ມີເດຍລາວແຂວງສາລະວັນ
ຂະບວນການຜະລິດກະສິກຳ ຢູ່ເມືອງວາປີ ແຂວງສາລະວັນ ເປັນຂະບວນການທີ່ກວ້າງຂວາງ ແລະ ຟົດຟື້ນໃນທຸກໆປີ ບໍ່ວ່າຈະປູກເຂົ້າ ຫຼື ພຶດຜັກຕ່າງໆ ເນື່ອງຈາກເງື່ອນໄຂ ແລະ ທ່າແຮງທີ່ເອື້ອອຳນວຍຄວາມສະດວກໃຫ້ກັບຊາວກະສິກອນ ເປັນຕົ້ນ: ມີຄອງເໝືອງ ລະບົບຊົນປະທານ ທີ່ສາມາດຫົດເນື້ອທີ່ການຜະລິດໄດ້ ໂດຍອາໄສແມ່ນ້ຳເຊໂດນ, ບຶງ, ໜອງ ແລະ ຝາຍນ້ຳລົ້ນ. ຊື່ງໃນປີນີ້ ກໍ່ໄດ້ເປີດພິທີຢ່າງເປັນທາງການ ເພື່ອໃຫ້ຊາວກະສິກອນ ຫ້າງຫາກະກຽມກ້າວເຂົ້າສູ່ລະດູການຜະລິດລະດູແລ້ງເປັນຕົ້ນ: ສະຖານທີ່, ອຸປະກອນຮັບໃຊ້, ລະບົບຊົນລະປະທານ, ແນວພັນ, ການສັກຢາກັນພະຍາດໃຫ້ສັດລ້ຽງ ແລະ ອື່ນໆ.

ທ່ານ ສຸກສາຄອນ ລາດຊະພົນ ຫົວໜ້າຫ້ອງການກະສິກຳ-ປ່າໄມ້ເມືອງວາປີ ໄດ້ລາຍງານ ວ່າ: ໃນປີ 2021 ທົ່ວເມືອງສາມາດເກັບກ່ຽວຜົນຜະລິດເຂົ້າ ໄດ້ທັງໝົດ 66.130 ໂຕນ, ໃນເນື້ອທີ່ທັງໝົດ 16.100 ເຮັກຕາ, ທຽບໃສ່ປີ 2020 ເພີ່ມຂື້ນ 30%, ໃນນັ້ນເຂົ້ານາແຊງ ຍົກສະມັດຕະພາບໄດ້ 5 ໂຕນຕໍ່ເຮັກຕາ ໃນເນື້ອທີ່ 3 ພັນກວ່າເຮັກຕາ, ເຂົ້ານາປີ 3 ໂຕນຕໍ່ເຮັກຕາ, ໃນເນື້ອທີ່ 12,611 ເຮັກຕາ. ສຳລັບຂະບວນການປູກພຶດລະດູແລ້ງ ປີນີ້ຂອງເມືອງວາປີ ມີແຜນຜະລິດພຶດລະດູແລ້ງ ໃນເນື້ອທີ່ທັງໝົດເກືອບ 4 ພັນເຮັກຕາ, ປູກເຂົ້າ 2.642 ເຮັກຕາ, ປູກພືດຕ່າງໆ 850 ເຮັກຕາ, ການປູກພືດໃນເຂດຊົນລະປະທານ 250 ເຮັກຕາ, ເຂດນອກຊົນລະປະທານ 600 ເຮັກຕາ ທຽບໃສ່ປີຜ່ານມາຫຼຸດລົງ 500 ກວ່າເຮັກຕາ ຍ້ອນການສະໜອງນ້ຳ ບໍ່ສາມາດປະຕິບັດໄດ້ 100% ໂດຍສະເພາະລະບົບຊົນລະປະທານບາງແຫ່ງ ກຳລັງຟື້ນຟູ ແລະ ສ້ອມແປງ. ທົ່ວເມືອງວາປີ ມີລະບົບຊົນລະປະທານທັງໝົດ 29 ແຫ່ງ, ໃນນັ້ນຝາຍນໍ້າລົ້ນ 2 ແຫ່ງ, ຈັກສູບນໍ້າດ້ວຍໄຟຟ້າ 15 ແຫ່ງ, ອ່າງເກັບນໍ້າ 11 ແຫ່ງ ແລະ ຝາຍນໍ້າລົ້ນແບບປະຖົມປະຖານ 1 ແຫ່ງ. ປັດຈຸບັນ, ໄດ້ຕິດຕາມຂະບວນການເກັບກູ້ມັນຕົ້ນ ປະຕິບັດໄດ້ແລ້ວ 30 ເຮັກຕາ ຜົນຜະລິດໄດ້ 750 ໂຕນ (ມັນດິບ) ແລະ ໄດ້ແຈກຢາຍແນວພັນເຂົ້າ 18,6 ໂຕນ ໃຫ້ຊາວກະສິກອນ ຈຳນວນ 10 ບ້ານ ແລະ ສັກຢາປ້ອງກັນພະຍາດສັດ 3 ພັນກວ່າໂຕ.

ຈາກນັ້ນ, ທ່ານຮອງເຈົ້າແຂວງ ແລະເຈົ້າເມືອງວາປີ ກໍ່ໄດ້ມອບແນວພັນເຂົ້າ ແລະ ແນວພັນພືດປະເພດຕ່າງໆ ໃຫ້ພໍ່ແມ່ປະຊາຊົນບ້ານນາລະໂອງ, ພ້ອມນັ້ນກໍ່ໄດ້ເຂົ້າຮ່ວມຂະບວນສັກຢາກັນພະຍາດສັດໃຫ້ງົວ ແລະຫວ່ານເມັດເຂົ້າ ເພື່ອເປີດການຜະລິດລະດູແລ້ງຢ່າງເປັນທາງການ.
ພິທີດັ່ງກ່າວຈັດຂຶ້ນໃນທ້າຍອາທິດຜ່ານມານີ້, ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ບຸນຍູ້ ຈັນທະລັງສີ ເຈົ້າເມືອງໆວາປີ, ມີຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ, ຫ້ອງການກະສິກໍາປ່າໄມ້ເມືອງ ແລະ ນາຍບ້ານ ພ້ອມດ້ວຍປະຊາຊົນ ເຂົ້າຮ່ວມ.

ພາບ-ຂ່າວ: ທິດລານີ ໂຄດໂຍທາ.