ມີເດຍລາວແຂວງຈຳປາສັກ ໃນວັນທີ 3 ພະຈິກ 2021, ທີ່ຫ້ອງວ່າການແຂວງຈຳປາສັກ. ທ່ານ ປອ. ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ຄະນະຮັບຜິດຊອບລົງຕິດຕາມ-ຊຸກຍູ້ ການຄວບຄຸມການລະບາດຂອງພະຍາດໂຄວິດ-19 ຢູ່ແຂວງຈຳປາສັກ ເຊິ່ງນຳໂດຍ ທ່ານ ສຈ.ດຣ.ພອນເທບ ພົນເສນາ ແພດຊ່ຽວຊານອາວຸໂສ, ທີ່ປຶກສາ ວຽກງານແກ້ໄຂການລະບາດພະຍາດໂຄວິດ-19 ຢູ່ແຂວງຈຳປາສັກ.

ໃນໂອກາດ ເຂົ້າ ລາຍງານການລົງຕິດຕາມ-ຊຸກຍູ້ ການຈັດຕັ້ງປະຕິບັດ ການຄວບຄຸມການລະບາດຂອງພະຍາດໂຄວິດ-19 ທົ່ວ ແຂວງຈໍາປາສັກ.
ໂອກາດນີ້, ທ່ານ ດຣ ສີວິໄຊ ໄຊຍະສານ ຮອງຫົວໜ້າພະແນກສາທາລະນະສຸກແຂວງ ຕາງໜ້າໃຫ້ຄະນະດັ່ງກ່າວ ໄດ້ລາຍງານໃຫ້ຮູ້ວ່າ: ທີມງານລົງຕິດຕາມ-ຊຸກຍູ້ ແມ່ນໄດ້ລົງເຄື່ອນໄຫວ ແຕ່ວັນທີ 16 ກັນຍາ ເຖິງ ວັນທີ 02 ພະຈິກ 2021, ມີ ຈໍານວນ 108 ບ້ານ ເປົ້າໝາຍ.

ໂດຍມີຈຸດປະສົງໃນການລົງເຄື່ອນໄຫວ ແມ່ນເພື່ອ ຕິດຕາມການຈັດຕັ້ງປະຕິບັດບັນດາມາດຕະການທີ່ຄະນະສະເພາະກິດຄວບຄຸມການລະບາດຂອງພະຍາດໂຄວິດ-19 ແຕ່ລະຂັ້ນໄດ້ວາງອອກ; ການຈັດຕັ້ງປະຕິບັດ 10 ມາດຕະການ ໃນການສ້າງຄວາມເຂັ້ມແຂງໃຫ້ແກ່ອົງການປົກຄອງ, ການຈັດຕັ້ງບ້ານ ແລະ ຊຸມຊົນ ໃນການຄວບຄຸມການລະບາດຂອງພະຍາດໂຄວິດ-19. ມີ ກິດຈະກຳທີ່ໄດ້ ແລກປ່ຽນຄໍາຄິດ-ຄໍາເຫັນຮ່ວມກັບອົງການປົກຄອງໃນຂັ້ນບ້ານ, ການຈັດຕັ້ງບ້ານເປົ້າໝາຍ ຕິດເຊື້ອ, ບ້ານທີ່ມີຄວາມສ່ຽງຕໍ່ການຕິດເຊື້ອ ແລະ ບ້ານທີ່ບໍ່ມີກໍລະນີຕິດເຊື້ອ ແລະ ລົງຢ້ຽມຢາມຄອບຄົວ, ຊຸມຊົນທີ່ຕິດເຊື້ອ. ມາຮອດ ວັນທີ 31 ຕຸລາ 2021 ການລະບາດໃນແຂວງຈຳປາສັກ ມີ 122 ບ້ານ ທີ່ຕິດເຊື້ອ ແລະ 34 ບ້ານແດງ. ຈໍານວນ ຜູ້ຕິດເຊື້ອທັງໝົດ 5.489 ຄົນ, ໃນນັ້ນ ຕິດເຊື້ອໃນຊຸມຊົນ 1,639 ຄົນ, ປິ່ນປົວດີ 5.279 ຄົນ ແລະ ເສຍຊີວິດ 04 ຄົນ.

ໂອກາດນີ້, ທ່ານເຈົ້າແຂວງຈຳປາສັກ ໄດ້ກ່າວສະແດງຄຳຍ້ອງຍໍ ຊົມເຊີຍ ຕໍ່ ທ່ານ ສຈ.ດຣ.ພອນເທບ ພົນເສນາ ພ້ອມດ້ວຍ ຄະນະຮັບຜິດຊອບລົງຕິດຕາມ-ຊຸກຍູ້ ການຄວບຄຸມການລະບາດຂອງພະຍາດໂຄວິດ-19 ຢູ່ແຂວງຈຳປາສັກ ທີ່ໄດ້ ຕິດຕາມການຈັດຕັ້ງປະຕິບັດບັນດາມາດຕະການ, ໃນການສ້າງຄວາມເຂັ້ມແຂງໃຫ້ແກ່ອົງການປົກຄອງ, ການຈັດຕັ້ງບ້ານ ແລະ ຊຸມຊົນ ໃນການຄວບຄຸມການລະບາດຂອງພະຍາດໂຄວິດ-19 ບັນລຸຕາມຈຸດປະສົງ ລະດັບຄາດໝາຍ. ພ້ອມນັ້ນ ກໍ່ຕ້ອງໄດ້ສືບຕໍ່ໃຫ້ຄວາມຮູ້ແກ່ປະຊາຊົນໂດຍນໍາໃຊ້ຫຼາຍຊ່ອງທາງ ແລະສ້າງຄວາມເຂັ້ມແຂງໃຫ້ແກ່ອົງການປົກຄອງ ເພື່ອປ້ອງກັນ ແລະ ຄວບຄຸມການລະບາດໃນຊຸມຊົນໂດຍນຳໃຊ້ 10 ມາດຕະການທີ່ທາງແຂວງວາງອອກ ຫລຸດຜ່ອນຄວາມສ່ຽງ ທີ່ຈະເກີດການລະບາດແກ່ຍາວ ແລະ ເກີດການລະບາດຮອບໃໝ່ໄດ້ໃນ ຕໍ່ໜ້າ.

ຂ່າວ: ທັດຊະນະ