ນະຄອນຫຼວງວຽງຈັນ, ວັນທີ 27 ເດືອນຕຸລາ ປີ 2021 ໃນມື້ນີ້, ອົງການຢູນີເຊັບ​ປະຈໍາ ສປປ ລາວ ໄດ້ມອບອຸປະກອນໄອທີ ແລະ PPE ໃຫ້ສູນກາງ​ຊາວໜຸ່ມລາວ ​ເພື່ອສະໜັບສະໜູນການຮັບມືກັບພະຍາດໂຄວິດ-19 ​ຂອງລັດຖະບານແຫ່ງ ສປປ ລາວ, ໂດຍສະເພາະເພື່ອຊ່ວຍໃຫ້ຮັບປະກັນວ່າ​ການບໍລິການປົກປ້ອງເດັກຍັງຄົງສືບຕໍ່ດຳເນີນໄປໄດ້ ​ໂດຍເນັ້ນໃສ່ການໃຫ້ຄຳປຶກສາຜ່ານສາຍດ່ວນ​ເເລະ ໃຫ້ການຊ່ວຍເຫຼືອ​ແກ່ສູນກັກຕົວຊ່ວງ​​ການ​ແຜ່​ລະ​ບາດ​ຂອງພະຍາດ.

ອຸປະກອນຕ່າງໆ​ທີ່ໄດ້ນຳມາມອບໃຫ້ປະກອບມີ ເຈວລ້າງມື, ໜ້າກາກອະນາໄມ, ຖົງມືອະນາໄມ, ເຄື່ອງວັດແທກອຸນຫະພູມອິນຟຣາເຣດ, ຄອມພິວເຕີ, ໂນດບຸກ, ໂທລະສັບມືຖື, ກ້ອງຖ່າຍຮູບ ແລະ ອຸປະກອນອື່ນໆທີ່ກ່ຽວຂ້ອງກັບການຜະລິດສື່ອອນໄລນ໌​ເຊີ່ງມີມູນຄ່າລວມທັງໝົດປະມານ 85.000 ໂດລາສະຫະລັດ.

ພິທີມອບ-ຮັບອຸປະກອນດັ່ງກ່າວໄດ້ຈັດຂຶ້ນທີ່ຫ້ອງການສູນກາງ​ຊາວໜຸ່ມລາວ ໂດຍມີ ທ່ານ ດຣ. ​ອາລຸນໄຊ ສູນນະລາດ​, ເລຂາທິການໃຫຍ່ສູນກາງ​ຊາວໜຸ່ມລາວ ​ແລະ ​ທ່ານນາງ ດຣ. ເພຍ ເຣເບນໂລ ບຣິໂຕ, ຜູ້ຕາງໜ້າອົງການຢູນິເຊັບປະຈຳ ສປປ ລາວ ເຂົ້າຮ່ວມ.

ທ່ານ ດຣ. ​ອາລຸນໄຊ ສູນນະລາດ, ເລຂາທິການໃຫຍ່ສູນກາງ​ຊາວໜຸ່ມລາວ ​ກ່າວວ່າ: “ສູນກາງ​ຊາວໜຸ່ມລາວຂໍສະແດງຄວາມຂອບໃຈຢ່າງຈິງໃຈມາຍັງ ອົງການຢູນີເຊັບ ​ສໍາລັບການປະກອບສ່ວນນີ້ ເຊີ່ງເປັນການ​ຊ່ວຍເສີມສ້າງການບໍລິການປົກປ້ອງເດັກ​, ໂດຍສະເພາະແມ່ນການໃຫ້ຄໍາປຶກສາຜ່ານ​ສາຍດ່ວນຊ່ວຍເຫຼືອສໍາລັບໄວໜຸ່ມ ​ແລະ ເຍົາວະຊົນຊ່ວງ​ການລະບາດຂອງພະຍາດ ໂຄວິດ-19 ແລະ ໃນ​ອາ​ນາ​ຄົດ​.”  

