ມີເດຍລາວແຂວງຄຳມ່ວນ ພິທີພົບປະຫາລືວຽກງານການນຳເຂົ້າ-ສົ່ງອອກ ສິນຄ້າ ທີ່ດ່ານທ້ອງຖິ່ນທ່າເຮືອ ທ່າແຂກ-ນະຄອນພະນົມ ຈັດຂຶ້ນທີ່ດ່ານຂົວມິດຕະພາບແຫ່ງທີ 3 ໃນວັນທີ 03 ພະຈິກ 2021 ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ສາທິດ ລຸຈະນະເສລີ ຜູ້ວ່າຣາຊະການຈັງຫວັດນະຄອນພະນົມ ພ້ອມດ້ວຍຄະນະ ການນຳຂອງແຂວງຄຳມ່ວນ ແລະ ຄະນະຜູ້ບໍລິຫານຈັງຫວັດນະຄອນພະນົມເຂົ້າຮ່ວມ. ພາຍໃຕ້ການປະຕິບັດມາດ ຕະການປ້ອງກັນການແຜ່ລະບາດພະຍາດໂຄວິດ-19 ຢ່າງເຂັ້ມງວດ

ກອງປະຊຸມປຶກສາຫາລືດັ່ງກ່າວ ທ່ານເຈົ້າແຂວງທັງສອງຝ່າຍແມ່ນ ໄດ້ມອບໃຫ້ຮອງເຈົ້າແຂວງຄຳມ່ວນ ທ່ານ ປອ. ແກ້ວອຸດອນ ບຸດສິງຂອນ ແລະ ທ່ານ ສຸວິດ ຈັນຫວນ ຮອງຜູ້ວ່າຣາຊະການຈັງຫວັດນະຄອນພະນົມ ສືບຕໍ່ນໍາພາດຳເນີນກອງປະຊຸມ. ເຊິ່ງໃນນັ້ນແມ່ນໄດ້ລົງເລິກເຖິງຄວາມເປັນໄປໄດ້ໃນການນຳເຂົ້າ-ສົ່ງອອກສິນຄ້າ ຜ່ານດ່ານທ້ອງຖິ່ນ (ດ່ານທ່າເຮືອ) ທ່າແຂກ-ນະຄອນພະນົມ ໃນເງື່ອນໄຂທີ່ມີການປະຕິບັດມາດຕະການປ້ອງ ກັນການ ແຜ່ລະບາດ ໂຄວິດ-19.

ເນື່ອງຈາກການນຳເຂົ້າ-ສົ່ງອອກສິນຄ້າຜ່ານດ່ານສາກົນ ແມ່ນມີ ຄ່າໃຊ້ຈ່າຍທີ່ສູງ ເຮັດໃຫ້ ສິນຄ້າບາງ ລາຍການ ໂດຍສະເພາະສິນຄ້າຍ່ອຍບໍ່ສາມາດນຳເຂົ້າ-ສົ່ງອອກໄດ້. ທາງຄະນະຝ່າຍຈັງຫວັດ ນະຄອນພະນົມ ຈຶ່ງໄດ້ນຳສະເໜີຕໍ່ການນຳຂອງແຂວງຄຳມ່ວນ ເພື່ອຄົ້ນຄວ້າປຶກສາຫາລື ເພື່ອໃຫ້ມີການແລກປ່ຽນ ຊື້-ຂາຍ ສິນຄ້າຜ່ານດ່ານທ່າເຮືອ ເພື່ອເປັນການຂັບເຄື່ອນເສດຖະກິດຂອງສອງປະເທດ ກໍ່ຄື ສອງແຂວງຄຳມ່ວນ-ນະຄອນພະນົມ ໂດຍພາຍໃຕ້ການປະຕິບັດມາດຕະການປ້ອງກັນ ພະຍາດໂຄວິດ-19 ຢ່າງເຂັ້ມງວດ ເປັນຕົ້ນ: ພະນັກງານ-ກຳມະກອນ ທີ່ບໍລິການສິນຄ້າຕ້ອງໄດ້ຮັບວັກຊິນຄົບໂດສ ແລະ ມີການກວດຫາເຊື້ອໂຄວິດ-19 ໃນເວລາທີ່ກຳນົດຢ່າງຕໍ່ເນື່ອງ, ການຂົນສິນຄ້າຂຶ້ນ-ລົງດ່ານ ແມ່ນໃຫ້ນຳໃຊ້ ກຳມະກອນຂອງແຕ່ລະປະເທດ ໂດຍບໍ່ອະນຸດຍາດໃຫ້ກຳມະກອນຂອງຝ່າຍໃດຝ່າຍໜຶ່ງເຂົ້າມາໄດ້ ແລະ ການປະ ຕິບັດມາດຕະການອື່ນໆ.


/ສ່ວນທາງດ້ານຝ່າຍລາວ ແມ່ນເຫັນວ່າຍັງມີຄວາມເຂັ້ມງວດໃນການປະຕິບັດມາດຕະການຕາມຄຳສັ່ງເລກທີ 06 ຂອງທ່ານນາຍົກລັດຖະມົນຕີ ກໍ່ຄືການປິດປະເທດ ອະນຸຍາດໃຫ້ແຕ່ລົດຂົນສົ່ງສິນຄ້າ ເຂົ້າ-ອອກ ຜ່ານດ່ານສາກົນເທົ່ານັ້ນ ສ່ວນດ່ານປະເພນີ, ດ່ານທ້ອງຖິ່ນແມ່ນຍັງສືບຕໍ່ປິດ ເຊິ່ງໂດຍລວມແລ້ວທາງແຂວງຄຳມ່ວນ ແມ່ນຈະຕ້ອງໄດ້ສືບຕໍ່ປະຕິບັດຕາມມາດຕະການລວມສູນຂອງລັດຖະບານ. ສະນັ້ນຕໍ່ກັບຄຳສະເໜີຂອງຝ່າຍ ຈັງຫວັດນະຄອນພະນົມ ທາງແຂວງຄຳມ່ວນແມ່ນຍັງບໍ່ສາມາດອະນຸຍາດໃຫ້ເປີດການຂົນສົ່ງສິນຄ້າ ຜ່ານດ່ານທ່າ ເຮືອ ດັ່ງກ່າວໄດ້ ນອກຈາກສະພາບການແຜ່ລະບາດຢູ່ ສປປ ລາວ ຈະມີການຜ່ອນຄາຍລົງ ແລະ ລັດຖະບານມີການ ຜ່ອນຜັນໄດ້ໃນຕໍ່ໜ້າ.


/ໃນໂອກາດທີ່ທາງຄະນະຜູ້ບໍລິຫານຈັງຫວັດນະຄອນພະນົມ ໄດ້ເດີນທາງມາພົບປະປຶກສາຫາລືກັບຄະນະ ຝ່າຍແຂວງຄຳມ່ວນຄັ້ງນີ້ ຍັງໄດ້ນຳເອົາເຄື່ອງອຸປະກອນປ້ອງກັນໂຄວິດ-19 ມອບໃຫ້ແກ່ແຂວງຄຳມ່ວນ ເຊິ່ງປະກອບ ມີ: ຊຸດກວດຫາເຊື້ອ ATK ຈຳນວນ 1.000 ຊຸດ, ຜ້າປິດປາກ 4.200 ແຜ່ນ ແລະ ຢາສະໝຸນໄພ ຈຳນວນ 169 ກະປຸກ.
ຂ່າວ: ກອງຄຳ