ມີເດຍລາວແຂວງເຊກອງ ໃນວັນທີ 26 ຕຸລາ 2021 ນີ້,ໂຮງຮຽນການທະຫານທ້ອງຖິ່ນແຂວງເຊກອງ,ໄດ້ເປີດຮຽນກໍ່ສ້າງນາຍສິບ ຮຸ່ນທີ VI ປະຈຳສົກປີ 2021-2022,ໂດຍການເຂົ້າຮ່ວມເປັນປະທານຂອງສະຫາຍ ພັນເອກ ທອງສີ ກຸນສະນະ ,ຄະນະປະຈຳພັກແຂວງ,ຫົວໜ້າການທະຫານແຂວງເຊກອງ,ມີຄະນະພັກ – ຄະນະບັນຊາ ອົງການ 5 ຫ້ອງ,ຄະນະອຳນວຍການໂຮງຮຽນ,ພະແນກການກ່ຽວຂ້ອງ,ແຂກທີ່ຖືກເຊີນ,ພ້ອມດ້ວຍພະນັກງານຄູ-ອາຈານແລະນັກຮຽນກໍ່ສ້າງນາຍສິບ ຮຸ່ນທີ VI ເຂົ້າຮ່ວມ.

ສະຫາຍ ພັນໂທ ແສງເພັດ ພິວັນນ້ອຍ,ຮອງຫ້ອງເສນາທິການ ທະການແຂວງເຊກອງ,ໄດ້ຜ່ານຂໍ້ຕົກລົງຂອງກົມໃຫຍ່ເສນາທິການກອງທັບ,ເລກທີ 2223/ກສນ,ລົງວັນທີ 01/10/2021 ວ່າດ້ວຍການອະນຸມັດໃຫ້ໂຮງຮຽນການທະ ຫານທ້ອງຖິ່ນ ເປີດຮຽນກໍ່ສ້າງນາຍສິບ ຮຸ່ນທີ VI ປະຈຳສົກປີ 2021-2022,ຈາກນັ້ນ ສະຫາຍ ພັນຕີ ວິໄຊ ໄໝສະໝີ ,ຄະນະອຳນວຍການ,ຫົວໜ້າການທະຫານໂຮງຮຽນ,ໄດ້ຜ່ານແຜນການຝຶກແອບຮໍ່າຮຽນການກໍ່ສ້າງນາຍສິບ ຮຸ່ນທີVI ປະຈຳສົກປີ 2021-2022,ໂດຍປະຕິບັດຕາມໂຄງການຫຼັກສູດການສອນ-ການຮຽນກໍ່ສ້າງນາຍສິບທະຫານຮາບ ລະບົບ 1 ປີ ສະບັບປັບປຸງໃໝ່ ທີ່ໄດ້ເຊັນອະນຸມັດໂດຍກົມໃຫຍ່ເສນາທິການກອງທັບ,ຈຸດປະສົງແລະເປົ້າໝາຍສຳຄັນ ກໍ່ເພື່ອແນ່ໃສ່ປັບປຸງກໍ່ສ້າງນາຍ ແລະ ພົນທະຫານໃຫ້ມີຄວາມຮູ້ພື້ນຖານເຂົ້າໃນການຊີ້ນຳບັນຊາຂັ້ນຕົ້ນ,ມີຄວາມສາມາດຮັບຜິດຊອບສູງທາງດ້ານການເມືອງທີ່ການຈັດຕັ້ງມອບໝາຍໃຫ້,ແນ່ໃສ່ປັບປຸງກໍ່ສ້າງພະນັກງານ-ນັກຮົບໃຫ້ມີຄວາມຮັບຮູ້ເຊື່ອມຊຶມກຳໄດ້ສິດ-ໜ້າທີ່ພາລະບົດບາດຄວາມໝາຍ-ຄວາມສຳຄັນແລະຈັ່ງຫວະຂັ້ນພື້ນຖານວິຊາສະເພາະທາງດ້ານການເມືອງ-ການທະຫານ,ພະລາທິການ-ເຕັກນິກ,ຍົກສູງດ້ານລະດັບຄວາມຮູ້,ຄວາມສາມາດແລະສ້າງຄວາມເຂົ້າໃຈກຳໄດ້ບັນດາເນື້ອໃນທິດສະດີຫຼັກ ການ,ວິທີການຕ່າງໆ ເຂົ້າໃນການນຳໃຊ້ດ້ານສິນລະປະຍຸດ-ຍຸດທະວິທີ,ສາມາດນຳມາຈັດຕັ້ງຜັນຂະຫຍາຍຢູ່ໃນກົມກອງທ້ອງ ຖິ່ນຂອງຕົນ ໃຫ້ມີຄຸນນະພາບສູງຂື້ນຢ່າງບໍ່ຢຸດຢັ້ງ,ອີກຢ່າງກໍ່ເພື່ອແນ່ໃສ່ກຽມພ້ອມເຮັດສຳເລັດໜ້າທີ່ການເມືອງຂອງພັກ-ລັດ ແລະ ຂອງກອງທັບ ກໍ່ຄືຂອງກົມກອງວາງອອກຢ່າງຖືກຕ້ອງເຂັ້ມງວດ,ການຈັດຕັ້ງຝຶກແອບຮໍ່າຮຽນໃນຄັ້ງນີ້ ປະກອບມີ 3 ພາກຄື:ພາກການເມືອງ-ການທະຫານ ແລະ ພາກພະລາທິການ-ເຕັກນິກ,ເຊິ່ງມີນັກຮຽນມາຈາກ 4 ຕົວເມືອງ ແລະກົມກອງຂື້ນກັບເຂົ້າຮ່ວມທັງໝົດ 93 ສະຫາຍ ເຂົ້າຮ່ວມຢ່າງສົມກຽດ.

ໃນໂອກາດນີ້ ສະຫາຍ ພັນເອກ ທອງສີ ກຸນສະນະ ໄດ້ຮຽກຮ້ອງມາຍັງຄະນະຮັບຜິດຊອບບັ້ນອົບຮົມ-ຫັດແອບ,ຕະ ຫຼອດຮອດພະນັກງານຄູ-ອາຈານແລະນັກຮຽນແຕ່ລະສະຫາຍ,ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດຢ່າງເຂັ້ມງວດ ເຂົ້າໃນການຄົ້ນຄວ້າສຶກສາຮໍ່າຮຽນ,ພ້ອມທັງເປັນເຈົ້າການຮອບດ້ານໃນການຄຸ້ມຄອງຊຸກຍູ້ດ້ານວຽກງານອົບຮົມ-ຫັດແອບ,ເອົາໃຈໃສ່ຈັດຕັ້ງປະຕິບັດການຮຽນ-ການສອນໃຫ້ຖືກຕ້ອງຕາມແຜນການທີ່ໄດ້ກຳນົດໄວ້ໃຫ້ລະອຽດຈະແຈ້ງ,ເພື່ອແນ່ໃສ່ເຮັດໃຫ້ບັ້ນອົບຮົມ-ຫັດແອບກໍ່ສ້າງນາຍສິບ ຮຸ່ນທີ VI ປະຈຳສົກປີ 2021-2022 ຄັ້ງນີ້ ມີຜົນສຳເລັດແລະສາມາດຮັບປະກັນຄວາມສະຫງົບປອດໄພ 100 %.

ນັກຂ່າວ : ກອງບັນຊາການ ທະຫານແຂວງເຊກອງ
ຖ່າຍພາບ-ຂ່າວ : ຮ້ອຍເອກ ທອງມີ ຈັນທະວີວັນ