ວັນທີ 19 ພະຈິກ 2021 ນີ້ ທີ່ສູນປະຕິບັດງານຄະນະສະເພາະກິດຄວບຄຸມໂຄວິດ-19 ແຂວງຫລວງພະບາງ ໄດ້ຈັດກອງປະຊຸມປຶກສາຫາລືມາດຕະການການຜ່ອນຜັນຕາມແຈ້ງການຂອງຫ້ອງວ່າການແຂວງຫຼວງພະບາງ ແລະການກຽມຄວາມພ້ອມໃນການເປີດປະເທດ, ເປີດແຂວງ ເພື່ອແກ້ໄຂບັນຫາດ້ານເສດຖະກິດ, ຊີວິດການເປັນຢູ່ຂອງປະຊາຊົນບັນດາເຜົ່າ ໂດຍການເປັນປະທານຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫົວໜ້າຄະນະສະເພາະກິດຄວບຄຸມໂຄວິດ-19 ຂັ້ນແຂວງ, ມີບັນດາທ່ານຄະນະສະເພາະກິດຂອງແຂວງທີ່ໄດ້ຖືກແຕ່ງຕັ້ງ ເຂົ້າຮ່ວມ

ກອງປະຊຸມໄດ້ພ້ອມກັນປຶກສາຫາຫລື 4 ຂໍ້ໃຫຍ່ ເພື່ອແຈ້ງໃຫ້ສັງຄົມມີສ່ວນຮ່ວມ ເຊິ່ງປະກອບມີ ຄື:

  1. ການແຈ້ງໂຈະການສະໜັບສະໜູນໃຫ້ອາຫານ ແກ່ໂຮງໝໍພາກສະໜາມ ນາຊ້າງເຫີວຍ, ໂຮງໝໍພາກສະໜາມ ເມືອງປາກອູ, ໂຮງໝໍພາກສະໜາມ ເມືອງຈອມເພັດ
  2. ມາດຕະການຜ່ອນຜັນຕາມແຈ້ງການຂອງຫ້ອງວ່າການແຂວງ
  3. ການກຽມຄວາມພ້ອມໃນການເປີດປະເທດ, ເປີດແຂວງ ເພື່ອແກ້ໄຂບັນຫາດ້ານເສດຖະກິດ ຊີວິດການເປັນຢູ່ຂອງປະຊາຊົນບັນດາເຜົ່າ
  4. ການກະກຽມຄວາມພ້ອມຂອງການປີ່ນປົວຄົນເຈັບຢູ່ເຮືອນ.
    ໃນພິທີ ທ່ານ ບຸນເລື່ອມ ມະນີວົງ ຮອງເຈົ້າແຂວງ, ຫົວໜ້າຄະນະສະເພາະກິດຄວບຄຸມ ໂຄວິດ-19 ຂັ້ນແຂວງ ໄດ້ມີຄຳເຫັນໂອ້ລົມ ແລະເນັ້ນໃສ່ 5 ບັນຫາ ຄື:
  5. ອີງໃສ່ສະພາບການ ແລະເງື່ອນໄຂຂອງເສດຖະກິດ, ຕາມທິດຊີ້ນໍາຂອງແຂວງ, ການຈັດຕັ້ງປະຕິບັດໃຫ້ປະຊາຊົນເປັນເຈົ້າການນໍາກັນ ເປັນຕົ້ນແມ່ນການປິ່ນປົວຜູ້ສໍາພັດ c1 ໃຫ້ແພດຫມໍຂັ້ນເມືອງ, ຂັ້ນແຂວງປະຕິບັດຕາມມາດຕະການທິດຊີ້ນໍາການປິ່ນປົວຢູ່ເຮືອນ, ສໍານັກງານອົງການ.
