ມີເດຍລາວແຂວງບໍ່ແກ້ວ ວັນທີ 22 ພະຈິກ ນີ້ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນພ້ອມຄະນະ ໄດ້ພົບປະໂອ້ລົມພະນັກງານການເງິນ ແຂວງບໍ່ແກ້ວ, ມີບັນດາຫົວໜ້າກົມ – ຮອງກົມ, ຫົວໜ້າ-ຮອງ ຫົວໜ້າພະແນກ, ຫົວໜ້າ-ຮອງຫົວໜ້າຂະແໜງການ, ພະນັກງານວິຊາການເຂົ້າຮ່ວມ.

ທ່ານ ສົມຫວັງ ລໍຫວັນໄຊ ກຳມະການພັກແຂວງ ຫົວໜ້າພະແນກການເງິນແຂວງ ໄດ້ລາຍງານສະພາບການຈັດຕັ້ງປະຕິບັດແຜນງົບປະມານ 10 ເດືອນຜ່ານມາ, ແຜນຄາດຄະເນ 2 ເດືອນທ້າຍປີ 2021 ຂອງພະແນກການເງິນໂດຍຫຍໍ້ ຍົກໃຫ້ເຫັນດ້ານດີຜົນງານການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານແຫ່ງລັດ ແລະ ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນເອົາໃຈໃສ່ປະຕິບັດໃນຕໍ່ໜ້າ. ໃນ 10 ເດືອນຜ່ານມາການຈັດເກັບລາຍຮັບເຂົ້າງົບປະມານແຫ່ງລັດປະຕິບັດໄດ້ 262 ຕື້ 424,73 ລ້ານກີບ ທຽບໃສ່ແຜນການປະຕິບັດໄດ້ 64% ຂອງແຜນການດັດແກ້ງວດ 4 ໃນນີ້ ລາຍຮັບພູດສູນກາງ ປະຕິບັດໄດ້ 165 ຕື້ 608,51 ລ້ານກີບທຽບໃສ່ແຜນການປະຕິບັດໄດ້ 61,30% ຂອງແຜນການປີ, ລາຍຮັບທ້ອງຖິ່ນປະຕິບັດໄດ້ 96 ຕື້ 816,22 ລ້ານກີບ ທຽບໃສ່ແຜນການປະຕິ ບັດໄດ້ 69,21% ຂອງແຜນການດັດແກ້ງວດ4, ຮັບດຸ່ນດຽງຈາກສູນກາງໃນປີ 2021 ນີ້ແມ່ນ 143 ຕື້ 760,72 ລ້ານກີບ ທຽບໃສ່ແຜນການປະຕິບັດໄດ້ 95,42% ຂອງແຜນການປີ, ຄາດຄະເນລາຍຮັບ-ລາຍຈ່າຍງົບປະມານ 2 ເດືອນທ້າຍປີໃຫ້ໄດ້ 52 ຕື້ 387,75 ລ້ານກີບ ໃນນັ້ນ ລາຍຮັບພູດສູນກາງໃຫ້ໄດ້ 32 ຕື້ 016,41 ລ້ານກີບ, ລາຍຮັບຂອງແຂວງໃຫ້ໄດ້ 20 ຕື້ 371,09 ລ້ານກີບ ໃນນີ້ ລາຍຮັບສ່ວຍສາອາກອນ 19 ຕື້ 556,68 ລ້ານກີບ, ລາຍຮັບຄຸ້ມຄອງຊັບສິນຂອງລັດ 814,41 ລ້ານກີບ.