ອຸປະກອນ PPE ທີ່ໄດ້ສະໜອງນັ້ນເເມ່ນ ຈະ​ໄດ້ແຈກຢາຍ​ໃຫ້ຍັງອົງການຈັດຕັ້ງຊາວໜຸ່ມ​ໃນທົ່ວປະເທດ, ໂດຍສະເພາະແມ່ນ​ພະນັກງານຂອງອົງການ ຈັດຕັ້ງຊາວໜຸ່ມທີ່ເປັນ​ພະນັກງານທີ່ຈໍາເປັນ​ພວມເຮັດວຽກ​ຊ່ວຍເຫຼືອຕາມ​ສູນກັກຕົວຕ່າງໆ, ທັງນີ້ກໍເພື່ອຮັບປະກັນຄວາມປອດໄພ ແລະ ຄວາມສາມາດໃນການໃຫ້​ບໍລິການຊ່ວຍຊີວິດແກ່ເດັກ​ ແລະ ຄອບຄົວຂອງພວກເຂົາໃນຊ່ວງ​ການລະບາດຂອງພະຍາດ​.

​ເພື່ອ​ຄວບ​ຄຸມ​ການ​​ລະບາດ​ຂອງ​ພະຍາດ​ ໂຄ​ວິດ-19, ອົງການຢູນິເຊັບ ຍັງ​ໄດ້​ສະໜັບສະໜູນ​ລັດຖະບານ​ແຫ່ງ ສປປ ລາວ ​ໃນ​ການຮັບຮອງເອົາ​​ວິທີແກ້ໄຂບັນຫາເເບບ​ໃໝ່​ໃນຫຼາຍໆຮູບເເບບເພື່ອ​ຮັບປະກັນ​ການ​ສືບ​ຕໍ່ໃຫ້​ບໍລິການ​ທີ່​ສຳຄັນ​ໃນ​​ການ​ປົກ​ປ້ອງ​ເດັກ, ລວມເຖີງ​ສາຍດ່ວນ​​ທີ່​ໃຫ້​ຄຳ​ປຶກສາ ​ແລະ ການ​ສົ່ງ​ຕໍ່​ໂດຍ​ພະນັກງານ ​ແລະ ອາສາ​ສະໝັກຂອງສູນກາງ​ຊາວໜຸ່ມລາວ​. ອຸປະກອນໄອທີທີ່ອົງການຢູນິເຊັບສະໜອງໃຫ້ນັ້ນຈະຊ່ວຍເພີ່ມຂະຫຍາຍການເຂົ້າເຖິງການບໍລິການສາຍດ່ວນຊ່ວຍເຫຼືອເຫຼົ່ານີ້ໃຫ້ແກ່ເດັກ​ໃນເຂດຫ່າງໄກສອກຫຼີກ ແລະ ເຂດທີ່ໃຊ້ພາສາຊົນເຜົ່າໃນນະຄອນຫຼວງວຽງຈັນ, ແຂວງຫຼວງພະບາງ, ແຂວງຫຼວງນ້ຳທາ ແລະ ແຂວງອຸດົມໄຊ.

ທ່ານນາງ ດຣ. ເພຍ ເຣເບນໂລ ບຣິໂຕ, ຜູ້ຕາງໜ້າອົງການຢູນິເຊັບປະຈຳສປປລາວກ່າວວ່າ: ​ອົງການຢູນິເຊັບຍັງຄົງເປັນຄູ່ຮ່ວມງານທີ່ມີຄວາມມຸ່ງໝັ້ນ​ຂອງສູນກາງ​ຊາວໜຸ່ມລາວ​ໃນຊ່ວງເວລາທີ່ຫຍຸ້ງຍາກທີ່ພວກເຮົາທຸກຄົນກໍາລັງປະເຊີນຢູ່. ພວກເຮົາຈະສືບຕໍ່ສະໜັບສະໜູນຄວາມມຸ່ງໝັ້ນ​​ຂອງລັດຖະບານແຫ່ງ ສປປ ລາວ ໃນການ​ບໍ່ປ່ອຍປະຖິ້ມໃຜຢູ່ເບື້ອງ​ຫຼັງ ແລະ ຮັບປະກັນການປົກປ້ອງເດັກໃຫ້ເປັນ​ບຸລິມະສິດໃນໄລຍະການລະບາດຂອງພະຍາດ ໂຄວິດ-19 ແລະ ໃນ​ອາ​ນາ​ຄົດ.​