ມີເດຍລາວແຂງສາລະວັນ ວັນທີ 21 ຕຸລາ 2021, ຢູ່ທີ່ໂຮງແຮມ ຄຣາວພລາຊ່າ ນະຄອນຫຼວງວຽງຈັນ ໄດ້ຈັດກອງປະຊຸມທາງໄກ, ເປີດໂຕແນວທາງການຟື້ນຟູການທ່ອງທ່ຽວ ພາຍຫຼັງໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ເຂົ້າຮ່ວມເປັນປະທານໂດຍ ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງ ຖວທ, ທ່ານ ນາງ ຣີຄາດ້າ ຣີເກີ້ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ, ບັນດາທ່ານຫົວໜ້າ-ຮອງກົມ ຈາກກະຊວງ ຖວທ ແລະ ບັນດາກະຊວງທີ່ກ່ຽວຂ້ອງອ້ອມຂ້າງ, ບັນດາທ່ານຫົວໜ້າພະແນກ, ຮອງຫົວໜ້າພະແນກ ຖວທ ແຂວງໃນທົ່ວປະເທດ, ຜູ້ຕາງໜ້າຈາກອົງການຈັດຕັ້ງສາກົນ, ທ່ານຜູ້ຕາງໜ້າຈາກພາກທຸລະກິດ. ແຂວງສາລະວັນ ຈັດຂຶ້ນຢູ່ທີ່ພະແນກຂອງຕົນ, ເຂົ້າຮ່ວມໂດຍ ທ່ານ ມະໄລວອນ ສີປະເສີດ ກໍາມະການພັກແຂວງ, ຫົວໜ້າພະແນກ ຖວທ ແຂວງສາລະວັນ ພ້ອມດ້ວຍຄະນະ.

ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຂຶ້ນຜ່ານແນວທາງການຟື້ນຟູການທ່ອງທ່ຽວຂອງ ສປປ ລາວ, ຫຼັງໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ເປັນຕົ້ນ: ແນໃສ່ເພີ່ມທະວີການຮ່ວມມືລະຫວ່າງພາກລັດ ແລະ ພາກທຸລະກິດ ຮ່ວມມືກັນແກ້ໄຂ ແລະ ຊອກຊ່ອງທາງຊຸກຍູ້, ສົ່ງເສີມການທ່ອງທ່ຽວ ໃຫ້ກັບຄືນມາມີບັນຍາກາດຟົດຟື້ນເຊັ່ນເຄີຍ. ເຊີ່ງພາກລັດ ເປັນຜູ້ວາງນະໂຍບາຍ, ສ້າງເງື່ອນໄຂຕ່າງໆ ແລະ ອໍານວຍຄວາມສະດວກ ໃຫ້ກັບພາກສ່ວນທຸລະກິດ ເພື່ອເປັນຜູ້ຜັກດັນວຽກງານການສົ່ງເສີມຕະຫຼາດ, ຊ່ວຍເຫຼືອ ບັນດາທຸລະກິດທ່ອງທ່ຽວຕ່າງໆ ໄດ້ກັບມາເປີດກິດຈະການ ແລະ ສາມາດປະຄັບປະດອງກັນໄດ້, ຮັກສາພະນັກງານຜູ້ມີທັກສະ ແລະ ປະສົບການສູງ, ສ້າງຄວາມໝັ້ນໃຈ, ສ້າງຄວາມເຂັ້ມແຂງ ໂດຍສະເພາະຄວາມປອດໄພດ້ານສຸຂະພາບຂອງນັກທ່ອງທ່ຽວ. ນອກນັ້ນ ເພື່ອເຮັດໃຫ້ແຜນການສຶກສາ, ຄົ້ນຄວ້າ ສົ່ງເສີມຕະຫຼາດທ່ອງທ່ຽວພາຍໃນ ແລະ ພາກພື້ນ ເລັ່ງໃສ່ໃຫ້ບັນດາຫົວໜ່ວຍທຸລະກິດດັ່ງກ່າວ ເຂົ້າເຖີງການສະໜັບສະໜູນທຶນ SME ໃຫ້ຫຼາຍຂຶ້ນ ເພື່ອຜັກດັນບັນດາຫົວໜ່ວຍທຸລະກິດຕ່າງໆ ພັດທະນາຜະລິດຕະພັນ ໃຫ້ຫຼາຍຮູບແບບຫຼາຍສີສັນ ແລະ ຊຸກຍູ້ໃຫ້ປັບປຸງ, ປ່ຽນແປງ ແລະ ຍົກລະດັບຜະລິດຕະພັນການທ່ອງທ່ຽວ ໃຫ້ດີຂຶ້ນເລື້ອຍໆ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງນັກທ່ອງທ່ຽວ ກໍ່ຄືສ້າງແຮງຈູງໃຈ ໃນຕະຫຼາດທ່ອງທ່ຽວແຫ່ງຕ່າງໆ ໃຫ້ນັບມື້ນັບຫຼາຍຂຶ້ນ.

ຜູ້ເຂົ້າຮ່ວມກອງປະຊຸມຄັ້ງນີ້ ໄດ້ປະກອບຄຳຄິດເຫັນ ເພື່ອຊອກຊ່ອງທາງແກ້ໄຂ ແລະ ຟື້ນຟູການທ່ອງທ່ຽວ ແລະ ຊ່ວຍເຫຼືອທາງດ້ານເສດຖະກິດ ເພື່ອໃຫ້ຂະແໜງການທ່ອງທ່ຽວສາມາດຜ່ານວິກິດຄັ້ງນີ້ໄປໄດ້, ສ້າງຄວາມໝັ້ນໃຈ ແລະ ເຂັ້ມແຂງໃຫ້ແກ່ການທ່ອງທ່ຽວ, ສ້າງເງື່ອນໄຂ ແລະ ສົ່ງເສີມບັນດາຫົວໜ່ວຍທຸລະກິດ ສາມາດເຂົ້າເຖີງແຫຼ່ງທຶນ SME ໃຫ້ຫຼາຍຂຶ້ນ. ໂອກາດດຽວກັນນັ້ນກໍ່ໄດ້ມີການມອບປຶ້ມແນວທາງການຟື້ນຟູ ການທ່ອງທ່ຽວຂອງ ສປປ ລາວ ມອບໂດຍ ທ່ານ ນາງ ຣີຄາດ້າ ຣີເກີ້ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ແລະ ຮັບໂດຍ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂດຍ: ກິນດາວັນ ອ້ວນນາຄູ