ມີເດຍລາວແຂວງຈຳປາສັກ ບ່າຍວັນທີ 24 ພະຈິກ 2021 ທີ່ຫ້ອງວ່າການແຂວງ. ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ຊິມ ສຸຄົມ ກົງສູນໃຫຍ່ ແຫ່ງ ຣາຊະອານາຈັກກຳປູເຈຍ ປະຈຳນະຄອນປາກເຊ ແຂວງຈຳປາສັກ ໃນໂອກາດເຂົ້າຢ້ຽມຂ່ຳນັບອວຍພອນ ວັນຊາດ ສາທາລະນະລັດ ປະຊາທິປະໄຕ ປະຊາຊົນລາວ ວັນທີ 2 ທັນວາ ຄົບຮອບ 46 ປີ ທີ່ຈະມາເຖິງ.

ໂອກາດນີ້, ທ່ານ ກົງສູນໃຫຍ່ ໄດ້ສະແດງຄວາມຂໍ່ານັບ ຊົມເຊີຍ ອວຍພອນ ວັນຊາດ ສປປ ລາວ ຄົບຮອບ 46 ປີ, ມູນເຊື້ອ ແລະ ໄຊຊະນະປະຫວັດສາດຂອງພາລະກິດ ແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການຊີ້ນຳ ນຳພາ ຂອງພັກ-ລັດ.

ໂອກາດດຽວກັນນີ້, ທ່ານ ວິໄລວົງ ບຸດດາຄຳ ກໍໄດ້ສະແດງຄວາມຂອບໃຈ ຕໍ່ ທ່ານ ຊິມ ສຸຄົມ ກົງສູນໃຫຍ່ ແຫ່ງ ຣາຊະອານາຈັກ ກຳປູເຈຍ ປະຈຳນະຄອນປາກເຊ ແຂວງຈຳປາສັກ, ຊົມເຊີຍ ແລະຕີລາຄາສູງ ໃນກາງປະສານງານ ຮັດແໜ້ນຄວາມສາມັກຄີ, ຜັນຂະຫຍາຍການຮ່ວມມື ມິດຕະພາບອັັນເປັນມູນເຊື້ອ ລະຫວ່າງ ປະຊາຊົນສອງຊາດ ເວົ້າລວມ, ເວົ້າສະເພາະ ບັນດາແຂວງພາກໃຕ້ ຂອງ ສປປ ລາວ ກັບ ບັນດາແຂວງທີ່ໃຫ້ການຮ່ວມມື ຂອງ ຣາຊະອານາຈັກ ກຳປູເຈຍ. ພ້ອມນີ້, ທ່ານເຈົ້າແຂວງຈຳປາສັກ ກໍໄດ້ຖືໂອກາດສະແດງຄຳ ອວຍພອນ ວັນຊາດ ຣາຊະອານາຈັກ ກຳປູເຈຍ ຄົບຮອບ 68 ປີ (09/11/1953-09/11/2021) ທີ່ຜ່ານມາ; ອວຍພອນ ແດ່ ທ່ານກົງສູນໃຫຍ່, ບັນດາການນຳທຸກໆ ຂັ້ນ ແລະປະຊາຊົນກຳປູເຈຍ ຈົ່ງມີຄວາມສຸກ, ມີຜົນສຳເລັດໃນໜ້າທີ່ວຽກງານທຸກດ້ານ, ພ້ອມສືບຕໍ່ຮັດແໜ້ນຄວາມສາມັກຄີ ສ້າງສາຍພົວພັນການຮ່ວມມື ມິດຕະພາບອັນເປັນມູນເຊື້ອ ໃຫ້ແໜ້ນແຟ້ນຍິ່ງຂຶ້ນ.

ຂ່າວ: ທັດຊະນະ