ມີເດຍລາວແຂວງໄຊສົມບູນ
ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ 19 ແຂວງໄຊສົມບູນ ໄດ້ຈັດກອງປະຊຸມສະຫລຸບວຽກງານການຈັດຕັ້ງປະຕິບັດວຽກງານປ້ອງກັນ, ຄວວບຄຸມ ແລະ ແກ້ໄຂການລະບາດຂອງພະ ຍາດໂຄວິດ 19 ແຂວງໄຊສົມບູນ ໄລຍະແຕ່ວັນທີ 1-15 ພະຈິກ ແລະ ທິດທາງແຜນການໃນຕໍ່ໜ້າ ໃນຕອນບ່າຍຂອງວັນທີ 15 ຕຸລາ ນີ້ ທີ່ຫ້ອງປະຕິບັດງານຄະນະສະເພາະກິດໂຄວິດ 19 ແຂວງ ໂດຍການເປັນປະທານຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງ, ມີບັນດາຄະນະສະເພາະກິດໂຄວິດ 19 ຂັ້ນແຂວງ ເຂົ້າຮ່ວມ.

ໂອກາດນີ້ ທ່ານ ອູເງິນ ດວງມະນີ ຫົວໜ້າກອງເລຂາຄະນະສະເພາະກິດເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ 19 ແຂວງໄຊສົມບູນ ໄດ້ລາຍງານການຈັດຕັ້ງປະຕິບັດວຽກງານ ໃນໄລຍະແຕ່ວັນທີ 1-15 ພະຈິກ ແລະ ທິດທາງແຜນການໃນຕໍ່ໜ້າ ຊຶ່ງໃນໄລຍະຜ່ານມາສະພາບການລະບາດຂອງພະຍາດໂຄວິດ 19 ຢູ່ແຂວງໄຊສົມບູນ ໄດ້ກວດພົບຜູ້ຕິດເຊື້ອເພີ່ມຂຶ້ນ ເລີ່ມແຕ່ວັນທີ 20 ກັນຍາ 2021 ຜ່ານມາ ຮອດປັດຈຸບັນ ທົ່ວແຂວງໄດ້ສົ່ງຕົວຢ່າງກວດຫາເຊື້ອທັງໝົດ 5.158 ຕົວຢ່າງ, ກວດພົບຜູ້ຕິດເຊື້ອສະສົມ ທັງໝົດ ຈຳນວນ 326 ກໍລະນີ, ເທົ່າກັບ 6,3%, ປິ່ນປົວຫາຍດີສະສົມ 297 ຄົນ, ກຳລົງປິ່ນປົວ 27 ຄົນ ແລະ ມີຜູ້ເສຍຊີວິດສະສົມ ທັງໝົດ 2 ຄົນ ໃນນັ້ນ ເມືອງລ້ອງຊານມີຜູ້ຕິດເຊື້ອ 181 ຄົນ, ເມືອງລ້ອງແຈ້ງ 2 ຄົນ, ເມືອງທ່າໂທມ 20 ຄົນ, ເມືອງອະນຸວົງ 120 ຄົນ ພ້ອມນີ້ ຍັງມີບ້ານທີກຳນົດເປັນແດງ ທັງໝົດ 15 ບ້ານ ຊຶ່ງການແຜ່ເຊື້ອຢູ່ໃນແຂວງໄຊສົມບູນຂອງພວກເຮົາ ສ່ວນຫລາຍແມ່ນມາຈາກການສຳຜັດໃກ້ສິດກັບກໍລະນີທີ່ຕິດເຊື້ອ ທີ່ບໍ່ໄດ້ຈຳກັດບໍລິເວນຄົບ 14 ວັນຢ່າງເຂັ້ມງວດຕາມລະບຽບການ ພາຍຫຼັງ ໄດ້ມີການລະບາດຂອງພະຍາດດັ່ງກ່າວແລ້ວ ຄະນະສະເພາະກິດໂຄວິດ 19 ແຂວງ ແລະ ບັນດາເມືອງ ກໍໄດ້ເອົາໃຈໃສ່ຊີ້ນຳ-ນຳພາການຈັດຕັ້ງປະຕິບັດວຽກງານ ຢ່າງຮີບດ່ວນ ເປັນຕົ້ນ ໄດ້ລົງປິດບັນດາບ້ານແດງ ແລະ ຄອບຄົວສີແດງ ພ້ອມທັງຊອກຄົ້ນຫາເອົາຜູ້ສຳຜັດໃກ້ສິດກັບຜູ້ຕິດເຊື້ອເຂົ້າສູນຈຳກັດບໍລິເວນ

