ມີເດຍລາວແຂວງສາລະວັນ ພາຍຫຼັງເມືອງເລົ່າງາມ ແຂວງສາລະວັນ ພົບຜູ້ຕິດເຊື້ອພະຍາດໂຄວິດ-19 ໃນຊຸມຊົນ ຕິດຕໍ່ກັນສະສົມມາຫຼາຍມື້ ແລະ ແຜ່ລາມອອກເປັນວົງກວ້າງ, ອຳນາດການປົກຄອງ ເມືອງເລົ່າງາມ ໄດ້ອອກຄຳສັ່ງດ່ວນ ປິດການເຂົ້າ-ອອກ (ລ໋ອກດາວ) 8 ບ້ານເທສະບານເມືອງ ນັບແຕ່ວັນທີ 18-25 ພະຈິກ 2021 ເພື່ອຄວບຄຸມ ແລະ ແກ້ໄຂສະຖານະການດັ່ງກ່າວໃຫ້ທ່ວງທັນ.

ໂດຍປະຕິບັດຕາມ ຄໍາສັ່ງເລກທີ 07/ຈມ.ລງ, ລົງວັນທີ 18 ພະຈິກ 2021 ຍົກລະດັບຂັ້ນສູງ ປະຕິບັັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໂດຍສັ່ງປິດການເຂົ້າ-ອອກ 8 ບ້ານຄື: ບ້ານໂນນເດື່ອ, ໂນນຄໍາ, ໂນນສູງ, ໂນນດູ່, ຫ້ວຍນ້ຳສັນ, ເລົ່າງາມ, ປາກທໍ່, ບ້ານເຕເມສັງທອງ ແລະ ຕະຫຼາດເມືອງເລົ່າງາມ ຫ້າມສັນຈອນໄປມາຫາສູ່ ຢ່າງເດັດຂາດ, (ຍົກເວັ້ນກໍລະນີຈຳເປັນ ທີ່ໄດ້ຮັບການອະນຸຍາດ) ແລະ ປິດການບໍລິການຕະຫຼາດແລງ ບ້ານໂນນຄໍາ, ຫ້າມຂາຍເຄື່ອງທຸກປະເພດ, ປິດຕະຫລາດທິລາກຸນ ແລະ ປິດຮ້ານຂາຍເສື້ອຜ້າ, ຮ້ານຂາຍເຄື່ອງຍ່ອຍ, ຮ້ານຂາຍເຄື່ອງໃຊ້ໄຟຟ້າ, ເຄື່ອງວັດສະດຸກໍ່ສ້າງ, ເຄື່ອງເອເລັກໂຕນິກ ແລະ ອື່ນໆໃນຂອບເຂດເທດສະບານເມືອງ ອະນຸຍາດໃຫ້ຂາຍສະເພາະແຕ່ເຄື່ອງບໍລິໂພກຈໍາເປັນເທົ່ານັ້ນ.

ກໍານົດເອົາບາງຈຸດຂອງຕະຫຼາດ ເປັນບ່ອນສະໜອງສິນຄ້າ ເຄື່ອງບໍລິໂພກ ທີ່ຈຳເປັນ, ເຊີ່ງຕ້ອງຮັກສາໄລຍະຫ່າງຢ່າງເຄັ່ງຄັດ, ອະນຸຍາດໃຫ້ຂາຍເຄື່ອງກິນສຸກ, ຮ້ານເຝີ-ເຂົ້າປຽກ. ນອກນັ້ນ, ໄດ້ເຂັ້ມງວດ ແລະ ເອົາໃຈໃສ່ໃນການຄວບຄຸມ, ໂດຍມອບໃຫ້ກໍາລັງ ເຈົ້າໜ້າທີ່ ປກສ, ປກຊ ຕັ້ງຈຸດກວດກາ, ເວນຍາມ, ການເຂົ້າ-ອອກ ຕະຫຼອດ 24 ຊົ່ວໂມງ ຢ່າງມີລະບຽບການ ແລະ ເລັ່ງເກັບກໍາຂໍ້ມູນຜູ້ທີ່ສຳຜັດໃກ້ຊິດ ກັບຜູ້ຕິດເຊື້ອ.

ມາຮອດປັດຈຸບັນ ເມືອງເລົ່າງາມ ແຂວງສາລະວັນ ມີຜູ້ຕິດເຊື້ອພະຍາດໂຄວິດ-19 ສະສົມທັງໝົດ 112 ຄົນ, ຍິງ 67 ຄົນ ແລະ ກຳລັງປິ່ນປົວ ຈຳນວນ 51 ຄົນ, ຍິງ 28 ຄົນ ເຊິ່ງໄດ້ປິ່ນປົວຫາຍດີແລ້ວ 51 ຄົນ ຕໍ່ກັບສະພາບດັ່ງກ່າວ ການຕິດເຊື້ອຈາກແຮງງານນຳເຂົ້າ ຫຼຸດລົງ, ແຕ່ສຳລັບການຕິດເຊື້ອໃນຊຸມຊົນ ເພີ່ມຂຶ້ນເປັນຈຳນວນຫຼາຍໃນແຕ່ລະວັນ.

ຂ່າວ: ກິນດາວັນ ອ້ວນນາຄູ
ພາບ: ພອນໄຊ (ນັກຂ່າວເມືອງເລົ່າງາມ)