ມີເດຍລາວແຂວງຈຳປາສັກ
ວັນທີ 28 ຕຸລາ 2021 ຜ່ານມານີ້ ທີ່ສະໂມສອນເມືອງ ກອງບັນຊາການ ປກສ ເມືອງໂຂງ ແຂວງຈຳປາສັກ ໄດ້ຈັດພິທີສະຫຼຸບວຽກງານປ້ອງກັນຄວາມສະຫງົບ 9 ເດືອນ ແລະ ວາງທິດທາງແຜນການ 3 ທ້າຍປີ 2021 ພ້ອມທັງເຊື່ອມຊືມເອກະສານຕ່າງໆຂອງສູນກາງ; ໃຫ້ກຽດເຂົ້າຮ່ວມເປັນປະທານກອງປະຊຸມຄັ້ງນີ້ໂດຍທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີບັນດາທ່ານໃນຄະນະພັກ, ຄະນະກອງບັນຊາການ ປກສ ເມືອງ ແລະ ອ້າຍນ້ອງໃນກຳລັງກອງບັນຊາການເຂົ້າຮ່ວມຢ່າງພ້ອມພຽງ.

ໃນພິທີ; ຄະນະກອງບັນຊາການ ປກສ ເມືອງໂຂງ ກໍໄດ້ພັດປ່ຽນກັນຂຶ້ນຜ່ານເອກະສານເປັນຕົ້ນ: ມະຕິຄະນະບໍລິຫານງານສູນກາງພັກ ເລກທີ 03/ຄສພ ວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລີກເຊິ່ງວຽກງານພະນັກງານ; ຄຳສັ່ງຄະນະເລຂາທິການສູນກາງພັກ ເລກທີ 190/ຄລສພ ວ່າດ້ວຍການປັບປຸງກົງຈັກການຈັດຕັ້ງຂອງບັນດາກະຊວງ-ອົງການ ແລະ ທ້ອງຖິ່ນ; ມະຕິກອງປະຊຸມຄົບຄະນະ ຄັ້ງທີ 5 ຂອງແຂວງ ແລະ ຄັ້ງທີ 7 ສະໄໝທີ VIII ຂອງເມືອງ; ຄ່ຳສັ່ງແນະນຳກ່ຽວກັບການເພີ່ມທະວີເອົາໃຈໃສ່ຊີ້ນຳ-ນຳພາ, ກວດກາ ແລະ ຊຸກຍູ້ຢ່າງເດັດຂາດໃນການສືບສວນ-ສອບສວນຄະດີອາຍາ; ຜ່ານບົດແນະນຳເລກທີ 194/ຄກສພ ວ່າດ້ວຍການຈັດຕັ້ງປະຕິບັດກົດລະບຽບຂອງພັກ ສະໄໝທີ XI ກ່ຽວກັບວຽກງານຕິດຕາມກວດກາຂອງພັກ, ຄະນະກວດກາພັກ ແລະ ຄະນະວິໄນຂອງພັກແຕ່ລະຂັ້ນ ແລະ ດຳລັດເລກທີ 474/ລບ ວ່າດ້ວຍເຈົ້າໜ້າທີ່ລົດໄຟ.

ໂອກາດນີ້ ທ່ານ ພັຕ ບົວລະພັນ ສິມມາລາ ຫົວໜ້າພະແນກຫ້ອງການ ກອງບັນຊາການ ປກສ ເມືອງໂຂງໄດ້ຜ່ານບົດສະຫຼຸບວຽກງານປ້ອງກັນຄວາມສະຫງົບໄລຍະ 9 ເດືອນ ໂດຍຍົກໃຫ້ເຫັນວ່າ: ໄດ້ມີຄະດີອາຍາເກີດຂຶ້ນທັງໝົດ 52 ລາຍ; ໃນນີ້ ແມ່ນຄະດີຂົ່ມຂືນທຳສຳເລົາ 4 ລາຍ, ການທຳສຳເລົາເດັກ 1 ລາຍ, ເຮັດໃຫ້ຜູ້ອື່ນເສຍຊີວິດດ້ວຍຄວາມບໍລະວັງ 2 ລາຍ, ລັກຊັບ 25 ລາຍ, ທຳຮ້າຍຮ່າງກາຍ 4 ລາຍ, ຫາປາຜິດກົດໝາຍ (ຊ໋ອດປາ ແລະ ເບື່ອປາ) 3 ລາຍ, ປຸ້ນຊັບ 2 ລາຍ, ມີອາວຸດລ່າເນື້ອໄວ້ໃນຄອບຄອງໂດຍບໍ່ຖືກຕ້ອງ 1 ລາຍ, ການເຮັດໃຫ້ຜູ້ອື່ນອັບອາຍ 1 ລາຍ, ອາລະວາດ 2 ລາຍ, ເຮັດໃຫ້ຄົນອື່ນໄດ້ຮັບບາດເຈັບດ້ວຍຄວາມບໍ່ລະວັງ 1 ລາຍ, ທຳມິດສະຈານ 3 ລາຍ, ທຳລາຍຊັບສິນເປ່ເພໂດຍບໍ່ເຈຕະນາ 1 ລາຍ, ທຳລາຍ ຫຼືເຮັດໃຫ້ຊັບສິນຄົນອື່ນເປ່ເພໂດຍເຈຕະນາ 2 ລາຍ ແລະ ໃນນີ້ ແມ່ນສາມາດມ້າງໄດ້ 33 ລາຍ, ມີ 43 ຄົນ, ຍິງ 1 ຄົນ.

ສຳລັບວຽກງານສະກັດກັ້ນການຊື້-ຂາຍຢາເສບຕິດ ສາມາດມ້າງຄະດີຢາເສບຕິດໄດ້ 54 ລາຍ, ມີ 129 ຄົນ, ຍິງ 12 ຄົນ, ຍຶດຂອງກາງຢາເສບຕິດປະເພດຢາບ້າໄດ້ຈຳນວນ 1.682 ເມັດ, ຢາໄອສ 1 ຫຼອດ, ປືນປາກກາ 2 ກະບອກ, ຈັກສະຕິນ 2 ເຄື່ອງ, ລົດໄຖນາຍ່າງຕາມ 1 ຄັນ, ໂທລະສັບ 4 ເຄື່ອງ.
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