ເພື່ອຕັດວົງຈອນການແຜ່ເຊື້ອໃຫ້ໄດ້ໄວທີ່ສຸດ ພ້ອມນີ້ ຍັງໄດ້ອອກໜັງສືເດີນທາງໃຫ້ຜູ້ທີ່ມີຄວາມຈຳເປັນ ໄດ້ 442 ສະບັບ ມາຮອດປັດຈຸບັນສາມາດສັກວັກຊິນ ເຂັມທີ 1 ໄດ້ທັງໝົດ 43.495 ຄົນ ເທົ່າກັບ 70,7% ຂອງປະຊາກອນກຸ່ມເປົ້າໝາຍ, ເຂັມທີ 2 ສັກໄດ້ 37,735 ຄົນ ເທົ່າກັບ 61,33% ນອກຈາກນີ້ ຍັງໄດ້ໂຄສະນາເຜີແຜ່ ແລະ ຖ່າຍທອດການຖະແລງກ່ຽວກັບສະພາບການແຜ່ລະບາດ ຂອງພະຍາດໂຄວິດ 19 ທຸກໆວັນ ເພື່ອໃຫ້ປະຊາຊົນໄດ້ຮັບຮູ້ເຖິງຜົນຮ້າຍ ແລະ ຮູ້ວິທີປ້ອງກັນຕົນເອງຈາກພະຍາດດັ່ງກ່າວ ສ່ວນວຽກງານດ້ານອື່ນໆກໍໄດ້ມີການຈັດຕັ້ງປະຕິບັດ ແລະ ມີຜົນສຳເລັດ. ຄຽງຄູ່ກັນນີ້ກໍຍັງມີຈຸດຂໍ້ຫຍຸ້ງຍາກໃນການ ຈັດຕັ້ງປະຕິບັດວຽກງານ ເປັນຕົ້ນ ຜູ້ສຳຜັດໃກ້ສິດກັບຜູ້ຕິດເຊື້ອ ທີ່ເປັນ C1 ຈຳນວນໜຶ່ງບໍ່ໄດ້ຈຳກັດບໍລິເວນຕົນເອງຢ່າງເຄັ່ງຄັດ, ຍັງມີການຊຸມແຊວ ແລະ ເຄື່ອນໄຫວທາງສັງຄົມຢູ່, ການໃຊ້ມາດຕະການປິດບ້ານ ແລະ ປິດຄອບຄົວແດງ ຍັງບໍ່ທັນໄດ້ດີ ແລະ ຜູ້ຕິດເຊື້ອຈຳນວນໜຶ່ງບໍ່ຈິງໃຈລາຍງານປະຫວັດການເຄື່ອນໄຫວຂອງຕົນ ຕໍ່ພະນັກງານເກັບກຳຂໍ້ມູນເທົ່າທີ່ຄວນ.

ໃນຕອນທ້າຍ ທ່ານ ຕົ່ງມົວ ຊົວໂກ້ ໄດ້ມີຄຳເຫັນໂອ້ລົມ ຊຶ່ງທ່ານໄດ້ເນັ້ນໜັກໃຫ້ສືບຕໍ່ເຝົ້າລະວັງກວດກາຄົນເຂົ້າ-ອອກ ແຂວງ ຢູ່ແຕ່ລະດ່ານໃຫ້ມີຄວາມເຂັ້ມງວດ ແລະ ຄັດກອງຄົນເຂົ້າ-ອອກແຂວງຢ່າງເຄັ່ງຄັດ ໂດຍຜ່ານການກວດຫາເຊື້ອພະຍາດໂຄວິດ 19 ພາຍໃນ 72 ຊົ່ວໂມງ ແລະ ຖ້າອຸນຫະພູມກາຍ 37 ອົງສາ ແມ່ນບໍ່ໃຫ້ເຂົ້າແຂວງເດັດຂາດ ນອກຈາກນີ້ ກໍໃຫ້ສືບຕໍ່ສັກວັກຊິນກັນພະຍາດໂຄວິດ-19 ໃຫ້ບັນລຸຄາດໝາຍ ແລະ ສືືບຕໍ່ໂຄສະນາສຶກສາອົບຮົມໃຫ້ ປະຊາຊົນບັນດາເຜົ່າ ໃຫ້ຮັບຮູ້, ເຂົ້າໃຈ ຕໍ່ຜົນຮ້ານຂອງພະຍາດໂຄວິດ-19 ແລະ ມີວິທີປ້ອງກັນຕົນເອງ ໃຫ້ຖືກຕ້ອງຕາມຂໍ້ກຳນົດຂອງຄະນະສະເພາະກິດວາງອອກ.