ມີເດຍລາວແຂວງຈຳປາສັກ
ຕອນເຊົ້າວັນທີ24 ພະຈິກ 2021ນີ້,ເມືອງສຸຂຸມາໄດ້ຈັດກອງປະຊຸມເພື່ອກະກຽມຄວາມພ້ອມໃນການສະເຫຼີມສະຫຼອງວັນຊາດທີ02ທັນວາຄົບຮອບ46ປີແລະວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ101ປີ,ທີ່ສະໂມສອນຂອງເມືອງ,ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ນາງ ຄ່າຍແກ້ວ ສິງຫາວົງ ຮອງເລຂາພັກເມືອງ,ມີບັນດາທ່ານໃນຄະນະປະຈຳພັກເມືອງ,ກຳມະການພັກເມືອງ,ຫົວໜ້າ-ຮອງຫົວໜ້າຫ້ອງການ,ເລຂາຄະນະພັກຮາກຖານກຸ່ມບ້ານຕະຫຼອດຮອດເລຂາພັກບ້ານໃຫ່ຍເຂົ້າຮ່ວມ.

ກອງປະຊຸມທ່ານ ບົວລຽນ ເຜີຍບຸນຊົມ ກຳມະການພັກເມືອງ ຫົວໜ້າຫ້ອງວ່າການເມືອງໄດ້ຂື້ນຜ່ານຮ່າງຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບງານສະເຫຼີມສະຫຼອງວັນຊາດທີ02 ທັນວາ ຄົບຮອບ46ປີແລະວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ101ປີ,ເພື່ອເປັນການກະກຽມຄວນມພ້ອມໃນການສະເຫຼີມສະຫຼອງວັນຊາດທີ02ທັນວາທີ່ຈະມາເຖິງນີ້ຄະນະນຳຂອງເມືອງສຸຂຸມາກໍ່ໄດ້ເອົາໃຈໃສ່ຈັດຕັ້ງປະຕິບັດວຽກງານຕ່າງໆທີ່ສຳຄັນເປັນຕົ້ນແມ່ນຂະບວນການອະນາໄມລວມຕາມແຄມທາງຫຼວງ,ຕາມບໍລິເວນສຳນັກງານຫ້ອງການ,ກົມກອງອ້ອມຂ້າງເມືອງແລະບ້ານ,ການປະດັບປະດາໄຟແສງສີໃຫ້ມີຄວາມຈົບງາມ,ການຕິດທຸງຊາດທຸງພັກຕາມສຳນັກງານຫ້ອງການແລະບ້ານທີມີເງື່ອນໄຂຕາມຄວາມເໝະສົມ,ມີການຈັດຕັ້ງເວນຍາມຕາມສຳນັກງານຫ້ອງການແລະສຳນັກບ້ານ,ການວາງພວງມະລາ,ການຕິດປ້າຍຄຳຂັວນແລະຂະບວນການຍ້ອງຍໍຕ່າງໆໃຫ້ເປັນຂະບວນການທີ່ຟົດຟື້ນ,ສຳລັບການສ້າງຂະບວນການຕ່າງໆໂດຍສະເພາະແມ່ນຂະບວນການກິລາ,ສິນລະປະວັນນະຄະດີແມ່ນຈະບໍ່ໄດ້ມີການແຂ່ງຍ້ອນສະພາບການແຜ່ລະບາດຂອງພະຍາດໂຄວິດ-19
ການສະເຫຼີມສະຫຼອງວັນຊາດທີ02ທັນວາຄົບຮອບ46ປີ ເມືອງສຸຂຸມາແມ່ນຈະໄດ້ຈັດຂື້ນໃນລະຫ່ວາງຕົ້ນເດືອນທັນວາ2021ນີ້.
ຂ່າວ-ພາບ:ປັນຍາ ແກ້ວພິລົມ
ຖວທ ເມືອງ