ມີເດຍລາວແຂວງເຊກອງ
ໃນໄລຍະຜ່ານມາເຖິງແມ່ນວ່າເມືອງທ່າແຕງໄດ້ມີຄວາມພະຍາຍາມສຸມໃສ່ສະກັດກັ້ນ ແລະ ແກ້ໄຂການທໍາລາຍປ່າໄມ້ດ້ວຍວິທີການທີ່ເໝາະສົມແຕ່ຍັງມີປະຊາຊົນຫຼາຍຄອບຄົວຍັງບຸກລຸກທຳລາຍປ່າໄມ້ເພື່ອເຮັດການຜະລິດກະສິກຳໂດຍສະເພາະຢູ່ເຂດປ່າປ້ອງກັນພູຈວມ ແລະ ຍອດນໍ້າເຊໂດນ.

ທ່ານ ສົມເພັດ ເອີດລັດດາ ເລຂາພັກເມືອງ ເຈົ້າເມືອງທ່າແຕງເປີດເຜີຍໃນໂອກາດທີ່ ທ່ານ ເຫຼັກໄຫຼ ສີວິໄລ ເລຂາພັກແຂວງ ເຈົ້າແຂວງເຊກອງລົງເຄື່ອນໄຫວປຸກລະດົມຊຸກຍູ້ຄະນະນໍາເມືອງທ່າແຕງເອົາໃຈໃສ່ສະກັດກັ້ນການທໍາລາຍປ່າໄມ້ຂອງປະຊາຊົນໃນທ້າຍອາທິດຜ່ານມາວ່າ: ທົ່ວເມືອງມີເນື້ອທີ່ປ່າໄມ້ 25.902 ເຮັກຕາ ກວມເອົາ 36,8% ໃນນີ້ມີເນື້ອທີ່ປ່າປ້ອງກັນລະດັບຊາດ-ລະດັບແຂວງ 24.787 ເຮັກຕາ ແລະ ປ່າສະຫງວນ 1.115 ເຮັກຕາ ໂດຍໃນປັດຈຸບັນສະພາບການປົກຄຸມຂອງປ່າປ້ອງກັນລະດັບຊາດ-ລະດັບແຂວງ ແລະ ປ່າສະຫງວນໄດ້ມີທ່າອ່ຽງຫຼຸດລົງ ຍ້ອນມີການບຸກລຸກຂອງປະຊາຊົນເພື່ອເຮັດການຜະລິດກະສິກຳເຊິ່ງມີຜູ້ບຸກລຸກທັງໝົດ 18 ບ້ານ 564 ຄອບຄົວ,ຜ່ານມາໄດ້ສຸມໃສ່ແກ້ໄຂຫຼາຍວິທີທີ່ເໝາະສົມຈໍານວນ 228 ຄອບຄົວ.

ຕໍ່ບັນຫາດັ່ງກ່າວ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ໃຫ້ທິດຊີ້ນໍາເຊິ່ງໄດ້ກ່າວສະແດງຄວາມຊົມເຊີຍຕໍ່ການນໍາຂອງເມືອງທີ່ມີຄວາມຮັບຜິດຊອບສູງ,ມີຫົວຄິດປະດິດສ້າງໃນການຜັນຂະຫຍາຍນິຕິກຳກໍຄືມາດຕະການທີ່ພັກ-ລັດຖະບານ ແລະ ການນໍາແຂວງວາງອອກ ແລະ ໄດ້ຈັດຕັ້ງປະຕິບັດຢ່າງເຂັ້ມງວດ.ປະຊາຊົນ ແລະ ທຸກພາກສ່ວນໃຫ້ການຮ່ວມມືເຮັດໃຫ້ການຟື້ນຟູ,ການປົກປັກຮັກສາ ແລະ ການປ້ອງກັນ,ສະກັດກັ້ນການບຸກລຸກທໍາລາຍປ່າໄມ້ຂອງປະຊາຊົນນັບມື້ຖອຍລົງ.
ແຕ່ເຖິງຢ່າງໃດກໍດີ ເຈົ້າແຂວງ-ແຂວງເຊກອງໄດ້ເນັ້ນໃຫ້ການນໍາເມືອງ ແລະ ຂະແໜງການກ່ຽວຂ້ອງເອົາໃຈໃສ່ແຕ່ງຕັ້ງຄະນະທິມງານ,ວາງແຜນເຄື່ອນໄຫວຢ່າງລະອຽດຊັດເຈນ ແລ້ວສະເໜີແຂວງອະນຸມັດ ເພື່ອໃຫ້ທັນເຄື່ອນໄຫວໃນທ້າຍປີ 2021 ນີ້.ໂດຍໃຫ້ເປັນເຈົ້າການສຶກສາອົບຮົມການເມືອງແນວຄິດໃຫ້ປະຊາຊົນແຕ່ລະບ້ານ ຮັບຮູ້ເຂົ້າໃຈຕໍ່ແນວທາງຂອງພັກ-ລັດຖະບານກ່ຽວກັບການປົກປັກຮັກສາປ່າໄມ້ ແລະ ການຟື້ນຟູປ່າໄມ້,ກະກຽມເບ້ຍໄມ້ທີ່ຈະປູກໃນປີ 2022ໃຫ້ພຽງພໍ ແລະ ທັນກັບເວລາ ໂດຍຕິດພັນກັບການປຸກລະດົມນັກທຸລະກິດ-ຜູ້ປະກອບການພາຍໃນເມືອງໃຫ້ປະກອບສ່ວນເຂົ້າໃນການຟື້ນຟູປ່າໄມ້ໂດຍສະເພາະ ສະໜອງເບ້ຍໄມ້-ງົບປະມານເຂົ້າໃນການປູກໄມ້ຟື້ນຟູປ່າໃນແຕ່ລະປີ ຫຼື ສ້າງເປັນສວນປູກໄມ້ຕົວແບບໃນເຂດການລົງທຶນຂອງຕົນ.
ຂ່າວ-ພາບ: ສະຫຍາມ