ມີເດຍລາວແຂວງຄຳມ່ວນ
ເພື່ອເປັນການກະກຽມໃນການລົງສູ່ໃນ ການຜະລິດລະດູແລ້ງຂອງພໍ່ແມ່ປະຊາຊົນບ້ານຫາດຊາຍຟອງໃຫ້ທ່ວງທັນກັບສະພາບການ ດັ່ງນັ້ນ ໃນຕອນເຊົ້າຂອງວັນທີ 25 ຕຸລາ 2021 ທ່ານ ຄຳມອນ ພົມພິພັກ ຮອງເຈົ້າເມືອງໆໜອງບົກພ້ອມຄະນະ ໄດ້ລົງຕິດຕາມໃນການກໍ່ສ້າງອ່າງຜ່ອນນ້ຳທີ່ບ້ານຫາດຊາຍຟອງ ເມືອງໜອງບົກແຂວງຄຳມ່ວນ ເຊິ່ງອ່າງຜ່ອນນໍ້າດັ່ງກ່າວແມ່ນນອນຢູ່ໃນກິດຈະກໍາໜຶ່ງຂອງໂຄງການກໍ່ສ້າງຊົນລະປະທານແຫ່ງທີ 2 ຂອງບ້ານຫາດຊາຍຟອງແລະ ໃນຈໍານວນໂຄງການຊົນລະປະທານ 28 ແຫ່ງໃນທົ່ວເມືອງໂດຍການກໍ່ສ້າງອ່າງຜ່ອນນໍ້າແມ່ນໄດ້ເລີ່ມລົງມືແຕ່ວັນທີ 17 ຕຸລາ 2021 ມີການຄາດຄະເນວ່າຈະໃຫ້ໄດ້ຊົມໃຊ້ເຂົ້າໃນການຜະລິດລະດູແລ້ງທີ່ຈະມາຮອດນີ້ ເຊິ່ງມູນຄ່າໃນການກໍ່ສ້າງອ່າງຜ່ອນນ້ຳແມ່ນ 55 ລ້ານກວ່າກີບ.

ສຳລັບເງິນທີ່ນໍາໃຊ້ເຂົ້າໃນການກໍ່ສ້າງໃນຄັ້ງນີ້ແມ່ນໄດ້ນຳໃຊ້ເງິນກອງທຶນຊົນລະປະທານຂອງບ້ານ ໂດຍແມ່ນປະຊາຊົນພາຍໃນບ້ານເປັນຜູ້ກໍ່ສ້າງເອງທັງໝົດ ໂດຍແມ່ນພໍ່ແມ່ປະຊາຊົນພາຍໃນ 3 ບ້ານເປັນຜູ້ໄດ້ຮັບຜົນປະໂຫຍດຄື : ບ້ານຫາດຊາຍຟອງ ,ບ້ານດົງຜັກເຜື້ອທີ່ຂຶ້ນກັບເມືອງໜອງບົກ ແຂວງຄໍາມ່ວນ ແລະ ບ້ານສະກອງທີ່ຂຶ້ນກັບເມືອງໄຊບູລີ ແຂວງສະຫວັນນະເຂດ ( ແຕ່ມີເນື້ອທີ່ທໍາການຜະລິດຢູ່ບ້ານຫາດຊາຍຟອງ ) ພ້ອມກັນນັ້ນທາງອໍານາດການປົກຄອງເມືອງໜອງບົກຈະໄດ້ຮີບຮ້ອນສະເໜີຂັ້ນແຂວງເພື່ອໃຫ້ຄົ້ນຄວ້າພິຈາ ລະນາໃນການດຶງຕາຂ່າຍໄຟຟ້າເຂົ້າສູ່ລະບົບຈັກສູບນໍ້າໃນໄວໆນີ້ຄາດວ່າຈະໃຫ້ສໍາເລັດ ແລະ ທັນຮັບໃຊ້ການຜະລິດລະດູ ແລ້ງໃນທ້າຍປີ 2021 ນີ້.