ມີເດຍລາວແຂວງຄຳມ່ວນ ໃນວັນທີ 15 ຕຸລາ 2021 ທີ່ຜ່ານມານີ້ ເຈົ້າໜ້າທີ່ ປ.ກ.ສ ແຂວງຄຳມ່ວນ ຮ່ວມກັບ ເຈົ້າໜ້າ ປ.ກ.ສ ເມືອງໜອງບົກ ໄດ້ນຳຜູ້ຖືກຫາ ຊື່ ທ້າວ ຈັນທະພອນ ລັດຖະຈັກ ຫຼື ( ໂອ້ຍ ) ອາຊີບເຮັດນາ ຢູ່ບ້ານ ນາວາງໃຫຍ່ ເມືອງໜອງບົກ ແຂວງຄຳມ່ວນທີ່ລົງມືຄາດຕະກຳທ້າວ ສີລະຄອນ ໄຊຍະລາດ ຫຼື ໂໝະ ( ນ້າບ່າວ ) ອາຍຸ 47 ປີ ອາຊີບເຮັດນາ ຄົນບ້ານດຽວກັນມາທົດສະກຳຂໍ້ມູນຄືນໃຫມ່ເພື່ອປະກອບໃສ່ຄຳສາລະພາບ ແລະ ສຳນວນຄະດີເພື່ອສົ່ງໄອຍະການສັ່ງຟ້ອງສານຕັດສິນ ແລະ ດຳເນີນຄະດີຜູ້ກ່ຽວຕາມລະບຽບກົດໝາຍ.

ຜ່ານການສືບສວນ-ສວນສວນຂອງເຈົ້າໜ້າທີ່ ກອງຄະດີວິຊາສະເພາະຂອງ ປ.ກ.ສ ເມືອງໜອງບົກໃຫ້ຮູ້ວ່າ : ໃນຄັ້ງວັນທີ 10 ຕຸລາ 2021 ຜູ້ກ່ຽວແມ່ນໄດ້ຮັບສາລະພາບລາຍງານຕໍ່ເຈົ້າໜ້າທີ່ວ່າ : ໃນວັນທີ 07 ຕຸລາ 2021 ຜູ້ກ່ຽວ ແລະ ທ້າວ ສີລະຄອນ ໄຊຍະລາດ ( ຜູ້ເສຍຊິວິດ ) ໄດ້ພາກັນ ໄປຂົນເຂົ້າຢູ່ນາຂອງຜູ້ເສຍຊິວິດ ພໍມາຮອດເວລາ 17 ໂມງ 30 ຂອງວັນດຽວກັນ ໃນຂະນະທີ່ ທ້າວ ສີລະຄອນ ( ຜູ້ເສຍຊິວິດ ) ກຳລັງຫາບເຂົ້າຢູ່ນັ້ນທ້າວ ຈັນທະພອນ ລັດຖະຈັກ ຫຼື ( ໂອ້ຍ ) ກໍ່ໄດ້ເອົາຈົກທີ່ຕຽມໄວ້ນັ້ນມາຕີໃສ່ບໍລິເວນກ້ານຄໍທາງຫຼັງທ້າວ ສີລະຄອນ ຈຳນວນ 1 ບາດ ເຮັດໃຫ້ທ້າວ ສີລະຄອນ ລົ້ມລົງໝູບໜ້າລົງໃສ່ນ້ຳໃນໄຮ່ນາ ແລະ ຜູ້ກ່ຽວໄດ້ຕີຊ້ຳອີກບ່ອນເກົ່າຈຳນວນ 02 ບາດ ແລ້ວຈັບຍັ້ນຄໍທ້າວ ສີລະຄອນ ລົງພື້ນນ້ຳ ປະມານ 10 ນາທີ ເຫັນວ່າ ທ້າວ ສີລະຄອນຕາຍແທ້ແລ້ວ ຜູ້ກ່ຽວກໍ່ໄດ້ນຳເອົາຫາບເຂົ້າທີ່ຜູ້ຕາຍຫາບມານັ້ນ ມາວາງໄວ້ສະຊາຍຕາມແຄມຄັນນາ ແລ້ວກໍ່ຂຶ້ນໄປຢູ່ເທີງຖຽງເຮັດຄືບໍ່ມີຫັຍງເກີດຂຶ້ນ.

ຈົນມາຮອດວັນທີ 10 ຕຸລາ 2021 ຈຶ່ງໄດ້ຖືກເຈົ້າໜ້າທີ່ ປ.ກ.ສ ເມືອງໜອງບົກ ກັກຕົວຜູ້ກ່ຽວມາສືບ ສວນ-ສອບສວນຈຶ່ງໄດ້ວ່າ : ສາເຫດ ແລະ ແຮງຈູງໃຈໃນການຄາຕະກຳຄັ້ງນີ້ ແມ່ນເກີດຈາກການແບ່ງປັນຊັບສິນເປັນ ຕົ້ນແມ່ນດີນນາບໍ່ເທົ່າກັນ ແລະ ຖືກຜູ້ເສຍຊິວິດເວົ້າຈານາບຂູ່ຢູ່ຕະຫຼອດມາຈຶ່ງເຮັດໃຫ້ຜູ້ກ່ຽວເກີດຄວາມຄຽດແຄ້ນ ອາຄາດບາດໝາງກັນຕະຫຼອດມາ ຈື່ງເຮັດໃຫ້ຜູ້ກ່ຽວລົງມືຄາຕະກຳໃນຄັ້ງນີ້ ປະຈຸບັນຄະດີດັ່ງກ່າວທາງເຈົ້າໜ້າທີ່ວິຊາສະ ເພາະ ພວມສະຫຼຸບສຳນວນຄະດີເພື່ອສົ່ງໄອຍະການສັ່ງຟ້ອງສານຕັດສີນລົງໂທດ ແລະ ປະຕິບັດຕາມຂັ້ນຕອນຂອງກົດໝາຍຕໍ່ໄປ.