    2.ມອບໃຫ້ພະນັກງານສາທາລະນະສຸກ ອົງການຈັດຕັ້ງ ປະຕິບັດສືບຕໍ່ມາດຕະການຜ່ານມາ, ໂຄສະນາໃຫ້ສັງຄົມມີສ່ວນຮ່ວມນໍາກັນຕາມທິດຊີ້ນໍາຂອງກະຊວງ ແມ່ນສ້າງໃຫ້ມີອາສາສະມັກຢູ່ບ້ານ ໂດຍສະເພາະແມ່ນນະຄອນຫລວງພະບາງ ໃຫ້ເຂົ້າເຖິງທ້ອງຖິ່ນ ໃຫ້ປະຊາຊົນເຂົ້າໃຈກ່ຽວກັບມາດຕະການປິ່ນປົວຢູ່ບ້ານ, ເຮືອນ ແລະ ໂຮງແຮມຕາມເງື່ອນໄຂຄອບຄົວ
  6. ສືບຕໍ່ຜັນຂະຫຍາຍມາດຕະການສັງຄົມຢ່າງເດັດຂາດ ຜູ້ທີ່ນໍາເອົາເຊື້ອພະຍາດມາເຜີຍແຜ່ໃຫ້ປະຕິບັດຕາມລະບຽບກົດຫມາຍຂອງເຈົ້າຫນ້າທີ່.
  7. ສືບຕໍ່ຈຸດກວດກາຂອງແຂວງເຫລືອພຽງ 2 ຈຸດ ຄື: ຈຸດກວດກາ ບ້ານນາເມືອງ ເມືອງນານ ຊາຍແດນລະຫວ່າງ ແຂວງຫລວງພະບາງ ຫາ ເມືອງກາສີ ແຂວງວຽງຈັນ ແລະ ຈຸດກວດກາ ບ້ານຫ້ວຍຫມ້ຽງ ເມືອງນໍ້າບາກ ຊາຍແດນ ລະຫວ່າງ ຫລວງພະບາງ ຫາ ເມືອງກາສີ
  8. ສໍາລັບຜູ້ທີ່ຕິດເຊື້ອໃໝ່ແມ່ນມອບໃຫ້ພັນທະຂອງແຂວງ, ສໍາລັບພະນັກງານ, ທະຫານ, ຕຳຫຼວດ, ບັນດາພະແນກການ, ບັນດາອົງການສາກົນ, ບັນດາລັດວິສາຫະກິດ ຫຼື ຫົວໜ່ວຍທຸລະກິດອື່ນໆ ຖ້າມີຄົນຕິດເຊື້ອ ແມ່ນມອບໃຫ້ພາກສ່ວນກ່ຽວຂ້ອງຮັບຜິດຊອບເອງ.
    ສຳລັບກໍລະນີຜູ້ທີ່ຕິດເຊື້ອໃໝ່ນີ້ ແມ່ນໃຫ້ພັນທະສຳລັບອັດຕາກິນຂອງຕົນເອງ ຈຳນວນ 30.000ກີບ/ຄົນ/ມື້ ຈຳນວນ 14 ມື້ ລວມທັງໝົດ 1 ຄົນ ແມ່ນໃຊ້ຈ່າຍ ຈຳນວນ 420.000 ກີບ, ສຳລັບພະນັກງານ, ທະຫານ, ຕຳຫຼວດ, ບັນດາພະແນກການ, ບັນດາອົງການສາກົນ, ບັນດາລັດວິສາຫະກິດ ຫຼື ຫົວໜ່ວຍທຸລະກິດອື່ນໆ ຖ້າມີຄົນຕິດເຊື້ອ ແມ່ນມອບໃຫ້ພາກສ່ວນກ່ຽວຂ້ອງຮັບຜິດຊອບເອງ. ກໍລະນີຜູ້ທີ່ມີເງື່ອນໄຂຄວາມສະດວກພາຍຫຼັງຕິດເຊື້ອແລ້ວໄປປີ່ນປົວຢູ່ໂຮງແຮມທີ່ເຈົ້າໜ້າກຳນົດໄວ້ ແມ່ນໃຫ້ຮັບຜິດຊອບຄ່າໃຊ້ຈ່າຍດ້ວຍຕົນເອງ. ສຳລັບຜູ້ທີ່ບໍ່ມີເງື່ອນໄຂ, ຫາເຊົ້າກິນຄ່ຳ ຫຼື ພາກສ່ວນທີ່ມາແຕ່ຫ່າງໄກສອກຫຼີກແທ້ໆ ແມ່ນໃຫ້ເຈົ້າໜ້າທີ່ເລືອກເຝັ້ນແຍກໃຫ້ລະອຽດ ສ່ວນຄ່າໃຊ້ຈ່າຍ ແລະ ການປີ່ນປົວແມ່ນພາກລັດເປັນຜູ້ຮັບຜິດຊອບ. ( ໂດຍໃຊ້ງົບປະມານລັດ ), ການຈໍາກັດບໍລິເວນ ສູນປີ່ນປົວຜູ້ທີ່ຕິດເຊື້ອແມ່ນ ໃຫ້ກັກກັນ 14 ວັນ ( ສຳລັບຜູ້ທີ່ບໍ່ມີອາການ ) ແລ້ວແມ່ນປ່ອຍອອກກັບບ້ານເພື່ອຈຳກັດໂຕເອງຕໍ່ 7 ວັນ.
