ມີເດຍລາວແຂວງໄຊສົມບູນ
ກອງປະຊຸມ ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກຄະນະກວດກາພັກ-ລັດ ແຂວງໄຊສົມບູນ ປະຈຳປີ 2021 ໄດ້ຈັດຂຶ້ນໃນວັນທີ 16 ພະຈິກ 2021 ນີ້ ທີ່ຫ້ອງປະຊຸມ ອົງການໄອຍະການປະຊາຊົນ ແຂວງ ໂດຍການເປັນປະທານ ຂອງ ສະຫາຍ ຄົວຈັ້ງ ດຣາເຊັ້ງ, ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມ ແຂວງ, ຮອງຫົວໜ້າຄະນະຮັບຜິດຊອບຊີ້ນຳ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ກຸ່ມການເມືອງ, ມີສະຫາຍ ບຸນຜອງ ຄຳມະນີວົງ, ເລຂາໜ່ວຍພັກ, ຮອງປະທານຄະນະກວດກາພັກ ແລະ ອົງການກວດກາລັດ ແຂວງ ພ້ອມດ້ວຍຄະນະຮັບຜິດຊອບການປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕະຫຼອດຮອດສະມາຊິກພັກ ພາຍໃນໜ່ວຍ ເຂົ້າຮ່ວມ.

ຈຸດປະສົງຂອງກອງປະຊຸມ ຄັ້ງນີ້ ກໍເພື່ອສືບຕໍ່ເສີມຂະຫຍາຍມູນເຊື້ອອັນດີງາມ ກໍຄືຜົນງານອັນໂດດເດັ່ນ ແລະ ດ້ານດີ, ເດັດດ່ຽວປັບປຸງ, ແກ້ໄຂຈຸດອ່ອນຂໍ້ຄົງຄ້າງ, ແລະ ສິ່ງທ້າທາຍທົດສອບ ທີ່ເປັນໄພອັນຕະລາຍຕໍ່ພັກ ໂດຍແນໃສ່ເຊີດຊູບົດບາດຄວາມສາມາດນຳພາ ຂອງໜ່ວຍພັກ ແລະ ຍົກສູງຄວາມເປັນແບບຢ່າງນຳໜ້າ ຂອງຖັນແຖວສະມາຊິກພັກ ຮັບປະກັນໃຫ້ພັກ ມີຄວາມປອດໃສ, ເຂັ້ມແຂງ, ໜັກແໜ້ນ ເພື່ອຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກ ພາຍໃນໜ່ວຍພັກຄະນະກວດກາພັກ-ລັດແຂວງໄຊສົມບູນ ໃຫ້ມີຄວາມຫັນປ່ຽນຢ່າງຕັ້ງໜ້າ ດ້ວຍບາດກ້າວບຸກທະລຸ ທັງສາມາດເປັນແກນນຳທີ່ເຂັ້ມແຂງ ໃນລະບົບການເມືອງ ເພື່ອຮັບປະກັນເຮັດໃຫ້ການນຳພາຂອງພັກ ສາມາດຕອບສະໜອງໄດ້ຄວາມເລັ່ງທວງ ຂອງການພັດທະນາປະເທດຊາດ ກໍຄືແຂວງໄຊສົມບູນ ໃນເງື່ອນໄຂ ແລະ ສະພາບແວດລ້ອມໃໝ່ ທີ່ພັກເຮົາມີຄວາມຈຳເປັນຕ້ອງກໍ່ສ້າງໜ່ວຍພັກ, ຄະນະໜ່ວຍພັກ ແລະ ສະມາຊິກພັກ ໃຫ້ມີຄວາມສາມາດນຳພາ ຈັດຕັ້ງປະຕິບັດໜ້າທີ່ການເມືອງ ຂອງພັກ ແລະ ແຜນພັດທະນາເສດຖະກິດ-ສັງຄົມທີ່ວາງອອກໃນແຕ່ລະໄລຍະ ໃຫ້ປະກົດຜົນເປັນຈິງ.

ພ້ອມນີ້ ບັນດາສະມາຊິກພັກພາຍໃນໜ່ວຍ ໄດ້ຜັດປ່ຽນກັນຂຶ້ນຜ່ານໃບສຳຫຼວດ ຂອງສະມາຊິກພັກ ພ້ອມທັງຮັບຟັງການຜ່ານບົດສະຫຼຸບ ແລະ ແຜນການສ້າງໜ່ວຍພັກປອດໃສ, ເຂັ້ມແຂງ, ໜັັກແໜ້ນ ເຊິ່ງຕະຫຼອດໄລຍະຜ່ານມາ ໜ່ວຍພັກຄະນະກວດກາພັກ-ລັດແຂວງ ໄດ້ຢຶດໝັ້ນ ແລະ ປະຕິບັດກົດລະບຽບຂອງພັກ ຢ່າງເຂັ້ມງວດ ໂດຍສະເພາະ ແມ່ນປະຕິບັດຕາມ 5 ຫຼັກການ 3 ທິດນຳ ໃນການກໍ່ສ້າງ ແລະ ປັບປຸງພັກ ເຊິ່ງການດຳເນີນຊິວິດການເມືອງ ຂອງໜ່ວຍພັກ ກໍໄດ້ປະຕິບັດຕາມ 3 ເນື້ອໃນ, 3 ຮູບການ ແລະ 3 ລັກສະນະຄື: ລັກສະນະນຳພາ, ລັກສະນະສຶກສາອົບຮົມ ແລະ ລັກສະນະຕໍ່ສູ້ພາຍໃນໜ່ວຍພັກ ໄດ້ເປັນຢ່າງດີ. ພ້ອມດຽວກັນ ກອງປະຊຸມ ຄັ້ງນີ້ ຍັງໄດ້ມີການປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ແລະ ໄດ້ຕີລາຄາຄຸນນະພາບຈັດແບ່ງປະເພດຂອງສະມາຊິກພັກ ພາຍໃນໜ່ວຍພັກ ເຊິ່ງມີສະມາຊິກພັກປະເພດແຂງ 8 ສະຫາຍ ເທົ່າກັບ 100%, ບໍ່ມີສະມາຊິກພັກກາງ, ອ່ອນ ແລະ ເສຍທາດຂາດຄຸນ, ເລຂາພັກຄະນະພັກສາມາດຊິນຳ-ນຳພາປະຕິບັດໜ້າທີການເມືອງ,ວິຊາສະເພາະສຳເລັດຫຼາຍດ້ານ, ຕາມຄາດໝາຍທີ່ກຳນົດໄວ້,

ພ້ອມດຽວກັນນັ້ນ ສະມາຊິກພັກ ແຕ່ລະສະຫາຍ ໄດ້ມີການປະກອບຄຳຄິດ-ຄຳເຫັນ ໃສ່ຮ່າງບົດສະຫຼຸບ ແລະ ແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ດ້ວຍຄວາມຮັບຜິດຊອບສູງ ທັງນີ້ ກໍເພື່ອເປັນການຕຳໜິສົ່ງຂ່າວກໍ່ສ້າງເຊິ່ງກັນ ແລະ ກັນ ເພື່ອພ້ອມກັນກ້າວໜ້າໃນການຮັບໃຊ້ໜ້າທີ່ການເມືອງຂອງພັກ ໃນສະເພາະໜ້າ ແລະ ຍາວນານ.
ບັນນາທີການ ຂ່າວ: ນາງ ແກ່ນຈັນ ທຳມະນີ