ມີເດຍລາວແຂວງຈຳປາສັກ
ໃນວັນທີ 19 ພະຈິກ 2021 ຜ່ານມານີ້, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ເຮັນຮິກ ເອັນເດີເຊັນ ຜູ້ອຳນວຍການໃຫ່ຍບໍລິສັດ ເບຍລາວ ພ້ອມດ້ວຍຄະນະ ໃນໂອກາດມາເຄື່ອນໄຫວວຽກງານຢູ່ແຂວງຈຳປາສັກ.

ທ່ານ ເຮັນຣິກ ແອັນເດີເຊັນ ໄດ້ແຈ້ງຈຸດປະສົງ ຂອງການມາເຄື່ອນໄຫວວຽກງານຄັ້ງນີ້ ແມ່ນ ກ່ຽວກັບ ການ ຈຳ ໜ່າຍຜະລິດຕະພັນ ປະເພດເຄື່ອງດື່ມ ຂອງບໍລິສັດ ເບຍລາວ ຈຳກັດ ຢູ່ແຂວງຈຳປາສັກ. ພ້ອມດຽວກັນນີ້, ທ່ານກໍໄດ້ລາຍງານເພີ່ມເຕີມກ່ຽວກັບສະພາບການດໍາເນີນທຸລະກິດ ແລະ ການເຕີບໃຫຍ່ຂະຫຍາຍຕົວ ຂອງບໍລິສັດ ແລະ ໂຮງງານ ເບຍລາວ ແຂວງ ຈຳປາສັກ ຕັ້ງຢູ່ ບ້ານ ຫຼັກ 19 ເມືອງ ປະທຸມພອນ, ມູນຄ່າການລົງທຶນ 312 ຕື້ກີບ, ເປັນກິດຈະການໜື່ງທີ່ສ້າງລາຍຮັບໄດ້ດີ ແລະ ມອບພັນທະເຂົ້າງົບປະມານຂອງແຂວງ ປີ 2021 ມູນຄ່າ 306,9 ຕື້ກິບ/ປີ ຜະລິດຕະພັນທີ່ສາມາດຜະລິດໄດ້ປະກອບມີ : ເບຍລາວ. ນ້ຳຫວານ. ໂຊດາກາຫົວເສືອ ແລະ ນ້ຳດື່ມກາຫົວເສືອ. ລວມມູນຄ່າການຈໍາໜ່າຍພາຍໃນ ປີ 2021 ທັງໝົດ 681,48 ຕື້ກີບ.

ໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງການຕ້ອນຮັບ ທ່ານ ເຮັນຣິກ ແອັນເດີເຊັນ ຜູ້ອຳນວຍການໃຫ່ຍບໍລິສັດ ເບຍລາວ ພ້ອມດ້ວຍຄະນະ ທີ່ມາເຄື່ອນໄຫວວຽກງານຢູ່ແຂວງຈຳປາສັກ ເທື່ອນີ້. ພ້ອມກັນນັ້ນກໍ່ຊົມເຊີຍ ບໍລິສັດ ເບຍລາວ ທີ່ເຫັນໄດ້ຄວາມສຳຄັນ ແລະ ເອົາໃຈໃສ່ຊຸກຍູ້, ສົ່ງເສີມວັດທະນະທຳ ຮີດຄອງປະເພນີອັນດີງາມຂອງຊາດ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢູ່ແຂວງຈຳປາສັກ. ແລະຕໍ່ ກັບ ການ ຈຳ ໜ່າຍຜະລິດຕະພັນ ປະເພດເຄື່ອງດື່ມ ຂອງບໍລິສັດ ເບຍລາວ ຈຳກັດ ໂດຍສະເພາະ ວຽກງານຄຸ້ມຄອງ ການນຳເຂົ້າສິນຄ້າຈາກຕ່າງປະເທດ ເພື່ອມາຈຳໜ່າຍພາຍໃນເປັນຕົ້ນແມ່ນຜະລິດຕະພັນເຄື່ອງດື່ມ (ປະເພດເບຍ) ທີ່ບໍ່ຖືກຕ້ອງ ອົງການປົກຄອງແຂວງ ກໍ່ຄືພະແນກການກ່ຽວຂ້ອງ ໄດ້ກວດກາ ການຄ້າ ເປັນຕົ້ນແມ່ນກວດກາຕາມສາຍທາງ, ຕາມແຫຼ່ງຂ່າວແລະກວດກາປົກກະຕິ, ພ້ອມທັງປະຕິບັດມາດຕະການຕ່າງໆ ເພື່ອສະກັດກັ້ນ ການລັກລອບ ສິນຄ້າ ທີ່ຫຼົບຫຼີກການເສຍພາສີອາກອນ, ສິນຄ້າລອກຮຽນແບບ ແລະອື່ນໆ.

ຂ່າວ: ທັດຊະນະ