວັດ, ມີນໍ້າໃຈເສຍສະຫຼະອັນສູງສົ່ງ, ຫ້າວຫັນໃນການປະຕິບັດໜ້າທີ່ວຽກງານຂອງຕົນທີ່ໄດ້ຮັບມອບໝາຍ; ປັບປຸງແບບແຜນການນໍາພາ-ວິທີເຮັດວຽກໃຫ້ຖືກຕ້ອງຕາມຫຼັກການລວມສູນປະຊາທິປະໄຕຂອງພັກ; ກໍານົດໃຊ້ມາດຕະການຢ່າງເດັດຂາດຕໍ່ຜູ້ຊື້-ຜູ້ຂາຍ ແລະຜູ້ເສບຢາເສບຕິດ; ເພີ່ມທະວີການໂຄສະນາຜົນຮ້າຍຂອງຢາເສບຕິດຜ່ານສື່ຕ່າງໆໃຫ້ກວ້າງຂວາງຮອດຮາກຖານບ້ານ. ພ້ອມນີ້ ກໍເອົາໃຈໃສ່ປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ດ້ວຍການຫັນພະນັກງານ-ນັກຮົບ ລົງກໍ່ສ້າງຮາກຖານການເມືອງຢ່າງເປັນລະບົບ; ຊອກໃຫ້ເຫັນບັນຫາທີ່ກົດໜ່ວງຖ່ວງດຶງຕໍ່ການພັດທະນາ, ບັນຫາທີ່ພາໃຫ້ເກີດມີຂີ້ລັກງັດແງະຢູ່ຮາກຖານບ້ານ-ກຸ່ມບ້ານພັດທະນາ ແລ້ວຮີບຮ້ອນນໍາມາປຶກສາຫາລືກັບຂະແໜງການກ່ຽວຂ້ອງ ເພື່ອຫາວິທີແກ້ໄຂໃຫ້ທ່ວງທັນກັບເວລາ.

ຂະນະທີ່, ທ່ານ ພັນໂທ ຮຽມ ໄຊຍະລາດ ຄະນະປະຈໍາພັກເມືອງ, ຫົວໜ້າກອງບັນຊາການ ປກສ ເມືອງລະມາມ ໄດ້ລາຍງານວ່າ: ໃນໄລຍະ 06 ເດືອນຕົ້ນປີ 2021 ທົ່ວເມືອງລະມາມມີອຸບັດເຫດເກີດຂຶ້ນນທັງໝົດ 22 ລາຍ, ມີພາຫະນະເປ່ເພທັງໝົດ 33 ຄັນ, ມີຜູ້ຂັບຂີ່ໄດ້ຮັບບາດເຈັບ 30 ຄົນ ໃນນີ້ບາດເຈັບສາຫັດ 4 ຄົນ, ບາດເຈັບສົມຄວນ 10 ຄົນ, ບາດເຈັບເລັກນ້ອຍ 14 ຄົນ; ໄດ້ຂຶ້ນທະບຽນສຳມະໂນຄົວໃໝ່ 337 ຄອບຄົວ; ໄດ້ລົງປັບປຸງ ແລະ ຝຶກອົບຮົມພາລະບົດບາດ, ໜ້າທີ່ຂອງ ປກສ ບ້ານສຳເລັດ 37 ບ້ານ, ສ້າງບ້ານປ້ອງກັນຄວາມສະຫງົບດີໄດ້ 36 ບ້ານ; ມ້າງລາຍຄະດີຄ້າ-ຂາຍຢາເສບຕິດໄດ້ທັງໝົດ 6 ເລື່ອງ, ກັກຕົວຜູ້ຖືກຫາໄດ້ 6 ຄົນ, ຢຶດຂອງກາງຄະດີ (ປະເພດຢາບ້າ) ໄດ້ຈຳນວນ 446 ເມັດ

(ຂ່າວ-ພາບ: ວິຈັນດາ)