ມີເດຍລາວແຂວງເຊກອງ
ກອງປະຊຸມຜູ້ບໍລິຫານການສຶກສາທິການ ແລະ ກິລາປະຈຳປີ 2021 ໄດ້ຈັດຂຶ້ນໃນລະຫວ່າງວັນທີ 25-26 ຕຸລາ 2021 ນີ້ຢູ່ທີ່ສະໂມສອນຫ້ອງວ່າການເມືອງດາກຈຶງແຂວງເຊກອງໂດຍພາຍໃຕ້ການເປັນປະທານຂອງທ່ານ ຄຳເພັດ ສອນຈະເລີນ ກຳມະການພັກເມືອງ ຮອງເຈົ້າເມືອງໆດາກຈຶງ, ມີທ່ານ ບຸນເຫຼືອ ແກ້ວມະນີໄລ ຄະນະພັກຮາກຖານຮອງຫົວໜ້າພະແນກສຶກສາທິການ ແລະ ກິລາແຂວງເຊກອງ, ທ່ານ ນາງ ທວມ ມະລາວັນ ກຳມະການພັກເມືອງຫົວໜ້າຫ້ອງການສຶກສາທິການ ແລະ ກິລາເມືອງດາກຈຶງ, ມີບັນດາຄະນະກຳມະການພັກເມືອງ, ຫົວໜ້າ-ຮອງຫ້ອງການ, ຜູ້ອຳການໂຮງຮຽນມັດທະຍົມຕົ້ນ-ປາຍ, ອຳນວຍການສູນການສຶກສານອກໂຮງຮຽນ, ປະຖົມ, ຫົວໜ້າກຸ່ມໂຮງຮຽນ ແລະ ອຳນວຍການລ້ຽງເດັກ-ອະນຸບານພ້ອມດ້ວຍເລຂາພັກບ້ານເທດສະບານເມືອງເຂົ້າຮ່ວມ.

ທ່ານ ອິນດາລາ ສາລີພອນ ຮອງຫົວໜ້າຫ້ອງການສຶກສາທິການ ແລະ ກິລາເມືອງໄດ້ລາຍງານການຈັດຕັ້ງປະຕິບັດແຜນພັດທະນາການສຶກສາສົກຮຽນ 2021 ແລະ ທິດທາງແຜນການສົກຮຽນ 2022, ທົ່ວເມືອງດາກຈຶງປະກອບມີ 54 ບ້ານ, ມີພົນລະເມືອງ 25,066 ຄົນ,ຍິງ 12,456 ຄົນ, ມີ 3.690 ຫຼັງຄາເຮືອນ, ມີ 4.599 ຄອບຄົວ, ປະກອບມີ 4 ຊົນເຜົ່າຄື: ເຜົ່າຕະລຽງ, ແຢະ, ກະຕູ ແລະ ຊົນເຜົ່າລາວລຸ່ມ, ຊຶ່ງມີໂຮງຮຽນການສຶກສາເດັກກ່ອນໄວຮຽນ ແລະ ການສຶກສາພາກບັງຄັບທັງໝົດ 77 ແຫ່ງ, ໃນນັ້ນມີໂຮງຮຽນລ້ຽງເດັກ 1 ແຫ່ງ, ອະນຸບານ 4 ແຫ່ງ, ໂຮງຮຽນປະຖົມສຶກສາ 61 ແຫ່ງ, ໂຮງຮຽນມັດທະຍົມ 11 ແຫ່ງ, ໃນນີ້ມັດທະຍົມຕອນຕົ້ນມີ 8 ແຫ່ງ, ມັດທະຍົມສົມບູນມີ 3 ແຫ່ງ ແລະ ມີສູນການສຶກສານອກໂຮງຮຽນມີ 1 ແຫ່ງ, ທົ່ວເມືອງມີພະນັກງານລັດຖະກອນສຶກສາທັງໝົດ 436 ຄົນ, ຍິງ 210 ຄົນ, ໃນນັ້ນມີຄູສອນອາສາສະໝັກ 45 ຄົນ, ຍິງ 12 ຄົນ, ຈຳນວນນັກຮຽນທັງໝົດມີ 8.567 ຄົນ, ຍິງ 4.209 ຄົນ, ຜົນການຈັດຕັ້ງປະຕິບັດແຜນປີຜ່ານມາທີ່ບັນລຸໄດ້ມີ 11 ຄາດໝາຍ, ໃກ້ຈະບັນລຸມີ 8 ຄາດໝາຍ ແລະ ຜົນສຳເລັດຂອງບັນດາຄາດໝາຍທີ່ສະພາປະຊາຊົນຂັ້ນແຂວງຮັບຮອງທີ່ບັນລຸມີ 7 ຄາດໝາຍ, ໃນຂະນະດ່ຽວກັນກອງປະຊຸມຍັງໄດ້ຜ່ານບົດມະຕິກອງປະຊຸມຜູ້ບໍລິຫານການສຶກສາ ແລະ ກິລາທົ່ວປະເທດປະຈຳສົກຮຽນ2020-2021 ຂອງກະຊວງສຶກສາສະບັບເລກທີ 3802/ສສກ, ລົງວັນທີ 2 ກັນຍາ 2021, ຜ່ານກົງຈັກການຈັດຕັ້ງ ແລະ ລາຍງານຜົນສຳເລັດການຈັດສັນຄູ, ແຜນຈັດສັນໃນ 5 ປີຕໍ່ໜ້າ, ລາຍງານຜົນສຳເລັດການຈັດຕັ້ງປະຕິບັດ 2 ຄາດໝາຍ ແລະ 11 ຄາດໝາຍທີ່ສະພາປະຊາຊົນແຂວງຮັບຮອງຮອດປີ 2025 ແລະ ວາງທິດທາງແຜນການຕໍ່ໜ້າ, ຜົນສຳເລັດການສ້າງແຜນ, ວິທີຈັດຕັ້ງປະຕິບັດການຮຽນ-ການສອນບຳລຸງຊັ້ນ ມ.ປາຍ ແລະ ທິດທາງແຜນການປີ 2025 ເພື່ອປະກາດເມືອງເປັນເມືອງຈົບມັດທະຍົມປາຍສຳລັບປະຊາຊົນ, ລາຍງານການພັດທະນາຄູຢ່າງມີຄຸນນະພາບຕອບສະໜອງຂໍ້ແຂງຂັ້ນສອນດີ-ຮຽນເກັ່ງ, ຜົນສຳເລັດການຈັດຕັ້ງປະຕິບັດການຕ້ານແລະ ສະກັດກັ້ນຢາເສບຕິດໃນໂຮງຮຽນ ແລະ ຜ່ານຂໍ້ຕົກລົງເລກທີ 429/ສສກ, ລົງວັນທີ 4 ກຸມພາ 2020 ວ່າດ້ວຍຮັບປະກັນຄຸນນະພາບການສຶກສາສຳລັບຊັ້ນປະຖົມຕື່ມອີກ.

