ມີເດຍລາວແຂວງເຊກອງ ວັນທີ 21 ຕຸລາ 2021 ພຣະອາຈານ ກໍລະກັນ ເຊື້ອໂຊດ ຄະນະບໍລິຫານງານ ປະຈຳການ, ຫົວໜ້າກໍາມາທິການສາທາລະນຸປະການ ອພສ ເມືອງລະມາມ, ຮອງເຈົ້າອະທິການວັດບ້ານດ່ານເມືອງລະມາມ ໄດ້ມອບເງິນສົດຈໍານວນ 4 ລ້ານກີບ ແລະອຸປະກອນການກໍ່ສ້າງມູນຄ່າ 2 ລ້ານກີບ ໃຫ້ແກ່ອົງການປົກຄອງບ້ານດ່ານ ເພື່ອເປັນທຶນສົມທົບກໍ່ສ້າງຫ້ອງການບ້ານດ່ານຫຼັງໃໝ່ ໂດຍການກ່າວຮັບຂອງທ່ານ ຄໍາຊ່ອງ ຄໍາຊາຍືນ ເລຂາໜ່ວຍພັກ, ນາຍບ້ານໆດ່ານ ແລະມີເຖົ້າແກ່ແນວໂຮມ, ອົງການຈັດຕັ້ງທີ່ກ່ຽວຂ້ອງພາຍໃນບ້ານເຂົ້າຮ່ວມ.

ໂອກາດນີ້, ທ່ານ ຄໍາຊ່ອງ ຄໍາຊາຍືນ ໄດ້ກ່າວສະແດງຄວາມຂອບອົກຂອບໃຈ ແລະຍ້ອງຍໍຊົມເຊີຍມາຍັງພຣະອາຈານ ກໍລະກັນ ເຊື້ອໂຊດ ທີ່ໄດ້ເສຍສະຫຼະປະກອບສ່ວນທຶນຮອນເຂົ້າໃນການກໍ່ສ້າງຫ້ອງການບ້ານຫຼັງໃໝ່ ແລະສັນຍາວ່າ ຈະນໍາເອົາເງິນ ແລະວັດຖຸອຸປະກອນຈໍານວນດັ່ງກ່າວນີ້ ນໍາໃຊ້ເຂົ້າໃນການກໍ່ສ້າງຫ້ອງການບ້ານຫຼັງໃໝ່ໃຫ້ສໍາເລັດຕາມຄາດໝາຍແຜນການ ແລະເວລາທີ່ວາງໄວ້

ຫ້ອງການອົງການປົກຄອງບ້ານດ່ານຕັ້ຢູ່ແຄມເສັ້ນທາງເລກທີ 16ເອ (ເຊກອງ-ອັດຕະປື) ເປັນອາຄານຊັ້ນດຽວ, ກວ້າງ 6 ແມັດ, ຍາວ 7 ແມັດ, ກໍ່ດ້ວຍດິນຈີ່, ມຸງດ້ວຍກະເບື້ອງ ເຊິ່ງໄດ້ເລີ່ມລົງມືກໍ່ສ້າງໃນຕົ້ນເດືອນຕຸລາ 2018 ຕາມແຜນຄາດຄະເນເບື້ອງຕົ້ນຈະໃຫ້ສໍາເລັດໃນເດືອນເມສາ 2019 ແຕ່ຂາດເຂີນທາງດ້ານງົບປະມານ ເຮັດໃຫ້ການກໍ່ສ້າງຢຸດຕິລົງ ແລະແກ່ຍາວມາເຖິງປະຈຸບັນ.

(ຂ່າວ-ພາບ: ແກ້ວໄຊຍະວົງ)