​ມີເດຍລາວແຂວງຄຳມ່ວນ ວັນທີ 18 ພະຈິກ 2021 ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ພ້ອມດ້ວຍຄະນະ ໄດ້ລົງຕິດຕາມ, ຊຸກຍູ້ ສະຖານທີ່ທ່ອງທ່ຽວຖໍ້າຊ້າງ ແລະ ຖໍ້າຊຽງລຽບ ເມືອງທ່າແຂກ ເພື່ອເປັນການກະກຽມຄວາມພ້ອມຕ້ອນຮັບນັກທ່ອງທ່ຽວ ໂດຍສະເພາະການ ປັບປຸງສະຖານ ທີ່ທ່ອງທ່ຽວໃຫ້ມີຄວາມໂດດເດັ່ນ, ການປັບປຸງທາງດ້ານກິດຈະກຳໃຫ້ມີຄວາມຫຼາກຫຼາຍ ເພື່ອດຶງດູດນັກທ່ອງທ່ຽວ ແລະ ຂອດການບໍລິການທີ່ສ້າງຄວາມເພິ່ງໃຈ ໃຫ້ແກ່ລູກຄ້າ ລວມເຖິງການປົກປັກຮັກສາ ດ້ານສິ່ງແວດລ້ອມ ເພື່ອຄວາມຍືນຍົງ ໄປຄຽງຄູ່ກັບການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ ການແຜ່ ລະບາດ ຂອງພະຍາດໂຄວິດ-19 ຢ່າງເຂັ້ມງວດ ເພື່ອສ້າງຄວາມໝັ້ນໃຈ ແກ່ນັກທ່ອງທ່ຽວທີ່ເຂົ້າມາໃຊ້ບໍລິການ ແນໃສ່ ເພື່ອຟື້ນຟູວຽກງານທ່ອງທ່ຽວໃຫ້ມີຄວາມເຂັ້ມແຂງ ໂດຍສະເພາະ ການພັດທະນາລະບົບຕາໜ່າງ ການທ່ອງທ່ຽວ, ຮູບແບບໃນການບໍລິການ, ການຕອບສະໜອງທາງດ້ານຂໍ້ມູນຂ່າວສານການທ່ອງທ່ຽວ, ການສ້າງສິ່ງອຳນວຍ ຄວາມສະດວກໃນການເຂົ້າເຖິງສະຖານທີ່ທ່ອງທ່ຽວ ແລະ ອື່ນໆ ເພື່ອແນໃສ່ເຮັດໃຫ້ ວຽກງານການທ່ອງທ່ຽວ ຂອງແຂວງກັບມາຄຶກຄື້ນ ແລະ ຂະຫຍາຍຕົວດີຂຶ້ນໃນອະນາຄົດ.

ສຳລັບການພັດທະນາແຫຼ່ງທ່ອງທ່ຽວຖໍ້າຊ້າງ ໂດຍໄດ້ຮັບທຶນສະໜັບສະໜູນຈາກ ໂຄງການພັດທະນາ ໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ແມ່ນໄດ້ສຳເລັດໃນການສ້າງສິ່ງອຳນວຍຄວາມສະດວກ ດ້ານຕ່າງໆ ເປັນຕົ້ນ: ສະຖານທີ່ຈອດລົດ, ຫ້ອງຂາຍປີ້, ເສັ້ນທາງ-ຂົວ ເຂົ້າຫາແຫຼ່ງທ່ອງທ່ຽວ, ຕະຫຼາດຊຸມຊົນ, ຫ້ອງນໍ້າ ແລະ ອື່ນໆ. ສ່ວນການພັດທະນາແຫຼ່ງທ່ອງທ່ຽວຖໍ້າຊຽງລຽບ ໂດຍແມ່ນບໍລິສັດ ເຄເຄ ພັດທະນາ ການທ່ອງທ່ຽວ ຈຳກັດ ແມ່ນໄດ້ສຳເລັດໃນຫຼາຍກິດຈະກຳ ເປັນຕົ້ນ: ການສ້າງຂົວອູ່ຍ່າງຊົມທໍາມະຊາດ 03 ຈຸດ ມີຄວາມຍາວ 110 ແມັດ, ສ້າງຂົວຍ່າງທາຊານ ແບບ 1 ຖານ ລັກສະນະໂອນແອນໄປມາ 1 ຈຸດ, ສ້າງຂົວ ສະລິງຮູບໂຕວີ (V) ມີຖານຂ້າມຫ້ວຍຊຽງລຽບ ຍາວ 50 ແມັດ, ຕິດຕັ້ງສາຍຂີ່ສະລິງ 2 ຈຸດ ຍາວ 280 ແມັດ, ຕາໜ່າງແມງມຸມ ແລະ ຂົວຍ່າງໄປຫາຈຸດຖ່າຍຮູບຢູ່ບໍລິເວນໜ້າຖໍ້າ, ການສ້າງຫ້ອງນໍ້າສະອາດ ແລະ ອື່ນໆ.

ຂ່າວ: ກອງຄຳ