ມີເດຍລາວແຂວງຄຳມ່ວນ ວັນທີ 21 ຕຸລາ 2021 ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄຳມ່ວນ ພ້ອມຄະນະ ໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດບັນດາມາດຕະການ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດໂຄວິດ-19 ຢູ່ເມືອງທ່າແຂກ ໂດຍມີຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງທ່າແຂກ ແລະ ຂະແໜງການທີ່ກ່ຽວຂ້ອງໃນຂັ້ນເມືອງເຂົ້າຮ່ວມ.

ທ່ານ ບຸນເກີດ ດາລາສຸກ ຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງທ່າແຂກ ໄດ້ລາຍ ງານສະພາບການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດໂຄວິດ-19 ໃນຂັ້ນເມືອງໃຫ້ຮູ້ວ່າ: ພາຍຫຼັງທີ່ໄດ້ຮັບແຈ້ງການ, ຄຳສັ່ງ, ຄຳແນະນຳຂອງຂັ້ນສູນກາງ, ຂັ້ນແຂວງ ກໍ່ໄດ້ຫັນບັນດາ ຄຳສັ່ງ, ແຈ້ງການຕ່າງໆມາເປັນຂອງເມືອງ ແລະ ໄດ້ແຈ້ງລົງບັນດາບ້ານ ເພື່ອຈັດຕັ້ງປະຕິບັດ ພ້ອມທັງ ໄດ້ຈັດແບ່ງບັນດາຄະນະພັກເມືອງ, ຄະນະພັກຫ້ອງການ, ກຳລັງ ປກຊ-ປກສ ລົງຊຸກຍູ້ບັນດາບ້ານ ເພື່ອເຮັດໜ້າທີ່ ໃນການປ້ອງກັນເວນຍາມ, ກວດກາ, ຕິດຕາມຄົນ ເຂົ້າ-ອອກ ຢ່າງເຂັ້ມງວດ.

ເຊິ່ງໃນທົ່ວເມືອງ ມີຈຸດກວດກາ ທັງໝົດ 204 ຈຸດ ໃນນີ້ມີຈຸດທີ່ປິດບໍ່ໃຫ້ຄົນ ແລະ ພາຫະນະທຽວສັນຈອນໄປ-ມາ 69 ຈຸດ ແລະ ຈຸດປິດ-ເປີດ ເພື່ອກວດກາມີ 79 ຈຸດ. ເມືອງທ່າແຂກມີສູນ ຈຳກັດບໍລິເວນທັງໝົດ 02 ສູນ (ສູນລວມຂອງແຂວງ), ມີຈຳນວນແຮງງານເຂົ້າສູນກັກກັນສະສົມ 4.223 ຄົນ, ຍິງ 2.156 ຄົນ ໃນນີ້ກັກກັນຄົບກຳນົດ 3.976 ຄົນ, ຍັງເຫຼືອໃນສູນປະຈຸບັນ 249 ຄົນ, ຍິງ 82 ຄົນ. ສຳລັບຈຳນວນບ້ານທີ່ໄດ້ກຳນົດເປັນເຂດແດງສະສົມມີທັງໝົດ 33 ບ້ານ, ມີຄອບຄົວແດງ 266 ຄອບຄົວ, ຕົວເລກຜູ້ຕິດເຊື້ອສະສົມທັງໝົດ 415 ຄົນ. ໄດ້ເກັບກຳຈຳນວນ ຄອບຄົວປະຊາຊົນທີ່ຂາດເຂີນ ທີ່ໄດ້ຮັບຜົນກະທົບຈາກພະຍາດໂຄດວິດ-19 ມີທັງໝົດ 996 ຄອບຄົວ ໃນນີ້ແມ່ນໄດ້ນໍາເອົາເຄື່ອງຊ່ວຍເຫຼືອ ປະເພດ ເຂົ້າສານອາຫານແຫ້ງຈຳນວນໜຶ່ງໄປມອບໃຫ້ແກ່ບັນດາຄອບຄົວ ດັ່ງກ່າວ ເພື່ອເປັນການບັນເທົາທຸກໃນເບື້ອງຕົ້ນ. ສຳລັບການສັກວັກຊິນປ້ອງກັນ ມາຮອດປະຈຸບັນໃນທົ່ວເມືອງ ມີຕົວເລກການສັກວັກຊິນລວມທັງໝົດ 38.393 ຄົນ. ໃນນັ້ນຈຳນວນຜູ້ທີ່ໄດ້ຮັບວັກຊິນຄົບໂດສແລ້ວມີ 33.952 ຄົນ ແລະ ຈຳນວນຜູ້ໄດ້ຮັບວັກຊິນເຂັມທີ 01 ມີ 4.441 ຄົນ.

