ມີເດຍລວແຂວງໄຊຍະບູລີ ຂ່າວ-ພາບ: ອຸ່ນເຮືອນ ໂພທິລັກ ເພື່ອເປັນການພັດທະນາ, ເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ແຂວງ ໄຊຍະບູລີ ສປປ ລາວ ແລະ ແຂວງ ທາຍບິງ ສສ ຫວຽດນາມ; ບົນພື້ນຖານຄວາມສະເໝີພາບ, ມິດຕະພາບ, ຕ່າງຝ່າຍຕ່າງໄດ້ຮັບຜົນປະໂຫຍດ, ແທດເໝາະກັບສະພາບຕົວຈິງ, ກັບຂອບເຂດສິດ, ພາລະບົດບາດ ແລະ ໜ້າທີ່ຂອງທັງສອງແຂວງ ກໍ່ຄືບັນດາສົນທິສັນຍາສາກົນ ທີ່ທັງສອງຊາດ ລາວ ແລະ ຫວຽດນາມໄດ້ຮັບຮອງ, ຖືກຕ້ອງກັບແນວທາງນະໂຍບາຍ, ລະບຽບກົດໝາຍຂອງທັງສອງປະເທດ, ໃນຕອນເຊົ້າຂອງວັນທີ 4 ພະຈິກນີ້, ອົງການປົກຄອງແຂວງໄຊຍະບູລີ ແລະ ຄະນະກຳມະການປະຊາຊົນແຂວງທາຍບິງ ໄດ້ຮ່ວມກັນລົງນາມບົດບັນທຶກການຮ່ວມມືຟື້ນຄືນ ສາຍພົວພັນມິດຕະພາບຂຶ້ນ, ທີ່ຫ້ອງປະຊຸມຫ້ອງວ່າການຂອງທັງ 2 ແຂວງ,ໂດຍຜ່ານລະບົບວີດີໂອທາງໄກ, ເຂົ້າຮ່ວມ ຝ່າຍແຂວງ ໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ພ້ອມດ້ວຍຄະນະ, ຝ່າຍແຂວງ ທາຍບິງ ນໍາໂດຍ ທ່ານ ໂງ່ ດົ່ງ ຮາຍ, ກໍາມະການສູນກາງພັກຄອມມູນິດຫວຽດນາມ, ເລຂາພັກແຂວງ, ຫົວ ໜ້າຄະນະສະມາຊິກສະພາແຫ່ງຊາດແຂວງ ທາຍບິງ ພ້ອມຄະນະ.

ໃນພິທີທັງສອງແຂວງໄດ້ຜ່ານຮ່າງບົດບັນທຶກການຮ່ວມມືເຊິ່ງມີເນື້ອໃນຄື: ຮ່ວມມືກັນສ້າງສາຍພົວພັນມິດຕະພາບເພື່ອເປັນການສົ່ງເສີມການໂຄສະນາ, ເຜີຍແຜ່ສຶກສາອົບຮົມຢ່າງເລິກເຊິ່ງ ກ່ຽວກັບ ສາຍພົວພັນມິດຕະພາບອັນຍິ່ງໃຫຍ່ ລະຫວ່າງ ສອງຊາດ, ສອງທ້ອງຖິ່ນ ກໍ່ຄືການໂຄສະນາຜືນແຜ່ນດິນ, ຜູ້ຄົນ, ທ່າແຮງການພັດທະນາເສດຖະກິດ-ສັງຄົມ ຂອງອີກຝ່າຍໜຶ່ງໃຫ້ປະຊາຊົນພາຍໃນແຂວງຂອງຕົນໄດ້ຮັບຊາບ,ຈັດຕັ້ງການແລກປ່ຽນຄະນະຜູ້ແທນຂັ້ນການນໍາແຂວງຮ່ວມກັນ, ໂດຍຜັດປ່ຽນກັນເປັນເຈົ້າພາບ (02 ປີ/ຄັ້ງ), ເພື່ອເປັນການເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ປະກອບສ່ວນຮັດແໜ້ນສາຍພົວພັນການຮ່ວມມືມິດຕະພາບອັນຍິ່ງໃຫຍ່ ລະຫວ່າງ ສອງຊາດ ລາວ ແລະ ຫວຽດນາມ, ທັງເປັນການເສີມສ້າງສາຍພົວພັນການຮ່ວມມືມິດຕະພາບໃຫ້ເປັນຮູບປະທຳ ແລະ ເຂົ້າສູ່ລວງເລິກ, ຮ່ວມມືກັນທາງດ້ານວຽກງານການກໍ່ສ້າງພັກ ແລະ ປົວແປງລະບອບການເມືອງ, ແລກປ່ຽນບົດຮຽນ, ປະສົບການທາງດ້ານການກໍ່ສ້າງກົງຈັກການນໍາພາ, ການບໍລິຫານຄຸ້ມຄອງລັດ, ການຈັດຕັ້ງປະຕິບັດໜ້າທີ່ການເມືອງ

ເພື່ອເສີມສ້າງບົດບາດໃນການຄຸ້ມຄອງ, ການນໍາພາຂັ້ນແຂວງ ແລະ ສ້າງຄວາມເຂັ້ມແຂງໃຫ້ລະບອບການເມືອງ, ອຳນວຍຄວາມສະດວກໃຫ້ບັນດາອົງການຈັດຕັ້ງ ແລະ ພະນັກງານໃນລະບອບການເມືອງຂອງສອງແຂວງ ໄດ້ມີການແລກປ່ຽນຄະນະຜູ້ແທນ, ໄປມາຫາສູ່ ແລະ ຢ້ຽມຢາມເຊິ່ງກັນ ແລະ ກັນ, ເຫັນດີຊຸກຍູ້ໃຫ້ມີການຮ່ວມມືດ້ານການພັດທະນາເສດຖະກິດ, ວັດທະນະທໍາ, ສັງຄົມ ແລະ ວຽກງານການບໍລິຫານລັດ ໃນຂົງເຂດການຄ້າ, ການລົງທຶນ, ການສຶກສາ, ສາທາລະນະສຸກ, ກະສິກຳ, ອຸດສາຫະກຳ-ການກໍ່ສ້າງ, ການທ່ອງທ່ຽວ, ຂໍ້ມູນຂ່າວສານ, ເຕັກນິກວິທະຍາສາດ ແລະ ວຽກງານການພົວພັນລະຫວ່າງປະຊາຊົນຂອງສອງແຂວງ, ຈາກນັ້ນການນໍາທັງສອງແຂວງກໍ່ໄດ້ພ້ອມກັນລົງນາມໃສ່ບົດບັນທຶກດັ່ງກ່າວ, ຝ່າຍແຂວງ ໄຊຍະບູລີແມ່ນ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແລະ ແຂວງ ທາຍບິງ ແມ່ນທ່ານ ຫງ໊ວຽນ ຄັກ ເທິນ, ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງ ໂດຍມີຜູ້ແທນທັງ 2 ແຂວງເຂົ້າຮ່ວມ.