ໃນລະຫວ່າງວັນທີ 23-24 ພະຈິກ 2021 ນີ້ ພະແນກ ຖວທ ແຂວງອຸດົມໄຊ ຮ່ວມກັບ ບໍລິສັດກຼີນດິດສະໂຄເວີລີລາວ ໄດ້ປຶກສາຫາລືການບໍລິການເຊື່ອມໂຍງທ່ອງທ່ຽວ ໃນຕໍ່ໜ້າ ແລະ ເຂົ້າສຳຫຼວດເກັບກຳຂໍ້ມູນສ້າງລາຍການທ່ອງທ່ຽວພາຍໃນຖ້ຳຈອມອອງ ເມືອງໄຊ ແຂວງອຸດົມໄຊ, ໂດຍມີ ທ່ານ ບຸນກວມ ມິດເມືອງໄຊ ຮອງຫົວໜ້າພະແນກ ຖວທ ແຂວງອຸດົມໄຊ, ມີທ່ານ ອິນທີ ເດືອນສະຫວັນ ຜູ້ອຳນວຍການ ບໍລິສັດອິນທິຣາກຼຸບ ພ້ອມດ້ວຍພະນັກງານວິຊາການ ທ່ອງທ່ຽວ ແລະ ຄະນະໄກ່ນຳພາທາງຂັ້ນບ້ານເຂົ້າຮ່ວມ.


ເຊີ່ງການລົງສຳຫຼວດຂອງພະແນກ ຖວທ ຮ່ວມກັບ ບໍລິສັດຄັ້ງນີ້ ແມ່ນໄດ້ປຶກສາຄວາມເປັນໄປໄດ້ໃນການຮ່ວມມືເຊື່ອມໂຍງການທ່ອງທ່ຽວໃນແຂວງອຸດົມໄຊ ກັບບັນດາແຂວງຕ່າງໆ ທັງພາຍໃນ ແລະ ຕ່າງປະເທດ ໂດຍສະເພາະແມ່ນການທ່ອງທ່ຽວຖໍ້າຈອມອອງ ທີ່ມີຄວາມໂດດເດັ່ນ ແລະ ເປັນທີ່ສົນໃຈຂອງນັກທ່ອງທ່ຽວຈຳນວນຫຼາຍ ດັ່ງນັ້ນບໍລິສັດຈື່ງໄດ້ລົງສຳຫຼວດເກັບກຳຂໍ້ມູນຖໍ້າໂຕຈີງ ໂດຍໄດ້ເລີ່ມຢ່າງຈາກທາງເຂົ້າປາກຖ້ຳຕາມເສັ້ນທາງທີ່ໄດ້ຮັບການພັດທະນາ ມີສີ່ງອຳນວຍຄວາມສະດວກ ມີໄຟເຍືອງທາງ ໄລຍະທາງ 800 ແມັດ, ຈາກນັ້ນທີມງານກໍໄດ້ຍ່າງສຳຫຼວດເຂົ້າໄປຕໍ່ທາງໃນຕື່ມອີກ ປະມານ 7 ກິໂລແມັດ ໂດຍມີໄກ້ນຳທ່ຽວນຳພາທາງຈົນຮອດປາກຖ້ຳອີກຟາກໜື່ງຂອງຖ້ຳຈອມອອງ, ທ່ານ ອີນທີ ເດືອນສະຫວັນ ຜູ້ອຳນວຍການບໍລິສັດອິນທິຣາກຼຸບ ໄດ້ໃຫ້ສຳພາດວ່າ: ການລົງສຳຫຼວດເກັບກຳຂໍ້ມູນພາຍໃນຖ້ຳຈອມອອງຄັ້ງນີ້ ກໍ່ເພື່ອສ້າງລາຍການທ່ອງທ່ຽວຢູ່ພາຍໃນຖ້ຳ ຕໍ່ເຕືມກັບສີ່ງທີ່ມີຢູ່ແລ້ວໃຫ້ມີຄວາມຫຼາກຫຼາຍ ມີກິດຈະກຳຫຼາຍຢ່າງໄວ້ໃຫ້ນັກທ່ອງທ່ຽວເລືອກໃຊ້ບໍລິການ. ທ່ານ ອີນທີ ເດືອນສະຫວັນ ຜູ້ອຳນວຍການບໍລິສັດອິນທິຣາກຼຸບ ໄດ້ກ່າວວ່າ ການລົງສຳຫຼວດຄັ້ງນີ້ ແມ່ນໄດ້ສຳຫຼວດແບບລະອຽດ ໂດຍການຍ່າງທະລຸອອກອີກຟາກຂອງຖ້ຳຈອມອອງ .

ພ້ອມນີ້ທ່ານ ອີນທີ ເດືອນສະຫວັນ ຍັງຮຽກຮ້ອງເຖີງນັກທ່ອງທ່ຽວ ແລະ ນັກລົງທືນທີ່ສົນໃຈຢາກເຂົ້າມາທ່ອງທ່ຽວ ຫຼື ລົງທືນເຂົ້າໃນກິດຈະກຳການທ່ອງທ່ຽວ ບາງກິດຈະກຳໃນຖ້ຳຈອງອອງແມ່ນສາມາດມາໄດ້ ແລະ ກໍ່ຈະມີອານາຄົດແນ່ນອນ, ການຢ່າງສຳຫຼວດພາຍໃນຖ້ຳຈອມອອງຂອງທີມງານຄັ້ງນີ້ແມ່ນໃຊ້ເວລາຍ່າງໃນຖ້ຳ 8 ຊົ່ວໂມງ ລວມໄລຍະທາງ 6 ກິໂລແມັດ ແລະ ຍັງເປັນກຸ່ມນັກເດີນສຳຫຼວດຄົນລາວທີ່ສາມາດຍ່າງຊອດອອກປາກຖ້ຳອີກຟາກໜື່ງຂອງຖ້ຳຈອມອອງ.

ສຳລັບຖ້ຳຈອມອອງແມ່ນໄດ້ຮັບທຶນສະໜັບສະໜູນຈາກໂຄງການພັດທະນາໂຄ່ງລ່າງພື້ນຖານເພື່ອສົ່ງເສີມການທ່ອງທ່ຽວ ແມ່ນໄດ້ສຳເລັດການກໍ່ສ້າງສີ່ງອຳນວຍຄວາມສະດວກຕ່າງໆ ເປັນຕົ້ນແມ່ນສະຖານທີ່ຈອດລົດ, ຫ້ອງຂາຍປີ້, ຫ້ອງນ້ຳ, ເສັ້ນທາງ ຂົວອູ່ ແລະ ໄຟເຍືອງພາຍໃນຖ້ຳ ແລະ ອື່ນໆ ເພື່ອອຳນວຍຄວາມສະດວກສະບາຍໃຫ້ແກ່ນັກທ່ອງທ່ຽວ.

#ພາບ-ຂ່າວ: ແສງອາທິດ