ວັນທີ 2 ພະຈິກ 2021 ລັດຖະບານແຫ່ງ ສປປ ລາວ ໄດ້ຮັບ ວັກຊີນປ້ອງການພະຍາດ ໂຄວິດ-19, ແອສຕຼາຊີນິກາ/ອັອກຟອດ ຈໍານວນ 523,200 ໂດສ໌ ຜ່ານ COVAX Facility- ເຊີ່ງແມ່ນ​ການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), Gavi, ແລະ ອົງການອະນາໄມໂລກ, ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ ​ ເຊີ່ງພິທີມອບ-ຮັບ ວັກຊີນຈຳນວນດັ່ງກ່າວເເມ່ນໄດ້ຈັດຂຶ້ນຢູ່ທີ່ສະໜາມບິນສາກົນວັດໄຕ.  

ວັກຊີນປ້ອງກັນພະຍາດໂຄວິດ-19 ຊຸດໃໝ່ນີ້ ຈະຊ່ວຍໃຫ້ ສປປ ລາວ ສາມາດບັນລຸເປົ້າໝາຍ ການສັກວັກຊີນໃຫ້ໄດ້ 50 ເປີເຊັນ ຂອງປະຊາກອນທັ່ງໝົດໃນປີ 2021.

ພິທີມອບ-ຮັບວັກຊີນດັ່ງກ່າວ ໄດ້ຮັບກຽດເປັນປະທານໂດຍ ພະນະທ່ານ ດຣ. ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ແຫ່ງ ສປປ ລາວ, ແລະ ຍັ່ງເຂົ້າຮ່ວມໂດຍ ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ, ດຣ. ຈຸ້ນ ເກົ່າ, ຜູ້ຕາງໜ້າ ອົງການອານາໄມໂລກ ປະຈໍາ ສປປ ລາວ ແລະ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າອົງການຢູນິເຊັບ ປະຈຳ ສປປ ລາວ, ພ້ອມດ້ວຍບັນດາຄູ່ຮ່ວມພັດທະນາ.

ລັດຖະບານ ແຫ່ງ ສປປ ລາວ ຂໍສະແດງຄວາມຂອບໃຈຢ່າງສຸດຊຶ້ງ ຕໍ່ການຊ່ວຍເຫຼືອຂອງ COVAX Facility ໃນການຈັດຫາວັກຊີນຊ່ວຍຊີວິດເຫຼົ່ານີ້ໃຫ້ແກ່ປະຊາຊົນລາວ, ເຊິ່ງໄດ້ເລີ່ມຈັດສົ່ງວັກຊີນມາຊ່ວຍ ສປປ ລາວ ຕັ້ງແຕ່ຕົ້ນປີ 2021 ເປັນຕົ້ນມາ. ພວກເຮົາຂໍຍ້ອງຍໍຊົມເຊີຍ COVAX Facilityທີ່ມີຄວາມມຸ່ງໝັ້ນເພື່ອຮັບປະກັນການເຂົ້າເຖິງວັກຊີນກັນພະຍາດໂຄວິດ-19 ຢ່າງເທົ່າທຽມກັນໃນທົ່ວໂລກ. ການສົ່ງມອບວັກຊີນໃໝ່ນີ້ຈະຊ່ວຍເລັ່ງໃຫ້ ສປປ ລາວ ບັນລຸເປົ້າໝາຍການສັກຢາກັນພະຍາດໂຄວິດ-19 ໃຫ້ໄດ້ 50 ເປີເຊັນ ຂອງປະຊາກອນທັງໝົດໃນປີ 2021,” ກ່າວໂດຍ ພະນະທ່ານ ດຣ. ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ແຫ່ງ ສປປ ລາວ.