ການການຈັດຕັ້ງປະຕິບັດຄໍາສັ່ງຂອງນາຍົກ ສະບັບເລກທີ 20/ນຍ, ລົງວັນທີ 08/10/2021 ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ນຳເຂົ້າ ແລະ ນຳໃຊ້ຍານ ພາຫະນະທຸກປະເພດ ແບບບໍ່ຖືກຕ້ອງ ແລະ ການຈັດຕັ້ງປະຕິບັດຄໍາແນະນໍາຂອງກະຊວງການເງິນ ເວົ້າສະເພາະຢູ່ແຂວງບໍ່ແກ້ວ ກະຊວງໄດ້ອອກແຈ້ງການເຖິງບຸກຄົນ, ນິຕິບຸກຄົນ ແລະ ການຈັດຕັ້ງໃນທົ່ວແຂວງບໍ່ແກ້ວ ໃຫ້ຍານພາຫະນະນຳເຂົ້າບໍ່ຖືກຕ້ອງມາຂຶ້ນບັນຊີຢູ່ພາສີປະຈຳແຂວງ, ຜ່ານການຈັດຕັ້ງປະຕິບັດນັບແຕ່ວັນທີ 18 ຕຸລາ 2021 ຫາວັນທີ 19 ພະຈິກ 2021 ຂື້ນບັນຊີໄດ້ທັງໝົດ 396 ຄັນ ໃນນັ້ນ, ລົດຈັກ 37 ຄັນ, ລົດເກງ 23 ຄັນ, ລົດກະບະ 298 ຄັນ, ລົດຈິບ 36 ຄັນ ແລະ ລົດຕູ້ 02 ຄັນ, ປັດຈຸບັນໄດ້ແກ້ໄຂເລີ່ມແຕ່ວັນທີ15 ຫາວັນທີ 19 ພະຈິກ 2021 ຈຳນວນ 36 ຄັນ, ສາມາດສ້າງລາຍຮັບມອບເຂົ້າງົບປະມານຂອງລັດຈຳນວນ 1.268.340.400 ກີບ, ປັດຈຸບັນແຂວງບໍ່ແກ້ວ ໄດ້ແຕ່ງຕັ້ງຄະນະຮັບຜິດຊອບດຳເນີນການແກ້ໄຂລົດນໍາເຂົ້າບໍ່ຖືກຕ້ອງເຊິ່ງມີພາກສ່ວນທີ່ກ່ຽວຂ້ອງຂອງແຂວງເຂົ້າຮ່ວມໃນການແກ້ໄຂລົດຈຳນວນດັ່ງກ່າວ.

ໂອກາດນີ້ ຮອງລັດຖະມົນຕີກະຊວງການເງິນທ່ານ ຮອງລັດຖະມົນຕີກະຊວງການເງິນໄດ້ມີຄໍາເຫັນຮຽກຮ້ອງໃຫ້ແຕ່ລະຂະແໜງການ ຈົ່ງສືບຕໍ່ປະຕິບັດການຈັດເກັບລາຍຮັບຕາມຕົວເລກຂອງຫົວໜ່ວຍທຸລະກິດໃຫ້ບັນລຸຕາມຄາດໝາຍ. ເອົາໃຈໃສ່ເຂັ້ມງວດ ເດັດຂາດຢູ່ບັນດາດ່ານ,ຕິດຕາມການເດີນເຮືອເຂົ້າ-ອອກຕາມລໍາແມ່ນໍ້າຂອງ ແລະ ພາຫະນະຂົນສົ່ງສິນຄ້າ ຫຼັງແຈ້ງໃຫ້ຄົບຖ້ວນ. ແກ້ໄຂບັນຫາພາຫະນະທຸກປະເພດທີ່, ນຳເຂົ້າບໍ່ຖືກຕ້ອງໃຫ້ເຂົາສູ່ລະບຽບການ, ເອົາໃຈໃສ່ບໍລິການໃຫ້ມີຄວາມວ່ອງໄວ ສອດຄ່ອງຕາມລະບຽບການໃນການຈັດເກັບລາຍຮັບເຂົ້າງົບປະມານແຫ່ງລັດໃຫ້ຄົບຖ້ວນຕາມແຜນ. ສຸ່ມໃສ່ບັນດາໜ້າວຽກທີ່ຍັງຄົງຄ້າງ ສືບຕໍ່ແກ້ໄຂປະກົດຫຍໍ້ທໍ້ທາງດ້ານເສດຖະກິດການເງິນ ໂດຍສະເພາະ ແມ່ນອັດຕາເງິນເຟີ້ທີ່ເປັນບັນຫາສຳຄັນ ທີ່ຕ້ອງແກ້ໄຂຢ່າງຫີບດ່ວນ ເພາະອັດຕາເງິນເຟີ້ນີ້ກະທົບທາງກົງ ແລະ ທາງອອ້ມຂອງການດຳລົງຊີວິດຂອງປະຊາຊົນ.
ຂ່າວ-ພາບ: ຄຳພັນ ແກ້ວມະນີ