ມີເດຍລາວແຂວງສາລະວັນ
ແຂວງສາລະວັນ ຍັງສືບຕໍ່ເພີ່ມທະວີຄວາມເຂັ້ມງວດໃນການເຂົ້າ-ອອກແຂວງ ແລະ ປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19, ໂດຍສະເພາະໄດ້ອອກແຈ້ງການ ສະບັບທີ 23 ສືບຕໍ່ປະຕິບັດໄປອີກ 14 ວັນ, ນັບແຕ່ວັນທີ 2-15 ພະຈິກ 2021, ແນໃສ່ຄວບຄຸມການແຜ່ເຊື້ອພະຍາດພາຍໃນແຂວງ, ຫຼັງຈາກພົບຜູ້ຕິດເຊື້ອຕິດຕໍ່ກັນໃນແຕ່ລະວັນພາຍໃນຊຸມຊົນ ເປັນຕົ້ນ: ເມືອງສາລະວັນ, ເລົ່າງາມ ແລະ ເມືອງສະໝ້ວຍ.

ຄະນະສະເພາະກິດປ້ອງກັນພະຍາດໂຄວິດ-19 ແຂວງສາລະວັນ ໄດ້ອອແຈ້ງການໃນວັນທີ 1 ພະຈິກນີ້ ໂດຍໄດ້ປະເມີນສະຖານະການແຕ່ລະໄລຍະ ເພື່ອຄວບຄຸມການຕິດຕໍ່ພະຍາດດັ່ງກ່າວ ໄດ້ກຳນົດເວລາປະຕິບັດໄປອີກ 14 ວັນ ເປັນຕົ້ນ: ສືບຕໍ່ປະຕິບັດບັນດາມາດຕະການທີ່ເຄີຍຈັດຕັ້ງປະຕິບັດມາ ແລະ ເພີ່ມຄວາມເຂັ້ມງວດບາງພື້ນທີ່ບ້ານ, ກຳນົດບ້ານເຂດແດງທີ່ມີຜູ້ຕິດເຊື້ອ, ເອົາໃຈໃສ່ໃນການຄວບຄຸມ, ຕິດຕາມ ຢ່າງໃກ້ຊິດຂອງເຈົ້າໜ້າທີ່ ໂດຍສະເພາະຕັ້ງຈຸດກວດກາ, ເວນຍາມ, ການເຂົ້າ-ອອກ ຢ່າງມີລະບຽບການ, ເຈົ້າໜ້າທີ່ແພດໝໍ ກໍ່ໄດ້ສຸມໃສ່ການສັກວັກຊິນໃຫ້ພໍ່ແມ່ປະຊາຊົນ ແລະກຸ່ມເປົ້າໝາຍຕ່າງໆໃຫ້ທົ່ວເຖິງ, ເອົາໃຈໃສ່ເຄື່ອນໄຫວພົ່ນຢາຂ້າເຊື້ອໃນຈຸດບໍລິເວນທີ່ມີຄວາສ່ຽງ, ລົງເກັບກຳຂໍ້ມູນ ປະຫວັດການເຄື່ອນໄຫວຜູ້ຕິດເຊື້ອ ແລະເລັ່ງເກັບຕົວຢ່າງຊອກຫາເຊື້ອພະຍາດໂຄວິດ-19.

ນອກນັ້ນ ຍັງໄດ້ຫ້າມຈັດງານບຸນປະເພນີຕ່າງໆ ເຊັ່ນ: ບຸນບ້ານ, ອະນຸຍາດໃຫ້ເຖົ້າແກ່ແນວໂຮມ ເຮັດພິທີຕາມຮີດຄອງປະເພນີ, ທັງໄດ້ໃຫ້ກໍານົດບ້ານເຂດແດງ, ເຂດເຫຼືອງ ໃນ 3 ເມືອງ ຢ່າງຊັດເຈນ ເພື່ອສະດວກໃນການຕິດຕາມ, ຄວບຄຸມການໄປມາຫາສູ່ ທີ່ຈະເປັນວົງຈອນການແຜ່ເຊື້ອ ເຊັ່ນ: ເມືອງສາລະວັນ, ເມືອງເລົ່າງາມ ແລະ ເມືອງສະໝ້ວຍ.

ມາຮອດປັດຈຸບັນ ແຂວງສາລະວັນ ມີຜູ້ຕິດເຊື້ອພະຍາດໂຄວິດ-19 ສະສົມທັງໝົດ 1.838 ຄົນ ແລະກຳລັງປິ່ນປົວ ຈຳນວນ 120 ຄົນ. ເຊິ່ງໄດ້ປິ່ນປົວຫາຍດີແລ້ວ 1.715. ນອກນັ້ນມີຜູ້ເສຍຊິວິດ 3 ກໍລະນີ. ຕໍ່ກັບສະພາບດັ່ງກ່າວ ການຕິດເຊື້ອຈາກແຮງງານນຳເຂົ້າ ຫຼຸດລົງ, ແຕ່ສຳລັບການຕິດເຊື້ອໃນຊຸມຊົນ ເພີ່ມຂຶ້ນໃນແຕ່ລະວັນ ໂດຍສະເພາະພະນັກງານດ່ານໜ້າ ແລະ ແຜ່ລາມໃສ່ບຸກຄົນໃນຄອບຄົວ, ຜູ້ສຳຜັດໃກ້ຊິດ ຈື່ງເຮັດໃຫ້ມີການຕິດເຊື້ອເພີ່ມຂຶ້ນ.
ໂດຍ: ນາງ ທິດລານີ ໂຄດໂຍທາ