ມີເດຍລາວແຂວງຈຳປາສັກ ກອງປະຊຸມ ແລກປ່ຽນບົດຮຽນວຽກງານຫ້ອງວ່າການ ແຂວງ ແລະ ເມືອງໂຂງ ໄດ້ມີຂຶ້ນ ໃນວັນທີ 26 ຕຸລາ 2021, ທີ່ຫ້ອງປະຊຸມຂອງເມືອງດັ່ງກ່າວ, ໂດຍການເປັນປະທານ ຂອງ ທ່ານ ວັນນະໄຊ ຊາດຕະກຸນ ກຳມະການພັກແຂວງ ຫົວໜ້າຫ້ອງວ່າການ ແຂວງຈຳປາສັກ, ມີ ຕາງໜ້າໃຫ້ບັນດາ ຂະແໜງການພາຍໃນຫ້ອງວ່າການແຂວງ, ໂດຍມີ ທ່ານ ສົມສະໜຸກ ຫອມກິ່ງແກ້ວ ຫົວໜ້າຫ້ອງວ່າ ການເມືອງ, ພ້ອມດ້ວຍໜ່ວຍງານທີ່ກ່ຽວຂ້ອງ ຂອງ ເມືອງ ເຂົ້າຮ່ວມ.

ທ່ານ ວັນນະໄຊ ຊາດຕະກຸນ ໄດ້ກ່າວ ໃນການລົງມາເຄື່ອນໄຫວ ເທື່ອນີ້ວ່າ: ແມ່ນ ເພື່ອເປັນການຊຸກຍູ້ ແລກປ່ຽນ ການຈັດຕັ້ງປະຕິບັດ ບົດບາດການປະຕິບັດໜ້າທີ່ວຽກງານຫ້ອງວ່າການ ໃຫ້ນັບມື້ ດີຂຶ້ນ, ຍົກສູງຄຸນນະພາບການເປັນເສນາທິການ ດ້ວຍການເອົາໃຈໃສ່ຄົ້ນຄ້ວາ ວິເຄາະວິໄຈບັນຫາ, ການສັງລວມຮັດກຸມ, ຊັດເຈນ, ສະໜອງໃຫ້ທັນເວລາ ເພີ່ມທະວີການນຳໃຊ້ລະບົບທັນສະໄໝ ເຂົ້າໃນວຽກງານເສນາທິການ ການປະສານງານຢ່າງໃກ້ ຊິດ ແລະ ກົມກຽວກັນຂຶ້ນຕື່ມ.

ກອງປະຊຸມ ໄດ້ຮັບຟັງການສະຫລຸບຜົນສຳເລັດການຈັດຕັ້ງ ປະຕິບັດວຽກງານຂອງຫ້ອງວ່າການ ຂອງເມືອງໂຂງ ໃນໄລຍະ 9 ເດືອນ ແລະ ທິດທາງແຜນການ 3 ເດືອນທ້າຍປີ 2021 ພ້ອມນັ້ນ, ກໍ່ໄດ້ສ່ອງແສງ ໃຫ້ເຫັນຈຸດອ່ອນ ແລະ ຂໍ້ຄົງຄ້າງ ໃນການເຄື່ອນໄຫວວຽກງານໃນໄລຍະຜ່ານມາ ແລະ ກອງປະຊຸມ ໄດ້ພ້ອມກັນປືກສາຫາລື ແລະ ແລກປ່ຽນຄຳຄິດຄຳເຫັນ ເພື່ອຈະເປັນຂໍ້ມູນ ແລະ ບົດຮຽນໃນການແກ້ໄຂວຽກງານ, ເພື່ອຊອກຫາວິທີແກ້ໄຂຮ່ວມກັນ ຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນ.

ຂ່າວ: ທັດຊະນະ