    ມາດຕະການສຳລັບຜູ້ທີ່ຈະປີ່ນປົວຢູ່ເຮືອນ ແມ່ນໃຫ້ແຕ່ງຕັ້ງຄະນະກຳມະການກວດກາຢ່າງລະອຽດໂດຍໃຫ້ກວດກາວ່າສະຖານທີ່ດັ່ງກ່າວທີ່ຈະກັກກັນຜູ້ຕິດເຊື້ອ ແມ່ນມີຄວາມເໝາະສົມແລ້ວບໍ່ ເຊັ່ນວ່າ: ເຮືອນຂອງຜູ້ກ່ຽວມີຈັກຫຼັງ, ແຕ່ລະຫຼັງມີຈັກຫ້ອງ, ຄອບຄົວຜູ້ກ່ຽວມີຈັກຄົນ, ມີຄວາມເໝາະສົມແມ່ນສາມາດໃຫ້ຜູ້ກ່ຽວຈຳກັດບໍລິເວນຢູ່ເຮືອນຕົນເອງໄດ້, ຖ້າຫາກຄອບຄົວຜູ້ກ່ຽວມີຫຼາຍຄົນ ແຕ່ຕິດຄົນດຽວແມ່ນບໍ່ອານຸຍາດ, ການກັກໂຕຢູ່ເຮືອນ ແມ່ນໃຫ້ມີບົດບັນທຶກສັນຍາກັບຄອບຄົວຜູ້ກ່ຽວຢ່າງຫັດກຸມທີ່ສຸດລະຫວ່າງຜູ້ກ່ຽວ, ອຳນາດການປົກຄອງບ້ານ ແລະ ເຈົ້າໜ້າທີ່ຮັບຜິດຊອບການປີ່ນປົວ. ການກວດຕົວຢ່າງ C1 ແມ່ນເກັບມື້ທີ່ ໜື່ງ ແລະ ມື້ທີ12 ຖ້າເປັນຜົນລົບແມ່ນປ່ອຍອອກໄດ້. ສຳລັບທີມງານຮັບຜິດຊອບ ແມ່ນໃຫ້ເຮັດໄກ້ລາຍການ ຈຳກັດຕົນເອງຢູ່ເຮືອນ, ໄກ້ລາຍການປີ່ນປົວອອກມາຢ່າງລະອຽດ. ສະເໜີຂໍເປີດເບີໂທ 164 ໃຫ້ ທີມງານປີ່ນປົວທີ່ຕິດຕາມອາການສຳລັບຜູ້ທີ່ຈຳກັດບໍລິເວນຕົນເອງຢູ່ເຮືອນ. ການຊີດຢາໃຫ້ບັນດາສຳນັກງານອົງການຕ່າງໆທີ່ມີຄວາມສະດວກແມ່ນຕົກລົງເກັບເງີນໃນແຕ່ລະຄັ້ງ.
    ກອງປະຊຸມ ແມ່ນໄດ້ຄົ້ນຄວ້າຕົກລົງຢ່າງເປັນເອກະພາບ ເປັນເວລາເຄິ່ງວັນ ແລະໄດ້ອັດລົງໃນວັນດຽວກັນ.