ວັກຊີນດັ່ງກ່າວຈະຖືກນໍາໃຊ້ກັບກຸ່ມທີ່ມີຄວາມສ່ຽງສູງຕໍ່ການຕິດເຊື້ອພະຍາດ ໂຄວິດ-19 ຂັ້ນຮ້າຍແຮງ ແຕ່ຍັງບໍ່ທັນໄດ້ຮັບວັກຊີນຄົບເຂັມເທື່ອ. ກຸ່ມບູລິມະສິດສຳລັບການສັກຢາກັນພະຍາດໂຄວິດ-19 ເເມ່ນປະກອບມີ ພະນັກງານສາທາລະນະສຸກແຖວໜ້າ, ຜູ້ສູງອາຍຸ 60 ປີຂຶ້ນໄປ, ຄົນທີ່ມີພະຍາດປະຈໍາໂຕ, ແມ່ຍິງຖືພາ ແລະ ບຸກຄະລາກອນທີ່ສໍາຄັນ ເຊັ່ນ: ຄູສອນ ແລະ ພະນັກງານໃນທົ່ວປະເທດ, ອີງຕາມທີ່ລະບຸໄວ້ໃນ ແຜນປະຕິບັດການສັກວັກຊີນກັນພະຍາດ ໂຄວິດ-19  ແຫ່ງຊາດ.

ທ່ານ ດຣ ເກົ່າ ຈຸ້ນ, ຜູ້ຕາງໜ້າອົງການອະນາໄມໂລກປະຈຳ ສປປ ລາວ, ໄດ້ກ່າວ: “ນີ້​ຖືເປັນ​ອີກ​ບາດກ້າວ​ໜຶ່ງ​ທີ່​ສຳຄັນ​ໃນ​ຄວາມ​ພະຍາຍາມ ທີຈະ​ຕອບ​ໂຕ້ກັບການລະບາດຂອງພະຍາດ ໂຄວິດ-19 ຂອງ ສປປ ລາວ. ດຽວນີ້ພວກເຮົາໃກ້ຮອດເປົ້າໝາຍການສັກວັກຊີນສຳລັບປີ 2021 ແລ້ວ ແລະ ການສະໜອງວັກຊີນໃນຄັ້ງນີ້ ແມ່ນການປະກອບສ່ວນອັນໃຫຍ່ຫຼວງຈາກ COVAX Facility ເພື່ອຊ່ວຍໃຫ້ພວກເຮົາບັນລຸເປົ້າໝາຍດັ່ງກ່າວ, ພ້ອມທັງຈະຊ່ວຍໃຫ້ພວກເຮົາໃຫ້ສາມາດຄວບຄຸມການລະບາດໃນຊຸມຊົນ ໃນ ສປປ ລາວ ໄດ້ຕື່ມອີກ. ວັກຊີນໂຄວິດ-19 ນີ້ ເເມ່ນມີຄວາມປອດໄພ ແລະ ມີປະສິດທິພາບໃນການປ້ອງກັນຈາກອາ​ການ​ຮ້າຍ​ແຮງ​  ແລະ ການເສຍຊີວິດ, ລວມທັງຕ້ານກັບສາຍພັນ delta.”

ມາຮອດວັນທີ 31 ຕຸລາ 2021, ປະມານ 45 ເປີເຊັນຂອງປະຊາກອນລາວເເມ່ນໄດ້ຮັບວັກຊີນປ້ອງກັນພະຍາດໂຄວິດ-19 ຢ່າງ ໜ້ອຍ 1 ເຂັມ ແລະ ປະມານ 39 ເປີເຊັນ ແມ່ນໄດ້ຮັບວັກຊີນປ້ອງກັນພະຍາດໂຄວິດ-19 ຄົບຈໍານວນແລ້ວ.

