ມີເດຍລາວແຂວງຈຳປາສັກ
ໃນວັນທີ 19 ພະຈິກ 2021 ນີ້, ຫ້ອງການກະສິກຳ ແລະ ປ່າໄມ້ ເມືອງປາກຊ່ອງ ແຂວງຈຳປາສັກ ໄດ້ຈັດພິທີສະເຫຼີມສະຫຼອງວັນຊົນລະປະທານແຫ່ງຊາດ ຄົບຮອບ 9 ປີ ແລະ ວັນສັກຢາປ້ອງກັນພະຍາດສັດແຫ່ງຊາດ ຄົບຮອບ 13 ປີ ຂື້ນຢູ່ທີ່ບ້ານໂນນຈັນ ກຸ່ມ 10 ຂອງເມືອງ ໂດຍການເຂົ້າຮ່ວມເປັນປະທານຂອງທ່ານ ບຸນລິດ ເທບບຸນສູງ ຮອງເຈົ້າເມືອງໆປາກຊ່ອງ, ມີທ່ານ ປອ ສາລີ ສີລິໂພຄາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຈຳປາສັກ, ບັນດາທ່ານໃນຄະນະຫ້ອງການກະສິກຳແລະປ່າໄມ້ເມືອງ, ຫົວໜ້າຄະນະຫ້ອງການອ້ອມຂ້າງ, ອຳນາດການປົກຄອງບ້ານ, ພະນັກງານວິຊາການ ແລະ ພໍ່ແມ່ປະຊົນເຂົ້າຮ່ວມ.

ໃນພິທີ ທ່ານ ໂຕໂຕ້ ບຸນຍະວົງ ຮອງຫົວໜ້າຫ້ອງການກະສິກໍາແລະປ່າໄມ້ເມືອງປາກຊ່ອງ ລາຍງານໃຫ້ຮູ້ວ່າ: ການຈັດກິດຈະກຳການສະເຫຼີມສະຫຼອງ ວັນຊົນລະປະທານແຫ່ງຊາດ ແລະ ວັນສັກຢາປ້ອງກັນພະຍາດສັດແຫ່ງຊາດ ຂອງເມືອງປາກຊ່ອງ ແມ່ນໄດ້ຈັດຂື້ນໃນທຸກໆປີ ໂດຍຈຸດປະສົງນອກຈາກຈະເປັນການສ້າງຂະບວນການເພື່ອຊົມເຊີຍວັນດັ່ງກ່າວແລ້ວນັ້ນ ກໍຍັງເປັນການປູກຈິດສຳນຶກໃຫ້ແກ່ພໍ່ແມ່ປະຊາຊົນ ແລະ ຄົນລຸ້ນຫຼັງ ໃຫ້ເຫັນໄດ້ຄວາມໝາຍຄວາມສຳຄັນຂອງວຽກງານດັ່ງກ່າວຕື່ມອີກ. ເຊິ່ງມື້ນີ້ແມ່ນໄດ້ກຳນົດເອົາການຈັດພິທີ ສັກຢາປ້ອງກັນພະຍາດສັດ ຢູ່ທີ່ເຮືອນຂອງຄອບຄົວທ້າວ ໂຂງ ປະຊາຊົນບ້ານໂນນຈັນ ກຸ່ມ 10 ຂອງເມືອງ ໂດຍມີຈຳນວນສັດ ທັງໝົດ 100 ໂຕ.ເພື່ອຫຼຸດຜ່ອນ ການເກີດການລະບາດຂອງພະຍາດໃນສັດລ້ຽງຕາມລະດູການ.

ວຽກງານຊົນລະປະທານ ແມ່ນວຽກງານໜຶ່ງທີ່ມີຄວາມໝາຍຄວາມສຳຄັນ ໃນການສະໜອງນ້ຳໃຫ້ແກ່ການຜະລິດກະຊິກໍາ ເຊິ່ງເມືອງປາກຊ່ອງ ມີເນື້ອທີ່ດິນນາທັງໝົດ 502 ເຮັກຕາ, ເນື້ອທີ່ປັກດຳ 485,70 ເຮັກຕາ, ຜົນຜະລິດ1.408,53 ໂຕນ, ການສະໜອງນ້ຳໃນແລະນອກ ຊົນລະປະທານສູ່ການຜະລິດ ເນື້ອທີ່ 4.935,50 ເຮັກຕາ, ມີຈັກສູບນ້ຳດ້ວຍນ້ຳມັນ 137 ເຄື່ອງ, ໂປມນ້ຳໄຟຟ້າ 339 ເຄື່ອງ, ຝາຍນ້ຳລົ້ນ 2 ແຫ່ງ ແລະ ອ່າງເກັບນ້ໍາ 9 ແຫ່ງ ແລະ ນ້ຳລິນ 7 ແຫ່ງ ນອກນີ້ ຍັງໄດ້ມີການບູລະນະສ້ອມແປງ ຄອງນ້ຳລິນ ຈຸດພັດທະນາທົ່ງກາຫຼົງ ຄວາມຍາວ 2.350 ແມັດ ແລະ ຄອງຊົນລະປະທານເຊກະຕາມ 150 ແມັດ. ສຳລັບວຽກງານສັກຢາປ້ອງກັນພະຍາດສັດແມ່ນຈະສູ້ຊົນ ເພື່ອສ້າງພູມຄຸ້ມກັນໃຫ້ແກ່ສັດລ້ຽງ ໃນທົ່ວເມືອງໃຫ້ໄດ້ 75-80% ໃນນີ້ເຂດຕົວເມືອງ ແລະ ຊົນນະບົດ 50-55% ( ຈຳນວນຝູງສັດ ຄວາຍ 893 ໂຕ, ງົວ 23.463 ໂຕ, ໝູ 11.788 ໂຕ, ແບ້ແກະ 3.095 ໂຕ ແລະ ສັດປີກ 121.015 ໂຕ. ການບໍລິໂພກຊີ້ນ-ປາ ແລະ ອື່ນໆສະເລ່ຍ 29,21 ກິໂລ ຕໍ່ຄົນຕໍ່ປີ. ຈາກນັ້ນໃນພິທີ ຍັງໄດ້ຮັບຟັງການໂອ້ລົມຈາກ ທ່ານ ບຸນລິດ ເທບບຸນສູງ ຮອງເຈົ້າເມືອງໆປາກຊ່ອງ ແລະ ຕອນທ້າຍບັນດາທ່ານໃນຄະນະປະທານກໍ່ໄດ້ເຂົ້າຮ່ວມພິທີສັກຢາສັດ ຕົວຈິງ ເພື່ອສ້າງຂະບວນການສະເຫຼີມສະຫຼອງ ຂອງສອງວັນດັ່ງກ່າວໃຫ້ມີບັນຍາດການຟົດຟື້ນຕ່ືມອີກ.