ໂອກາດດຽວກັນ ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງ ກໍ່ໄດ້ໂອ້ລົມ ເຊິ່ງໄດ້ເນັ້ນໃຫ້ອຳນາດການປົກຄອງ ກໍ່ຄືຄະນະສະເພາະກິດຂັ້ນເມືອງ ຈົ່ງໄດ້ສືບຕໍ່ເພີ່ມທະວີການຈັດຕັ້ງປະຕິບັດ ບັນດາ ແຈ້ງການ, ຄຳສັ່ງ, ຄຳແນະນຳ ຂອງເທິງວາງອອກ ໂດຍສະເພາະແມ່ນຄຳສັ່ງ ເລກທີ 10 ຂອງທ່ານເຈົ້າແຂວງ ຄຳມ່ວນ ວ່າດ້ວຍການສືບຕໍ່ເພີ່ມທະວີຄວາມເຂັ້ມງວດ ໃນການຈັດຕັ້ງປະຕິບັດມາດຕະການ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດໂຄວິດ-19 ຢູ່ແຂວງຄຳມ່ວນ, ເພີ້ມທະວີໃນການຊີ້ນຳອຳນາດການປົກຄອງຂັ້ນບ້ານ, ສະຫງົບສຸກກອງຫຼອນ ໃນການຕິດຕາມ, ກວດກາຄົນ ເຂົ້າ-ອອກ ພາຍໃນບ້ານ, ສືບຕໍ່ໃນການເຄື່ອນໄຫວ ໂຄສະນາເຖິງຜົນຮ້າຍ, ໄພອັນຕະລາຍຂອງພະຍາດໂຄວິ-19 ລວມເຖິງການໂຄສະນາບັນດາມາດຕະການຈັດຕັ້ງ ປະຕິບັດ ແລະ ວິທີການປ້ອງກັນ ເພື່ອບໍ່ໃຫ້ຕິດເຊື້ອພະຍາດດັ່ງກ່າວ, ປຸກລະດົມພໍ່ແມ່ປະຊາຊົນໃຫ້ການຮ່ວມມື ແລະ ເປັນເຈົ້າການຈັດຕັ້ງປະຕິບັດວຽກງານດັ່ງກ່າວຢ່າງເຂັ້ມງວດ ເພື່ອຢັບຢັ້ງບໍ່ໃຫ້ມີການແຜ່ລະບາດຢູ່ໃນຊຸມຊົນ ຫຼື ຖ້າມີການລະບາດກໍ່ໃຫ້ມີໜ້ອຍທີ່ສຸດ ພ້ອມນັ້ນກໍ່ຕ້ອງປຸກລະດົມໃຫ້ພໍ່ແມ່ປະຊາຊົນ ບໍລິໂພກຂໍ້ມມູນຂ່າວສານ ຈາກສື່ທີ່ເປັນທາງການ ທີ່ມີຂໍ້ມູນຖືກຕ້ອງ ເພື່ອບໍ່ສ້າງຄວາມແຕກຕື່ນ ແລະ ກໍ່ໃຫ້ເກີດຄວາມວຸ້ນວາຍຢູ່ໃນສັງຄົມ. ໃນໂອກາດລົງເຄື່ອນໄຫວຄັ້ງນີ້ ທ່ານຮອງປະທານສະພາປະຊາຊົນແຂວງຄຳມ່ວນ ຍັງໄດ້ມອບເງິນ ຈຳນວນ 10 ລ້ານກີບ ປະກອບສ່ວນເຂົ້າໃນວຽກງານປ້ອງກັນໂຄວິ-19 ຢູ່ເມືອງທ່າແຂກ ພ້ອມທັງໄດ້ລົງຕິດຕາມສູນ ກັກກັນຈຳນວນໜຶ່ງ