ມີເດຍລາວແຂວງຈຳປາສັກ
ໃນຕອນເຊົ້າວັນທີ 26 ຕຸຸລາ 2021 ນີ້ທີ່ຫ້ອງວ່າການເມືອງໂຂງ ແຂວງຈຳປາສັກ ທ່ານ ສົມພອນ ພັນທະວົງ ຜູ້ບໍລິຫານໂຄງການປ້ອງກັນ ແລະ ຫຼຸດຜ່ອນຄວາມສ່ຽງຈາກການຕິດເຊື້ອການລະບາດພະຍາດໂຄວິດ-19 ແບບມີສ່ວນຮ່ວມຂອງຊຸມຊົນ ພ້ອມດ້ວຍພະນັກງານໂຄງການຂອງຕົນ ໄດ້ມອບເຄື່ອງໃຊ້ທີ່ຈຳເປັນເຊັ່ນ: ໝອນ, ສາດ, ມຸ້ງ, ຟອຍ, ນ້ຳຢາລ້າງຫ້ອງນ້ຳ ແລະ ອື່ນໆ ມອບໃຫ້ກັບເມືອງໂຂງ ເພື່ອນຳໄປໃຊ້ເຂົ້າໃນສູນກັກໂຕຂອງເມືອງທີ່ຍັງຂາດເຂີນ.

ກ່າວຮັບເຄື່ອງຄັ້ງນີ້ໂດຍທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີຄະນະປະຈຳພັກເມືອງ, ກຳມະການພັກເມືອງ, ຄະນະສະເພາະກິດຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ; ໂອກາດນີ້ທ່ານ ສົມພອນ ພັນທະວົງ ໄດ້ຍົກໃຫ້ເຫັນວ່າ: ຍ້ອນເຫັນໄດ້ສະພາບຄວາມຈຳເປັນໃນການຕອບໂຕ້ກ່ຽວກັບການລະບາດຂອງພະຍາດໂຄວິດ -19 ທີ່ສົ່ງຜົນກະທົບເປັນວົງກວ້າງ ແລະ ໂດຍສະເພາະເມືອງໂຂງ ເຫັນໄດ້ວ່າຢູ່ສູນຈຳກັດບໍລິເວນ ກໍຄືສູນກັກໂຕຫຼາຍແຫ່ງຂອງເມືອງຍັງຂາດເຂີນວັດຖຸເຄື່ອງໃຊ້ໃນຊີວິດປະຈຳວັນຫຼາຍຢ່າງ ແລະ ເຄື່ອງທີ່ນຳມາມອບຄັ້ງນີ້ປະກອບມີ: ໝອນ, ສາດ, ມຸ້ງ, ຜ້າຮົ່ມ, ສະບູ, ເຂ້ງ ແລະ ຖົງຢາງໃສ່ຂີ້ເຫຍື່ອ, ນ້ຳຢາລ້າງຫ້ອງນ້ຳ, ຟອຍ ລວມມູນຄ່າ 7.480.000 ກີບ.

ໂອກາດນີ້ ເຈົ້າເມືອງໆໂຂງກໍໄດ້ສະແດງຄວາມຂອບໃຈມາຍັງຜູ້ບໍລິຫານໂຄງການ ແລະ ພະນັກງານທຸກຄົນ ທີ່ໄດ້ສຸມສະຕິປັນຂົນຂວາຍຫາແຫຼ່ງທຶນເຂົ້າມາຊ່ວຍເມືອງ; ຫວັງຢ່າງຍິ່ງວ່າ ໂອກາດໜ້າຄົງຈະໄດ້ຮັບການຊ່ວຍເຫຼືອຈາກໂຄງການອີກ ບໍ່ວ່າຈະເປັນວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ກໍຄືວຽກງານອື່ນໆໃນການພັດທະນາພື້ນຖານໂຄງລ່າງພາຍໃນເມືອງທີ່ຈຳເປັນ.
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