ອົງການຢູນີເຊັບ ພູມໃຈທີ່ໄດ້ເປັນສ່ວນໜຶ່ງຂອງ COVAX Facility ແລະ ຊ່ວຍໃນການຕອບໂຕ້ພະຍາດ ໂຄວິດ-19 ໃນ ສປປ ລາວ. ພວກເຮົາຈະສືບຕໍ່ເຮັດວຽກຮ່ວມກັບບັນດາຄູ່ຮ່ວມງານຂອງພວກເຮົາ ເພື່ອຮັບປະກັນໃຫ້ ສປປ ລາວ ສາມາດເຂົ້າເຖິງວັກຊີນກັນພະຍາດ ໂຄວິດ-19 ໄດ້ຢ່າງເທົ່າທຽມກັບນາໆປະເທດ, ເອົາໃຈໃສ່ແນະນໍາເພື່ອຮັບປະກັນການສະໜອງວັກຊີນກັນພະຍາດໂຄວິດ-19 ໃຫ້ແກ່ ສປປ ລາວ ແລະ ປະກອບສ່ວນເສີມກໍາລັງຄວາມສາມາດໃນການຮັບມືກັບການລະບາດຂອງພະຍາດດັ່ງກ່າວ. ພວກເຮົາຂໍຂອບໃຈເປັນຢ່າງຍິ່ງມາຍັງບັນດາຄູ່ຮ່ວມງານ ກໍຄື ອົງການກາວີ ແລະ COVAX ທີ່ໃຫ້ການຊ່ວຍເຫຼືອວຽກງານສັກຢາກັນພະຍາດ ໂຄວິດ-19 ໃຫ້ແກ່ປະຊາຊົນລາວ. ພວກເຮົາທຸກຄົນຕ້ອງໄດ້ສືບຕໍ່ຮ່ວມມືກັນຕ້ານພະຍາດ ໂຄວິດ-19 ຢ່າງສາມັກຄີ ຍ້ອນວ່າຈະບໍ່ມີໃຜປອດໄພຈົນກວ່າທຸກຄົນຈະປອດໄພ,” ກ່າວໂດຍ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າອົງການຢູນີເຊັບ ປະຈຳ ສປປ ລາວ.

ສະມາຊິກສະພາບໍລິຫານງານຂອງ Gavi ທີ່ມີ​ຕົວແທນໃນ ​ສປປ ລາວ ປະກອບມີ ອົດສະຕາລີ, ການາດາ, ຄະນະກຳມາທິການສະຫະພາບເອີຣົບ, ຝຣັ່ງ, ເຢຍລະມັນ, ຍີ່ປຸ່ນ, ສາທາລະນະລັດເກົາຫຼີ, ລັກແຊມເບີກ, ສະວິດເຊີແລນ, ລາດຊະອານາຈັກອັງກິດ ແລະ ສະຫະລັດອາເມລິກາ.

COVAX ແມ່ນການນຳພາຮ່ວມກັນ ໂດຍ Gavi ຊຶ່ງແມ່ນ​ພັນທະມິດດ້ານ​ວັກຊີນ, ອົງ​ການ​ອະ​ນາ​ໄມ​ໂລກ ແລະ CEPI ທີ່​ເຮັດວຽກຮ່ວມກັບ ອົງການຢູນິເຊັບ​ ພ້ອມທັງທະນາຄານໂລກ, ອົງການຈັດຕັ້ງສັງຄົມ​, ຜູ້ຜະລິດ, ແລະ ອື່ນໆ. COVAX ແມ່ນສ່ວນໜຶ່ງຂອງແຜນງານການເຂົ້າເຖິງເຄື່ອງມືໂຄວິດ-19 (ACT) ​ຊຶ່ງແມ່ນການຮ່ວມມືທົ່ວ​ໂລກຄັ້ງສໍາຄັນ​ເພື່ອເລັ່ງລັດການພັດທະນາ, ການຜະລິດ ແລະ ການເຂົ້າເຖິງຢ່າງເທົ່າທຽມກັນຕໍ່​ການກວດຫາ​, ການປິ່ນປົວ​ ແລະ ການສັກ​ວັກຊີນກັນພະຍາດ.

ວັກຊີນແອສຕຼາຊີນິກາ/ອັອກຟອດ (Astra Zeneca/Oxford), ທີ່ຈັດສົ່ງມາຊຸດນີ້ແມ່ນຜະລິດຢູ່ທີ່ ສາທາລະນະລັດເກົາຫຼີ ໂດຍບໍລິສັດວິທະຍາສາດຊີວະພາບ SK ຈໍາກັດ (SK Bio). ວັກຊີນດັ່ງກ່າວ ແມ່ນໄດ້ຮັບອະນຸຍາດໃຫ້ນໍາໃຊ້ໃນພາວະສຸກເສີນ ໂດຍ ອົງການອານາໄມໂລກ ແລະ ກົມອາຫານ ແລະ ຢາ, ກະຊວງສາທາລະນະສຸກ.