ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ ກອງປະຊຸມສະຫຼຸບ ຜົນການໄກ່ເກ່ຍ, ແກ້ໄຂ ແລະ ຊົດເຊີຍ ຜູ້ທີ່ໄດ້ຮັບຜົນກະທົບຈາກໂຄງການຍົກຍ້າຍຕະຫຼາດເກົ່າ ເມືອງອະນຸວົງ ແລະ ໂຄງການກໍ່ສ້າງໂຮງແຮມ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນທີ 4 ພະຈິກ 2021 ນີ້ ທີ່ຫ້ອງປະຊຸມສານປະຊາຊົນ ແຂວງ. ໂດຍການເປັນປະທານຂອງທ່ານ ສຸກສະຫວາດ ວົງພູມເຫຼັກ ຮອງເຈົ້າແຂວງໄຊສົມບູນ, ມີທ່ານ ທອງດໍາ ຂຸນອຸດົມ ຫົວໜ້າພະແນກອຸດສາຫະກໍາ ແລະ ການຄ້າ ແຂວງ ຕະຫຼອດຮອດຄະນະກໍາກະການຮັບຜິດຊອບຊົດເຊີຍຜູ້ຖືກຜົນກະທົບ ຈາກໂຄງການການຍົກຍ້າຍຕະຫຼາດເກົ່າ ເມືອງອະນຸວົງ ແລະ ໂຄງການກໍ່ສ້າງໂຮງແຮມ ແຂວງໄຊສົມບູນ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດນີ້ ທ່ານ ທອງດໍາ ຂຸນອຸດົມ ໄດ້ຂຶ້ນລາຍງານວ່າ ໃນໄລຍະຜ່ານມາ ຄະນະຮັບຜິດຊອບ ໄດ້ເອົາໃຈໃສ່ໄກ່ເກ່ຍ, ແກ້ໄຂ ແລະ ມອບເງິນຊົດເຊີຍ ຜູ້ທີ່ຖືກຜົນກະທົບຈາກໂຄງການດັ່ງກ່າວ ຊຶ່ງມີທັງໝົດ ຈໍານວນ 196 ຫ້ອງ ແລະ ເຮືອນ ຈໍານວນ 4 ຫຼັງ ລວມມູນຄ່າ ຈໍານວນ 3.307.647.500 ກີບ. ມາຮອດປັດຈຸບັນແມ່ນໄດ້ປະຕິບັດການຊົດເຊີຍເປັນເງິນສົດສໍາເລັດແລ້ວ 100%. ໂດຍຜ່ານການໄກ່ເກ່ຍຜ່ານມາ ເຫັນໄດ້ວ່າບັນດາຮ້ານ ຫຼື ຜູ້ຖືກຜົນກະທົບສ່ວນຫຼາຍ ແມ່ນມີຄວາມເຂົ້າໃຈຕໍ່ແນວທາງນະໂຍບາຍຂອງຂັ້ນເທີງ ກໍຄືໃຫ້ຄວາມຮ່ວມມືໃນການພັດທະນາຂອງແຂວງ ຊຶ່ງໄດ້ພາກັນມ້າງຮ້ານຄ້າຂອງຕົນອອກພາຍຫຼັງໄດ້ຮັບການຊົດເຊີຍສໍາເລັດ ແຕ່ຍັງມີບາງຈໍານວນທີ່ຂໍຢູ່ຕໍ່ຈົນຮອດທ້າຍເດືອນ 12 ປີ 2021 ນີ້.

ນອກນີ້ ຍັງມີບາງພາກສ່ວນໄດ້ສະເໜີຂໍຄ່າຊົດເຊີຍ ໂດຍສະເພາະແມ່ນຫ້ອງການ ປກສ ບໍລິການປະຊາຊົນ ກຸ່ມບ້ານເທດສະບານ. ຈາກນັ້ນ, ຄະນະກໍາມະການ ໄດ້ປະກອບຄໍາຄິດຄໍາເຫັນຕໍ່ບາງບັນຫາທີ່ຍັງຄ້າງຄາ ເປັນຕົ້ນແມ່ນຄວາມຫຍຸ້ງຍາກໃນການລົງໄກ່ເກ່ຍ, ການຈັດແບ່ງງົບປະມານ, ການຈັດສານທີ່ດິນໃຫ້ 3 ຄອບຄົວ, ການຄົ້ນຄວ້າພິຈາລະນາຄໍາສະເໜີຂໍຄ່າຊົດເຊີຍ ແລະ ບັນຫາອື່ນໆ ອີກ. ທັງນີ້ ກໍເພື່ອພ້ອມກັນປັບປຸງ ແລະ ຊອກຫາວິທີທາງແກ້ໄຂ ໃນຕໍ່ໜ້າໃຫ້ໄດ້ຮັບຜົນດີກ່ວາເກົ່າ.

ໂອກາດດັ່ງກ່າວ ທ່ານ ສຸກສະຫວາດ ວົງພູມເຫຼັກ ໄດ້ມີຄໍາເຫັນຊີ້ນໍາຕໍ່ກອງປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ທີ່ໄດ້ມີຄວາມພະຍາຍາມ, ມີຄວາມອົດທົນ ແລະ ມີຄວາມຮັບຜິດຊອບສູງ ຕໍ່ໜ້າທີ່ວຽກງານທີ່ຂັ້ນເທີງມອບໝາຍ ແລະ ໄດ້ເອົາໃຈໃສ່ຈັດຕັ້ງປະຕິບັດ ຢ່າງຕັ້ງໜ້າ. ແຕ່ຍັງມີບາງບັນຫາ ທີ່ຈະຕ້ອງໄດ້ສືບຕໍ່ແກ້ໄຂຄື ໃຫ້ຄະນະຮັບຜິດຊອບສືບຕໍ່ປະກອບເອກະສານການຊົດເຊີຍໃຫ້ລະອຽດ ຈະແຈ້ງ, ມອບໃຫ້ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຮີບຮ້ອນພິຈາລະນາອອກໜັງສືຢັ້ງຢືນທີ່ດິນໃຫ້ 2 ຄອບຄົວ ທີ່ໄດ້ຈັດສັນແລ້ວ ສ່ວນອີກ 1 ຄອບຄົວແມ່ນໃຫ້ຮີບຮ້ອນເຈລະຈາ ແລະ ຊອກຫາທີ່ດິນ ທີ່ເໝາະສົມໃຫ້ຜູ້ກ່ຽວ ແລະ ບັນຫາອື່ນໆ ກໍໃຫ້ແຕ່ລະພາກສ່ວນຮີບຮ້ອນສືບຕໍ່ແກ້ໄຂ ໃຫ້ມີຄວາມເຂົ້າໃຈ ທັງເຈລະຈາໃຫ້ພາກສ່ວນທີ່ໄດ້ຮັບການຊົດເຊີຍແລ້ວນັ້ນ ຮື້ຖອນ ແລະ ມ້າງອອກ ໃຫ້ສໍາເລັດ ເພື່ອໃຫ້ສະຖານທີ່ດັ່ງກ່າວມີຄວາມຈົບງາມ ແລະ ສະດວກໃຫ້ແກ່ການດໍາເນີນໂຄງການກໍ່ສ້າງໂຮງແຮມ ຂອງແຂວງໄຊສົມບູນ.