ຕອນທ້າຍກອງປະຊຸມທ່ານ ຄຳເພັດ ສອນຈະເລີນ ກຳມະການພັກເມືອງຮອງເຈົ້າເມືອງ-ເມືອງດາກຈຶງກ່າວຕື່ມວ່າ: ຜູ້ບໍລິຫານງານການສຶກສາແຕ່ລະຂັ້ນຕ້ອງເພີ່ມທະວີຄວາມຮັບຜິດຊອບທາງດ້ານການເມືອງໃຫ້ສູງ, ເປັນຕົ້ນຝຶກຝົນຫຼໍຫຼອມຕົນເອງໃຫ້ກາຍເປັນພະນັກງານ-ຄູອາຈານທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີທັດສະນະຫຼັກໝັ້ນຕໍ່ອຸດົມການສັງຄົມນິຍົມ, ຊອກຮູ້ຮໍ່າຮຽນບັນດາທິດສະດີຕ່າງໆ, ເຊື່ອມຊຶມ, ກຳແໜ້ນ, ເຂົ້າໃຈຢ່າງເລິກເຊິ່ງຕໍ່ແນວທາງການປຽນແປງໃໝ່ຂອງພັກ-ລັດ, ມີຄວາມຈົງຮັກພັກດີຕໍ່ພັກການຈັດຕັ້ງ, ມີຄວາມຕື່ນຕົວສູງ ແລະ ເປັນເຈົ້າການ, ມີມະນະຈິດອົດທົນຜ່ານຜາຄວາມຫຍຸງຍາກ, ມີນໍ້າໃຈເສຍສະຫຼະເພື່ອປະຕິບັດໜ້າທີການເມືອງໃຫ້ສຳເລັດຜົນສູງ ແລະ ມີປະສິດທິຜົນດີຂຶ້ນ.

ພາບ- ຂ່າວ: ສີສັກດາ ບຸນໄຊຄຳ