ຕອນເຊົ້າຂອງວັນທີ່ 26 ຕຸລາ 2021 ຄະນະໂຄສະນາອົບຮົມເມືອງໃໝ່ ແຂວງຜົ້ງສາລີ ໄດ້ຈັດໃຫ້ມີກອງປະຊຸມເຊື່ອມຊຶມມະຕິຄຳສັ່ງຂອງພັກໃຫ້ແກ່ພະນັກງານ-ລັດຖະກອນ ພາຍໃຕ້ເປັນປະທານຂອງ ທ່ານ ສົມຈິດ ສິດທິວົງ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງໃໝ່ ໃນກອງປະຊຸມໄດ້ຮັບຟັງການເຜີຍແຜ່ ບົດບັນທຶກກອງປະຊຸມສ່ອງແສງການຈັດຕັ້ງປະຕິບັດວຽກງານຮອບດ້ານຂອງແຂວງ ໄລຍະ 9 ເດືອນ ແລະ ກຳນົດແຜນຈຸດສຸມປະຈຳໄຕມາດ IV ປີ 2021 ໂດຍ ທ່ານ ຄອນສະຫວັນ ດວງບິໄລ ກໍາມະການພັກເມືອງ ຮັກສາການແທນຫົວໜ້າຫ້ອງວ່າການເມືອງ.

          ພ້ອມດຽວກັນນີ້ຍັງໄດ້ຮັບຟັງ ທ່ານ ສົມຈິດ ສິດທິວົງ ເຈົ້າເມືອງ ເມືອງໃໝ່ ຂຶ້ນເຜີຍແຜ່ມະຕິວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊີ່ງ ວຽກງານພະນັກງານ ຜັນຂະຫຍາຍເນື້ອໃນຈິດໃຈພື້ນຖານຂອງມະຕິກອງປະຊຸມໃຫຍ່ຄັ້ງທີ່ XI ຂອງພັກ ລວມທັງຂົງເຂດວຽກງານພະນັກງານ ກອງປະຊຸມຄົບຄະນະ ສະໄໝສາມັນຄັ້ງທີ I ຂອງຄະນະບໍລິຫານງານສູນກາງພັກສະໄໝທີ XI ທີ່ໄດ້ດຳເນີນໃນເດືອນ ມີຖຸນາ 2021 ໄດ້ຄົ້ນຄວ້າປຶກສາຫາລືຢ່າງເລິກເຊີ່ງກົງໄປກົງມາ ແລະ ມີຄວາມເປັນເອກະພາບສູງ ກ່ຽວກັບບັນຫາພະນັກງານ ແມ່ນກຳລັງການເມືອງຫຼັກແຫຼ່ງ ໃນພາລະກິດປະຕິວັດຂອງພັກເຮົາເປັນຜູ້ຕັດສິນຜົນໄດ້ຜົນເສຍ ຂອງການຈັດຕັ້ງປະຕິບັດ ແນວທາງນະໂຍບາຍຂອງພັກ, ຂອງລັດ. ພັກເຮົາຍາມໃດກໍ່ຖືເອົາວຽກງານການກໍ່ສ້າງ ແລະ ປັບປຸງກົງຈັກການຈັດຕັ້ງທົ່ວລະບົບການເມືອງ ແມ່ນວຽກງານໜື່ງທີ່ສຳຄັນຂອງພັກເຮົາ ໃນຖານະທີ່ພັກກຳອຳນາດດ້ວຍການກຳນົດແນວທາງນະໂຍບາຍຂອງໜ້າທີ່ການເມືອງ ໃນການພັດທະນາເສດຖະກິດ-ສັງຄົມໃນແຕ່ລະໄລຍະ ຄະນະພັກທຸກຂັ້ນຕ້ອງເປັນເຈົ້າການ ໃນການຄົ້ນຄວ້າເຜີຍແຜ່ເຊື່ອມຊຶມ ແລະ ຈັດຕັ້ງປະຕິບັດຕາມພາລະບົດບາດ, ຂອບເຂດສິດຂອງຕົນດ້ວຍຄວາມຮັບຜິດຊອບສູງ ຮັບປະກັນການຫັນປ່ຽນຢ່າງແຂງແຮງ, ເລິກເຊິ່ງ ໃນການປັບປຸງກົງຈັກການຈັດຕັ້ງ ຕິດພັນກັບການກຳນົດຕຳແໜ່ງງານ ແລະ ຫຼຸດຜ່ອນຈຳນວນຜົນ ໃນນີ້ຍັງໄດ້ຮັບຟັງແຈ້ງການ ສະບັບເລກທີ 175/ພນ, ລົງວັນທີ 24 ກັນຍາ 2021 ເພື່ອເຮັດໃຫ້ບັນດາກະຊວງ, ອົງການ ແລະ ອົງການປົກຄອງທ້ອງຖິ່ນສາມາດເຄື່ອນໄຫວວຽກງານຢ່າງມີປະສິດທິພາບ, ປະສິດທິຜົນສູງ ແລະ ມີຄວາມຄ່ອງຕົວ ພ້ອມທັງເປັນການຜັນຂະຫຍາຍນິຕິກຳຕ່າງໆ ຂອງຂັ້ນເທິງ ກ່ຽວກັບການແບ່ງຂັ້ນຄຸ້ມຄອງ ໂດຍສະເພາະແມ່ນວຽກປັບປຸງກົງຈັກໃຫ້ປະກົດຜົນເປັນຈິງ ເປັນຕົ້ນແມ່ນມະຕິຕົກລົງຂອງກົມການເມືອງສູນກາງພັກ ສະບັບເລກທີ 25/ກມສພ, ລົງວັນທີ 22 ທັນວາ 2014 ແລະ ຄຳສັ່ງຂອງນາຍົກລັດຖະມົນຕີ ສະບັບເລກທີ 34/ນຍ, ລົງວັນທີ່ 23 ສິງຫາ 2016 ວ່າດ້ວຍທິດທາງເປົ້າໝາຍ ແລະ ມາດຕະການ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ໃນກອງປະຊຸມມີແຂກເຂົ້າຮ່ວມ 98 ຄົນ, ຍິງ 41 ຄົນ ກອງປະຊຸມໄດ້ດຳເນີນເປັນເວລາ 1 ຕອນ.

#ພາບ-ຂ່າວ: ຄຳຫຼ້າ ເມືອງໃໝ່ ຜົ້ງສາລີ